ރައްޔިތުންގެ އިތުބާރު ހޯދަން މި ސަރުކާރުން ވާންޖެހޭ ގުރުބާނީ ވަރަށް ބޮޑު: ފައިސަލް ނަސީމް
ރާއްޖެ ޓީވީގެ ޕްރޮގްރާމެއްގައި ވާހަކަދައްކަވަމުން ކުރީގެ ނައިބު ރައީސް ފައިސަލް ނަސީމް ވިދާޅުވީ މަޝްރޫއުތައް ހަވާލުކުރުމުގައި ބިޑިންގެ ކަންކަމާއި ޕްރޮކިއުމެންޓްގައި ދެފުށްފެންނަ ގޮތަށް ސާފުކޮށް ބާއްވަން ޖެހޭ ކަމަށް. ދައުލަތުގެ ދަރަނި ދެއްކޭނެ ގޮތްތައް ހޯދައި ޚަރަދު ކުޑަކޮށް އާމްދަނީ އިތުރުކުރަން ޖެހޭ ކަމަށާއި ދިވެހި ވިޔަފާރިތަކަށް ފުރުސަތު ދީ ކޮންސްޓްރަކްޝަން އަދި މަސްވެރިކަމުގެ ދާއިރާ ތަރައްގީކުރަން ޖެހޭ ކަމަށް ފައިސަލް ވިދާޅުވި. ރައީސް މުއިއްޒު ގެ ސަރުކާރަށް ރައްޔިތުންގެ އިތުބާރު މުޅީން ހެން ގެއްލިފައިވާ މި ދަނޑިވަޅުގައި، ރައްޔިތުންގެ އިތުބާރު ހޯދުމަށް މިސަރުކާރުން ވާންޖެހޭ ގުރުބާނީ ވަރަށް ބޮޑު ކަމަށް ފައިސަލް ވިދާޅުވި.
ކުރީގެ ނައިބް ރައީސް ފައިސަލް ނަސީމް
ރައީސް މުއިއްޒު ގެ ސަރުކާރަށް ރައްޔިތުންގެ އިތުބާރު މުޅީން ހެން ގެއްލިފައިވާ މި ދަނޑިވަޅުގައި، ރައްޔިތުންގެ އިތުބާރު ހޯދުމަށް މިސަރުކާރުން ވާންޖެހޭ ގުރުބާނީ ވަރަށް ބޮޑު ކަމަށް ދިވެހިރާއްޖޭގެ ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެ އެވެ.
އާދީއްތަ ދުވަހުގެ ރޭ ރާއްޖެ ޓީވީ ގެ ފަލަސުރުހީ ޕްރޮގްރާމްގަިއ ވާހަކަ ދައްކަވަމުން ފައިސަލް ވިދާޅުވީ މި ސަރުކާރުން އެކި ފަރާތްތަކަށް މަޝްރޫއު ތައް ހަވާލުކުރާ ގޮތުން ރައްޔިތުންގެ ބޮޑެތި ކަންބޮޑުވުންތައް އެބަ ހުރި ކަމަށެވެ. ސަރުކާރުގެ އިހްލާސްތެރި ކަމެއް ހުރިއްޔާ ބިޑިން އަދި ޕްރޮކިއުމެންޓް ގެ ކަންކަން ސާފުކޮށް ދެފުށް ފެންނަގޮތަށް ބާއްވާ ޕްރޮޖެކްޓް ތައް ހަވާލުކުރުމަށް ފައިސަލް ވަނީ ސަރުކާރަށް ގޮވާލައްވާފަ އެވެ. މިސަރުކާރުގެ އަމަލުތައް ހުރިގޮތުން، ރައްޔިތުން ސަރުކާރަށް ކުރާ އިތުބާރު މުޅިން ގެއްލިފައި ވާކަމަށް ފައިސަލް ފާހަގަކުރެއްވި އެވެ.
ރަނގަޅަށް ރީތި ވެރިކަމެއް ކޮށްލަންވީ، ޚިދުމަތް ވެސް ދޭންވީ. ދެ ފުށް ފެންނަ ގޮތަކަށް، ސާފުކޮށް ބާއްވަންވީ ނޫންތޯ. ބިޑިން، ޕްރޮކިއުމަންޓް، މިއީ ވަރަށް ކަންބޮޑުވުންް ހުރި ކަންކަން. ރައްޔިތުންގެ ކަންބޮޑުވުން އެބަ އޮތް. މަޝްރޫއުތައް އެކި ފަރާތްތަކަށް ދެވޭ ގޮތާ މެދު، ދެވޭ އަގާ މެދު ވަރަށް ބޮޑު ކަންބޮޑުވުމެއް އެބަ އޮތް. އެހެންވީމާ، ހާމަކަން ބޮޑު ކޮށްލަންވީ. އެއީ ރައްޔިތުންގެ އެހާ އިތުބާރު ގެއްލިފައި އޮތް ވަގުތެއްގައި، ރައްޔިތުންގެ އިތުބާރު ހޯދާ ކަމަށް ވަންޏާ ދެން ޖެހޭނީ ވަރަށް ބޮޑު ޤުރުބާނީއެއްވާންކުރީގެ ނައިބް ރައީސް ފައިސަލް ނަސީމް
މި ސަރުކާރުން ރައްޔިތުންނަށް ހެވެެއް އެދެންޔާ ކުރަންވީ ކަމަކީ، ދައުލަތުގެ ދަރަނި ދައްކާނެ ގޮތްތަކެއް ހޯދާ، ޚަރަދުތައް ކުޑަކޮށް، ހަމަ އެއާ އެކު، އާމްދަނީ އިތުރަށް ލިބޭނެ ގޮތްތައް ހޯދުން ކަމަށް ފައިސަލް ވިދާޅުވި އެވެ. ދިވެހި ވިޔަފާރި ތަކަށް އިތުރު ފުރުސަތުތައް ހޯދައިދީ ކޮންސްޓްރަކްޝަން ދާއިރާ އާއި، މަސްވެރި ކަމުގެ ދާއިރާގައި އިތުރަށް ކުރަން ޖެހޭ ވަރަށް ގިނަ ކަންތައްތައް އެބަހުރި ކަމަށް ފައިސަލް ވިދާޅުވި އެވެ. މި ދާއިރާތަކުން އިތުރަށް ނަފާ ލިބިދޭނެ ގޮތް ރައްޔިތުންނަށް މަގުފަހި ކުރުމަށްޓަކާ ކުދި ވިޔަފާރިތަކަށް ފުރުސަތު ދިނުމަށް ފައިސަލް ވަނީ ގޮވާލައްވާފަ އެވެ.
މީގެ އިތުރުން ރައީސް ސޯލިހު އަދި ރައީސް ނަޝީދު އެކުގައި މަސައްކަތް ކުރެއްވުމަށް ނިންމެވުމާ ގުޅޭ ގޮތުން ފައިސަލް ވިދާޅުވީ، އެމްޑީޕީ އަށް އަބަދުވެސް އެންމެ ރަނގަޅު ގޮތަކީ ދެ ރައީސުން އެކުގައި މަސައްކަތް ކުރުން ކަމަށެވެ. އެ ވަގުތަކު އޮންނަ ސަރުކާރެއް ޒިންމާދާރު ކުރުވުމުގައި އެންމެ މުހިންމު ދައުރެއް އަބަދުވެސް އަދާކުރަނީ އެމްޑީޕީ އިން ކަން ފާހަގަކުރައްވާ ފައިސަލް ވިދާޅުވީ، ދެ ރައީސުން ގެ މި ނިންމެވުމުން ސަރުކާރު ޒިންމާދާރު ކުރުވުމަށް ހުރިހާ ފަރާތްތަކަށް ވެސް ވަރަށް ބޮޑު ހިއްވަރެއް ލިބިއްޖެ ކަމުގަ އެވެ.
