ކުރީގެ ނައިބު ރައީސް ފައިސަލް ނަސީމް ވިދާޅުވީ ރާއްޖޭގައި އޮތީ ތިން ބާރު ވަކިވެފައިވާ ނިޒާމެއް ކަމަށާއި ވެރިއަކު އެހެން ބާރުތަކަށް ނުފޫޒު ފޯރުވުމާއި ހިތަށް އެރިހާ ގޮތަކަށް ޤާނޫނު ބަދަލު ކުރުމަކީ ރަނގަޅު ގޮތެއް ނޫން ކަމަށް.
ކުރީގެ ނައިބު ރައީސް ފައިސަލް ނަސީމް ރާއްޖެ ޓީވީގެ ފަލަސުރުހީ ޕްރޮގްރާމްގައި ވާހަކަދައް
ދައުލަތުގެ ސިފަ ހިފަހައްޓާނީ ވެރިމީހާ ކަމަށާއި ވެރިކަމުގެ އެންމެ މަތީ މީހާ ވެރިކަން ކުރާ ގޮތުން ގެއްލެނީ ކަންކަމުގެ ސީރިއަސްކަން ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެ އެވެ.
ފައިސަލް އެފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.
ފައިސަލް ވިދާޅުވީ ރާއްޖޭގައި އޮތީ ތިން ބާރު ވަކިވެފައިވާ ނިޒާމެެއް ކަމަށާއި ވެރިއަކަށް ހުންނަ މީހާ އެހެން ބާރުތަކަށް ނުފޫޒު ފޯރާ ގޮތަށް ކަންކަން ކުރުމަކީ ރަނގަޅު ގޮތެއް ނޫން ކަަމަށެވެ. މީގެ އިތުރުން، ހިތަށް އެރީމަ ހިތަށް އެރިހާ ގޮތަކަށް ޤާނޫނުތައް ބަދަލުކުރުމަކީ އާއްމުންގެ އިތުބާރު ގެއްލޭ ކަމެއް ކަމަށާއި އެކަމުން ވާނެ ފައިދާ އެއް ވެސް ނެތް ކަމަށް ފައިސަލް ވިދާޅުވި އެވެ. ސަރުކާރުން ނުކުރާނެ ކަމަށް ބުނާ ކަންކަން ކުރުމުން، ރާއްޖޭގައި ބިރުވެރިކަން އުފެދޭ ކަމަށް ފައިސަލް ވިދާޅުވި އެވެ. އިދިކޮޅު ފަރާތްތައް ރަށްރަށަށް ދިއުމުން ބައްދަލުކޮށްލަން ވެސް އާއްމުން ބިރު ގަންނަ ހާލަތަށް ކަންކަން ގޮސްފައިވާ ކަމަށް ފައިސަލް ވިދާޅުވި އެވެ.
"ދައުލަތެއްގެ ސިފަ އޮންނަން ވާނެ ދައުލަތެއް ވެއްޖެއްޔާ. އެ ސިފަ ދަމަހައްޓާނީ ވެރިން. ކޮންމެވެސް ކަހަލަ ހަރުދަނާ ކަމެއް ހުންނަން ޖެހޭނެ. ހިތު ހުރި ގޮތަކަށް ދުވާލަކު ގޮތަަކަށް ކަންކަން ކުރާ ނަމަ ރައްޔިތުންގެ ކުރިމަތީގައި މާ ބޮޑު އަގެއް ނުހުންނާނެ." ފައިސަލް ވިދާޅުވި އެވެ.
ސަރުކާރަށް ރައްޔިތުންގެ އިތުބާރު ނުލިބެނީ ސަރުކާރު ވެރިކަމަށް އަންނަން ވެފައިވާ ވައުދުތައް ވެސް ނުފުދުމުން ކަމަށް ފައިސަލް ވަނީ ވިދާޅުވެފަ އެވެ. އިތުބާރު ޤާއިމް ކުރެވޭނީ ކުރާނެ ކަމަށް ބުނާ ކަންކަން ކުރާ ކަން ފެނި، އެ އާދަ ދެމެހެއްޓުމުން ކަަމަށް ފައިސަލް ވިދާޅުވި އެވެ. މީގެ އިތުރުން، މަޝްރޫޢުތައް މަޑު ޖެހިފައި ހުންނަ މަންޒަރު ފެނުމަކީ ވަރަށް ދެރަވަރު ކަމެއް ކަމަށް ފައިސަލް ވިދާޅުވި އެވެ.
"ބައެއް ރަށްރަށުގައި ދެރަވެސް ވޭ. އެައް ފަހަރު ފަށާފައި، އަނެއް ފަހަރު ފަށާފައި، އަނެއްކާ ވަރަށް ބައިވަރު ޚަރަދުތަކެއް އެބަ ކުރޭ ކޮންމެ މަޝްރޫޢު އެއް ފެށުމަށް. ބޮޑެތި އެތައް ޚަރަދުތަކެއް. ސޮއިކުރުމަށް ބާއްވާ ރަސްމިއްޔާތުގައި ވަރަށް ކުލަ ގަދަކޮށް ހެޑްލައިންތަކެއް އެބަ ހަދާ." ފައިސަލް ވިދާޅުވި އެވެ.
ސަރުކާރު ހިންގާ ވެރިންގެ ވާހަކަ އާއި އަމަލާއި ދިމާ ނުވުމަކީ ސަރުކާރުގެ އިތުބާރު ގެއްލޭ ސަބަބެއް ކަމަށް ވެސް ފައިސަލް ވަނީ ވިދާޅުވެފަ އެވެ. އެ ހިސާބުން ލިބެނީ ގޯސް މެސެޖެއް ކަަމަށް ފައިސަލް ވަނީ ވިދާޅުވެފަ އެވެ.
