ވަޖްޕާއީ ގެންގުޅުއްވި ޑިޕްލޮމަސީ ވިސްނުމުގެ ސަބަބުން ރާއްޖެ އާއި އިންޑިއާ އާ ދެމެދު އޮތް ވަރުގަދަ ގުޅުމަށް އަދިވެސް ހެޔޮ އަސަރުކުރޭ: ފައިސަލް ނަސީމް
ރާއްޖޭގެ ކުރީގެ ނައިބު ރައީސް ފައިސަލް ނަސީމް ނިއު ދިއްލީގައި ބޭއްވި އަށްވަނަ އަތަލް ބިހާރީ ވަޖްޕާއީ މެމޯރިއަލް ލެކްޗަރުގައި ވާހަކަފުޅު ދައްކަވައި، ވަޖްޕާއީ ގެ ލީޑާޝިޕާއި ޑިޕްލޮމަސީ ވިސްނުމުން ރާއްޖެ އާއި އިންޑިއާ އާ ދެމެދު އޮތް ގުޅުމަށް އަދިވެސް އަސަރުކުރަމުންދާކަން ފާހަގަކުރެއްވި. 1988 ވަނަ އަހަރު ރާއްޖޭގެ ސިޔާދަތަށް ދިމާވި ނުރައްކާތެރި ހާލަތުގައި އިންޑިއާ އިން ފޯރުކޮށްދިން އެހީތެރިކަމާއި، 2002 ގައި ވަޖްޕާއީ ހޮސްޕިޓަލިޓީ އެންޑް ޓޫރިޒަމް ފެކަލްޓީ ގާއިމްކުރުމަށް ދެއްވި އެހީތެރިކަން ފައިސަލް ފާހަގަކުރެއްވި.
އިންޑިއާ ގެ ވެރިރަށް ނިއު ދިއްލީގައި ޑިސެމްބަރު 24، 2025 ގައި ބޭއްވި އަށް ވަނަ އަތަލް ބިހާރީ ވަޖްޕާއީ މެމޯރިއަލް ލެކްޗަރ ގައި، ރާއްޖޭގެ ކުރީގެ ނައިބް ރައީސް ފައިސަލް ނަސީމް ވާހަކަ ދައްކަވަނީ
އިންޑިއާ ގެ ކުރީގެ ބޮޑުވަޒީރު އަތަލް ބިހާރީ ވަޖްޕާއީ އަކީ ސަރަހައްދީ ސުލްހަވެރިކަމާއި ޑިމޮކްރަސީ ގެ އުސޫލުތަކަށް ފުރިހަމަ ހިތްވަރު ދެއްވި ލީޑަރެއް ކަމަށް، ރާއްޖޭގެ ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެ އެވެ.
ފައިސަލް މިފަދައިން ވިދާޅުވީ، އިންޑިއާ ގެ ވެރިރަށް ނިއު ދިއްލީގައި ޑިސެމްބަރު 24، 2025 ގައި ބޭއްވި އަށް ވަނަ އަތަލް ބިހާރީ ވަޖްޕާއީ މެމޯރިއަލް ލެކްޗަރ ގައި ވާހަކަ ދައްކަވަމުންނެވެ.
ވަޖްޕާއީ ގެ ލީޑާޝިޕް އުސްލޫބާއި ގެންގުޅުއްވި ޑިޕްލޮމަސީ ވިސްނުމުގެ ސަބަބުން ރާއްޖެ އާއި އިންޑިއާ އާ ދެމެދު އޮތް ވަރުގަދަ ގުޅުމަށް އަދިވެސް ހެޔޮ އަސަރުކުރަމުންދާ ކަމަށް ފައިސަލް ފާހަގަކުރެއްވި އެވެ. ވަޖްޕާއީ ސުލްހަ ދެކެވަޑައިގަތީ ހަމައެކަނި ނަޒަރިއްޔާއެއްގެ ގޮތުގައި ނޫންކަމަށާއި، އެއީ ކަންތައްތައް ހިފެހެއްޓުމާއި ވާހަކަ ދައްކައި ހައްލު ހޯދުމާއި މުއައްސަސާ ތަކަށް އިހްތިރާމް ކުރުމުގެ މަގުން، ހާސިލްކުރެވޭނެ އަމަލީ އުސޫލެއްގެ ގޮތުގައި ކަމަށް ފައިސަލް ނަސީމް ވިދާޅުވި އެވެ. އިދިކޮޅު ފަރާތެއްގެ ގޮތުގައި ގިނަ އަހަރުތަކެއް ހޭދަކުރެއްވި ނަމަވެސް، ވަޖްޕާއީ ޑިމޮކްރަޓިކް މުއައްސަސާތަކަށް ފުރިހަމަ އިހްތިރާމްކުރެއްވި ކަމަށާއި، ސަރުކާރު ގައި ރައްޔިތުންގެ ބައިވެރިވުމާއި އެއްބައިވަންތަކަން މުހިންމުކަން ފާހަގަކުރައްވައި "ކޯލިޝަން ދަރުމާ" ގެ ފަލްސަފާ ތައާރަފް ކުރެއްވި ކަމަށް ފައިސަލް ވިދާޅުވި އެވެ.
ފައިސަލް ފާހަގަކުރެއްވި ގޮތުގައި 1988 ވަނަ އަހަރު ރާއްޖޭގެ ސިޔާދަތަށް ދިމާވި ނުރައްކާތެރި ހާލަތުގައި އިންޑިއާ އިން ފޯރުކޮށްދިން އަވަސް އެހީތެރިކަމަކީ ދެ ގައުމުގެ ގުޅުމުގެ ބިންގާ އެވެ. ފައިސަލް ވިދާޅުވީ އިންޑިއާ އިން ރާއްޖޭގެ ހަމަޖެހުން އަލުން ގާއިމްކޮށް، އެއްވެސް ޝަރުތެއް ނެތި އެތަނުން ފަހަތަށް ޖެހުމުން އުފެދުނީ، ދިގު މުއްދަތަށް ދެމިހުރި އިތުބާރު ގެ ބިންގާއެ ކެވެ. 2002 ވަނަ އަހަރު ވަޖްޕާއީ މާލެ ވަޑައިގެން ފެކަލްޓީ އޮފް ހޮސްޕިޓަލިޓީ އެންޑް ޓޫރިޒަމް ސްޓަޑީޒް ގާއިމްކުރުމަށް އެހީތެރިވެވަޑައިގެންނެވި ކަން ފާހަގަކުރައްވައި، އެއީ ރާއްޖޭގެ އިންސާނީ ތަރައްގީއަށް އިންޑިއާ ދެއްވި އަހައްމިއްޔަތުކަން ދައްކުވައިދޭ ކަމެއް ކަމަށް ފައިސަލް ވިދާޅުވި އެވެ.
ކޯސްޓްގާޑް ހަރުދަނާ ކުރުމާއި، ކަނޑުގެ ރައްކާތެރިކަން ބެލެހެއްޓުމާއި، ހައިޑްރޮގްރަފިކް އެހީތެރިކަމާއި، ރާއްޖޭގެ ކަނޑު ގެ ރައްކާތެރިކަން ދެމެހެއްޓުމަކީ ދެ ގައުމުގެ ގުޅުމުގެ މުހިންމު ބައެއްކަމަށް ފައިސަލް ވިދާޅުވި އެވެ. ހިންދު ކަނޑުގެ މުހިންމު ކަނޑު މަގުތަކުގެ މެދުގައި އޮންނަ ދިވެހިރާއްޖެއަށް، ކަނޑުގެ ރައްކާތެރިކަމަކީ އިގްތިސާދާއި ގުޅުންތެރިކަމާއި ތިމާވެށީގެ ސަލާމަތަށް ވަރަށް މުހިންމު ކަމެއް ކަމަށް ފައިސަލް ވިދާޅުވި އެވެ.
އިންޑިއާ ގެ ވެރިރަށް ނިއު ދިއްލީ ގައި ބޭއްވި އަށް ވަނަ އަތަލް ބިހާރީ ވަޖްޕާއީ މެމޯރިއަލް ލެކްޗަރ ޝަރަފްވެރި ކޮށްދެއްވީ ރާއްޖޭ ގެ ކުރީގެ ނައިބު ރައީސް ފައިސަލް ނަސީމް އެވެ. މިއީ މިއަދުގެ ސަރުކާރު ވެރިކަމުގައި އޮތް ނަމަވެސް، ކުރީގެ ސަރުކާރާއި އިންޑިއާ އާއި އޮތް ގާތް ގުޅުން ރަމްޒުކޮށްދޭ ކަމެކެވެ.
އަތަލް ބިހާރީ ވަޖްޕާއީ މެމޯރިއަލް ލެކްޗަރ ޝަރަފްވެރިކޮށްދެއްވުމަށް ކޮންމެ އަހަރަކުވެސް ވަޑައިގަންނަވަނީ ގައުމު ތަކުގެ ރައީސުންނާއި އަދި ނައިބް ރައީސުން ފެންވަރުގެ ބޭފުޅުންނެ އެވެ.
