ސަރުކާރެއް އޮތުމުގެ ބޭނުމަކަށް ވަނީ ރައްޔިތުންނަށް ބޭނުންވާ ބޮޑެތި ކަންކަން ފޯރުކޮށްދިނުން ކަމަށާއި މިސަރުކާރުން ވެސް ހުއްޓިފައިވާ އަސާސީ ޙިދުމަތްތަކުގެ މަޝްރޫއު ކުރިއަށް ގެންގޮސް ކަންކަން ހައްލުކޮށްދޭންޖެހޭ ކަމަށް ކުރީގެ ނައިބް ރައީސް ފައިސަލް ނަސީމް ވިދާޅުވެއްޖެ އެވެ.

އޮޅުވެލިފުށި އެކުވެލި ހިޔާ ހުޅުވުމުގެ ރަސްމިއްޔާތުގައި ބައިވެރިވެވަޑައިގެން ވާހަކަފުޅުދައްކަވަމުން، ކުރީގެ ނައިބް ރައީސް ފައިސަލް ވިދާޅުވީ އެކުގައި ގިނަ ބަޔަކު ގުޅިގެން ކުރާ މަސައްކަތުގެ ނަތީޖާ ރަނގަޅުވާނެ ކަމަށާއި އޮޅުވެލިފުށި އެކުވެލި ހިޔާ އަކީވެސް އެކަމުގެ ހެއްކެތް ކަމަށެވެ.

އެކުވެލި ހިޔާ އަކީ ރަށުގެ ތަރައްޤީއާއި ކުޅިވަރާއި، އިޖްތިމާއީ ކަންތައްތަކަށް ބޭނުންވާ ވަރަށް ރަނގަޅު ތަނެއްކަން ފާހަގަކުރަމުން ފައިސަލް ވިދާޅުވީ ކައުންސިލްތަކަށް މިފަދަ ތަންތަން ތަރައްޤީ ކުރުމުގެ ބާރު ދީފިނަމަ، މާރަނގަޅަށް އެރަށަކަށް ފިޓްވާ ގޮތަށް އެރަށެއްގެ ރައްޔިތުން ބޭނުންވާ ގޮތަށް ކަންކަން ނިންމާނެ ކަމަށެވެ. މިކަން ރާއްޖޭގެ ކޮންމެ އަތޮޅަކަށް ބަލާލި ކަމުގައިވީ ނަމަވެސް މާރަނގަޅަށް ވެސް ފެންނަމުންދާ ކަމަށް ފައިސަލް ވިދާޅުވި އެވެ.

އަދި އޮޅުވެލިފުށީގެ ކަންތައްތަކަށް ބަލާލާއިރު ކައުންސިލަށް ބާރު ލިބިފައި އޮތުމުގެ މުހިއްމުކަން މާބޮޑަށް ސާފުވާ ކަމަށާއި، މިފަދަ ހިޔާއެއް ބެލެނިވެރިންނަށް، އަދި އެނޫންވެސް އެކިއެކި ފަރާތްތަކަށް އެބޭނުންޖެހޭއިރު، ލިބެން އޮތުމަކީ ވަރަށް މުހިއްމު ކަން ފާހަގަކުރައްވަމުން މިއީ ތައުލީމަށްޓަކައި ކުރެވުނު މުހިއްމު މަސައްކަތެއްގެ ގޮތުގައި ފައިސަލް ސިފަކުރެއްވި އެވެ.

ރަނގަޅު ދަރިން އުފެދެނީ ހަމަ އެކަނި ސަރުކާރުން ކުރާ މަސައްކަތަކުން ވެސް ނޫން ކަމަށާއި މުޅި ޖަމާއަތް ގުޅިގެން ކުރެވޭ މަސައްކަތުން، ތަރައްޤީ ހާސިލް ކުރެވޭނެ ކަމަށް ވިދާޅުވަމުން، ރަނގަޅު ޖީލެއް ބިނާ ކުރެވެނީ ހަމައެކަނި މައިންބަފައިންގެ މުދައްރިސުންނާއި، ސްކޫލުތަކުގައި ތައުލީމް އުނގަންނައިދޭން ތިބޭ ފަރާތްތަކުގެ މަސައްކަތަކުންވެސް ނޫން ކަމަށްވާއިރު މިއީ މުޅި މުޖުތަމައު، އޭގެ ބައިވެރިވެގެން ކުރެވޭނެ މަސައްކަތެއް ކަމަށް ވިދާޅުވި އެވެ.

ނިމިދިޔަ ސަރުކާރުގައިވެސް އަޅުގަނޑުމެން ދެއްކި އެއް ވާހަކަ އަކީ އިޖުތިމާއީ މައްސަލަތައް ހުރި ވާހަކައާއި، ތައުލީމް ފުޅާ ކުރަންޖެހޭ ވާހަކަ އާއި ރަނގަޅު ދަރިންތަކެއް އުފައްދަން ޖެހޭ ވާހަކަ ކަމަށްވާއިރު، މިއީ ހަމަ އެކަނި ސަރުކާރުން މަސައްކަތްކޮށްގެން ވެސް ވާނެ ކަމެއް ނޫން ކަމަށް ފައިސަލް ތަކުރާރުކުރެއްވި އެވެ.

އަދި ހަމައެކަނި އިމާރާތެއް ހުރުމަކުން ނުފުދޭ ކަމަށާއި ބޭނުންވާ ވަސީލަތްތަކާއި، ތަމްރީން ލިބެން ޖެހޭއިރު، ދުނިޔެއަށް އަންނަ ބަދަލުތަކާއި ގުޅިގެން ކަންކަން ދަސްކުރަންޖެހޭ ކަން މިއީ ވިސްނާލަން ޖެހޭ ކަމެއް ކަމަށްވެސް ފައިސަލް ވިދާޅުވި އެވެ.

އަދި އެއް ދަންފަޅިއަށް ސްކޫލުތަކުގެ ވަށާ ޖެހޭ ތައުލީމް ބައްޓަން ވެގެން ދިއުމަކީ ކުދިންނަށް ވަރަށް ގިނަ ކަންކަން ދަސްގެވެގެންދާނެ ކަމެއްކަން ފާހަގަކުރައްވަމުން، ނިމިދިޔަ ސަރުކާރުން އޮޅުވެލިފުށީ ސްކޫލުގައި ތަރައްޤީ ކުރަން ފަށާފައިވާ 10 ކްލާސްރޫމުގެ މަސައްކަތް ނުނިމި ހުރުމުގެ ކަންބޮޑުވުން އެބައޮތް ކަމަށް ފައިސަލް ވިދާޅުވި އެވެ.

އެހެންކަމުން މިފަދަ ކަންކަމަށް ކޮންމެ ސަރުކާރަކުންވެސް ހާއްސަ ސަމާލުކަމެއް ދޭން ޖެހޭއިރު އަސާސީ ޙިދުމަތްތައް ރައްޔިތުންނަށް އެކަށީގެންވާ ގޮތުގައި ވިހާވެސް އަވަހަކަށް ލިބުދިނުމަށް ކޮންމެ ސަރުކާރަކުންވެސް މަސައްކަތް ކުރުމަކީ މުހިއްމު ކަމެއް ކަމަށް ފައިސަލް ވިދާޅުވި އެވެ.