ދީފައި އޮތް ތަނަކުން ގޯތި ދެއްވާނެ ކަމަށް މުއިއްޒު ވީ ވައުދާ ޚިލާފަށް ގިރާވަރު ފަޅުން ދޭން ނިންމާފައި އޮތް 1،114 ގޯތި ގުޅީފަޅަށް ބަދަލުކުރަނީ

އެމީހަކަށް ގޯތި ދީފައި އޮތް ތަނަކުން ދީފައި އޮތް މިންވަރަކަށް ގޯތި ދެއްވާނެ ކަމަށް ރައީސް މުހައްމަދު މުއިއްޒު ވީ ވައުދާ ޚިލާފުވެ ގިރާވަރުފަޅުން ދޭން ނިންމި 1،114 ގޯތި ގުޅީފަޅަށް ބަދަލުކުރާ ގޮތަށް ސަރުކާރުން ހަމަ ޖައްސައިފި އެވެ.

ގޯތިތައް ބަދަލުކުރުމުގެ މަސައްކަތް ކުރަމުން އަންނަ ކަން އިއުލާނު ކުރެއްވީ ހައުސިން މިނިސްޓަރު ޑރ. އަބްދުﷲ މުއްތަލިބު އާދިއްތަ ދުވަހު ރައީސް އޮފީހުގައި ބޭއްވި ނޫސް ކޮންފަރެންސެއްގަ އެވެ.

ރައީސް މުއިއްޒު ގެ ސަރުކާރުން މި ގޮތަށް ނިންމި އިރު ރައީސް ސޯލިހް ގެ ސަރުކާރުން ވަނީ ގިރާވަރު ފަޅުން 5،186 ގޯތި ދޭން ނިންމާފައެވެ. އަދި ގޯތި ތައް ލިބޭ ފަރާތްތަކަށް އެކަން އޮތީ އަންގާފަ އެވެ.

އެހެން ނަމަވެސް މި ސަރުކާރުން ގިރާވަރުފަޅުގެ ލޭންޑް ޔޫސް ޕްލޭނަށް ބަދަލު ގެނެސް 4072 ގޯތި ނެގޭ ގޮތަށް ހަދާ ޕްލޭނަށް ގެނައި ބަދަލު ގެޒެޓް ކުރުމަށް ތައްޔާރު ވެފައިވާ ކަން ހާމަ ކުރައްވަމުން މުއްތަލިބު އިތުރަށް ވިދާޅުވި ގޮތުގައި ސަރުކާރުން ގޯތިތައް ގުޅީފަޅަށް ބަދަލު ކުރަން ނިންމި ސަބަބަކީ، ގިރާވަރުފަޅުގައި އެންމެ އެކަށީގެންވާ ވަރަށް ދިރިއުޅުމުގެ މާހައުލު ގާއިމުވެފައި އޮތް ކަމަށް ގަބޫލު ނުކުރެވޭތީ ކަމަށެވެ.

ކުރީ ސަރުކާރުން 160 ހެކްޓަރުގެ ބިން ހިއްކައިގެން ގިރާވަރު ފަޅުން ގޯތި ދިނުމަށް ނިންމާ ސަރުކާރު ބަދަލުވި އިރު 50 ހެކްޓަރަށް ވުރެ ބޮޑު ސަރަހައްދެއް އޮތީ ހިއްކާ ނިންމާފައެވެ. 

މިހާރު ހިއްކުން ހުއްޓިފައި އޮތް ގިރާވަރުފަޅުން ގޯތި ލިބުނު މީހުންގެ މެދުގައި ޖެނުއަރީ މަހު ގުރުނެގުން ބާއްވާނެ ކަމަށާއި ކުރިއަށް އޮތް ހަމަސް ދުވަހުގެ ތެރޭގައި ގޯތިތައް ހަވާލު ކުރާނެ ކަމަށާއި، ހުއްޓިފައި އޮތް ހިއްކުމުގެ މަސައްކަތް ހުޅުމާލެ ފޭސް ތިނެއް ހިއްކާ ނިމުމުން ފަށާނެ ކަމަށް ވެސް މުއްތަލިބު ވިދާޅުވި އެވެ. އަދި ބިން ހިއްކާ ނިމެމުންދާ ވަރަކަށް ގޯތީގެ ރަޖިސްޓަރީ ހަވާލުކުރުމުގެ މަސައްކަތް ކުރާނެ ކަމަށް ވިދާޅުވި އެވެ.

ރައީސް އިބްރާހިމް މުހައްމަދު ސޯލިހުގެ ސަރުކާރުން އޮތީ ހުޅުމާލެ ފޭސް ދޭކާއި އަލަށް ހިއްކާ ހުޅުމާލޭ ފޭސް ތިނަކާއި ގުޅިފަޅާއި ގިރާވަރުފަޅުން ޖުމްލަ 9،000 ގޯތި ދޭން ނިންމައިފަ އެވެ.

މިއަހަރުގެ އޭޕްރީލް މަހުގެ 20 ވަނަ ދުވަހު ގުޅީފަޅާއި ގިރާވަރުފަޅު އަދި ހުޅުމާލެ ފޭސް 3 ހިއްކުމުގެ މަސައްކަތް ކުރިއަށް ގެންދާ ގޮތް ރައީސް ޑރ. މުހައްމަދު މުއިއްޒު ބައްލަވާލައްވައި އެ ހުރިހާ މަސައްކަތެއްގެ ސްޕީޑް އަވަސް ކުރައްވާނެ ކަމުގެ ޔަގީންކަން ދެއްވަމުން ވިދާޅުވީ ގިރާވަރުފަޅުން ހިއްކަން، ބާކީ އޮތް 113 ހެކްޓަރުގެ ބިން ހިއްކުމުގެ މަސައްކަތް އެދުވަހު ފެއްޓެވީ ކަމަށާއި ގިނަ ވެގެން ގިނަވެގެން 10 މަސް ދުވަހު ތެރޭގައި މަސައްކަތް ނިންމަވާނެ ކަމަށެވެ. އޭގެ އިތުރުން ގިރާވަރު ފަޅުން ހިއްކާ ބިމުގައި މަގު ހެދުމާއި ފެނާއި ކަރަންޓުގެ ނިޒާމު ގާއިމްކުރުމުގެ މަސައްކަތް ޖުލައި މަހު ބަޔަކާ ހަވާލު ކޮށްގެން ފަށާނެ ކަމަށެވެ.

މަޝްރޫއުތައް ކުރިއަށް ދާ ގޮތް ބައްލަވާލެއްވުަމަށްފަހު މުއިއްޒު ވިދާޅުވީ، އެމަނިކުފާނު "ބޭނުންވަނީ ރާއްޖޭގެ ރައްޔިތުންނަށް ފައިދާވާ މި ކަހަލަ ހުރިހާ މަޝްރޫއުތަކަކީ ކުރިއަށް ވުރެ މާ ބާރު ސްޕީޑުގައި ކުރިއަށް ދާ، އޭގެ ނަތީޖާ މާ ރަނގަޅަށް ނެރެދޭ، ރަނގަޅު މަޝްރޫއުތަކެއް،" ގެ  ގޮތުގައި ހެއްދެވުން ކަމުގައެވެ.

އޭގެ އިތުރުން "މާލޭގެ ރައްޔިތުން، މާލޭގައި ދިރިއުޅޭ ރައްޔިތުން ހިމެނޭހެން މި ފަސް އަހަރުގެ ތެރޭގައި ގޯއްޗެއް ނުލިބޭ، ގެދޮރެއް ނުލިބޭ އެކަކު ވެސް ނުހުންނާނެ،" ކަމަށް ވެސް މުއިއްޒު އެ ދުވަހު އޮތީ ވިދާޅުވެފަ އެވެ.