އެކަނިވެރި މައިންނަށް ދޭ އިނާޔަތް ބޮޑުކުރިތާ 24 ގަޑިއިރު ވެސް ނުވަނީސް ކުޑަކޮށްފި

ދައުލަތުގެ ބަޖެޓުން އެކަނިވެރި މައިންނާއި ބަފައިންނަށް ދޭ އިނާޔަތް  15،000 ރުފިޔާ އާއި ހަމައަށް ދެވޭނެހެން ބުރާސްފަތި ދުވަހު ގަވާއިދަށް ގެނައި އިސްލާހު 24 ގަޑި އިރު ތެރޭ ބަދަލުކޮށް، އެންމެ ގިނައިން އެ އިނާޔަތް ދެވޭ އަދަދު 12،000 ރުފިޔާ އަށް ކުޑަކޮށްފި އެވެ.

މި ބަދަލު ގެނައިކަން އިއުލާންކޮށް ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ހުކުރު ދުވަހު ވަނީ، ގަވާއިދަށް ގެނައި މި އިސްލާހު ގެޒެޓުކޮށްފަ އެވެ.

މީގެ ހަ އަހަރުކުރިން، އެކަނި ދަރިން ބަލަހައްޓާ މަޔަކަށް ނުވަތަ ބަފަޔަކަށް ދައުލަތުން ދޭ މާލީ އެހީ ވަނީ، 3،000 ރުފިޔާއިން 10،000 ރުފިޔާ އާ ހަމައަށް އިތުރުކޮށްފަ އެވެ. ބުރާސްފަތި ދުވަހު އިސްލާހުކޮށް ގެޒެޓުކުރި ގަވައިދުގައިވާ ގޮތުން އެކަނިވެރި މައިންނަށާއި ބަފައިންނަށް ގިނަވެގެން ދޭ ފައިސާގެ އަދަދު ވަނީ 15،000 ރުފިޔާއަށް ބޮޑުކޮށްފަ އެވެ. އެއީ އަހަރެއްގެ މައްޗަށް 180،000 ރުފިޔާ އެވެ.

ބުރާސްފަތު ދުވަހު ގެނެވުނު ބަދަލާއެކު ކުރިން މަހެއްގެ މައްޗަށް ހަތަރު ކުދިންނާއި ހަމައަށް ކޮންމެ ކުއްޖަކަށް ދެމުން އައި އިނާޔަތް ވަނީ 3،000 ރުފިޔާ އަށް ބޮޑުވެފަ އެވެ. ހަތަރަކަށް ވުރެ ގިނަ ކުދިން ތިބި ބެލެނިވެރިއެއް ނަމަ އިތުރުވާ ކޮންމެ ކުއްޖަކަށް ދޭނީ 1،000 ރުފިޔާ އެވެ. ނަމަވެސް ހުކުރު ދުވަހު ގެނައި ބަދަލާއެކު ހަތަރު ކުދިންނަށްވުރެ ގިނަ ކުދިން ތިބި ނަމަވެސް އިތުރު ފައިސާއެއް ނުލިބޭނެ އެވެ. އިނާޔަތުގެ ގޮތުގައި ލިބޭނީ ހަތަރު ކުދިންނަށް، ކޮންމެ ކުއްޖަކަށް 3،000 ރުފިޔާގެ ރޭޓުން، ގިނަވެގެން 12،000 ރުފިޔާ އެވެ. 

ރައީސް މުއިއްޒު މި ވަނީ  އެކަނިވެރި މައިންނަށް މަހެއްގެ މައްޗަށް ދެވޭ އެންމެ ބޮޑު އަދަދު ބުރާސްފަތި ދުވަހު 15،000 ރުފިޔާ އަށް ބޮޑުކުރި ނަމަވެސް ހުކުރު އެ އަދަދު  12،000 ރުފިޔާ އަށް ކުޑަކޮށްފަ އެވެ. މިއާއެކު އަހަރެއްގެ މައްޗަށް ދޫކުރެވޭ އަދަދު 180،00 ރުފިޔާ އިން 144،000 ރުފިޔާ އަށް މި ވަނީ ކުޑަކޮށްފަ އެވެ.

2026 ވަނަ އަހަރުގެ ޖެނުއަރީ މަހުން ފެށިގެން އެކަނިވެރި މައިންނާއި ބަފައިންގެ އެލަވެންސް ބޮޑުކުރައްވާނެ ކަމަށް ރައީސް މުހައްމަދު މުއިއްޒު ވަނީ މިދިޔަ އޮކްޓޯބަރު މަހު އިއުލާން ކުރައްވާފަ އެވެ. އަދި އެ ފައިސާ އަންނަ އަހަރަށް ފާސްކުރި ދައުލަތުގެ ބަޖެޓުގައި ވެސް ވަނީ ހިމަނާފަ އެވެ. 

އެންސްޕާ އިން އެންމެ ފަހުން އާންމުކުރި ތަފާސްހިސާބުތަކުން ދައްކާ ގޮތުގައި، ފަގީރު ހާލަތުގައި އުޅޭ އެކަނިވެރި މައިން ނުވަތަ ބަފައިންގެ ތެރޭ 2،895 މީހަކު އެބަ ތިއްބެވެ. އަދި 4،940 ކުޑަކުއްޖަކަށް މާލީ އެހީތެރިކަން ދެމުން ގެންދެ އެވެ.