އިގްތިސާދީ ދަތިން އަރައިގަތުމަށް ސަރުކާރުން ރާވާފައިވާ ގޮތް ހާމަ ކުރުމަށް ރައީސް ނަޝީދު ގޮވާލައްވައިފި
ރައީސް ނަޝީދު ވިދާޅުވީ މި މަހުގެ ނިޔަލަށް ރާއްޖޭގެ ބޭރު ފައިސާގެ ރިޒާވްގައި ހުރީ 205 މިލިއަން ޑޮލަރު ކަމަށާއި 2026 އެޕްރީލްގައި ސުކޫކަށް އެކަނި 525 މިލިއަން ޑޮލަރު ދައްކަން ޖެހޭނެ ކަމަށް. ކްރެޑިޓް ރޭޓިންގ ދަށްވަމުންދާތީ އައު ބޮންޑެއް ވިއްކުން ދަތިވެދާނެ ކަމަށާއި ބޭރު ޤައުމަކުން އެހީ ހޯދާނަމަ އެކަން މިހާރު ކަށަވަރުވެފައި އޮންނަން ޖެހޭނެ ކަމަށް ނަޝީދު ވިދާޅުވި.
ރައީސް މުހައްމަދު ނަޝީދު
ރާއްޖެ އަށް ކުރިމަތިވެފައިވާ އިގްތިސާދީ ދަތިތަކުން އަރައިގަތުމަށް ސަރުކާރުން ރާވާފައިވާ ގޮތާއި ސްޓްރެޓަޖީ ތައް ހާމަ ކުރުަމަށް ރައީސް މުހައްމަދު ނަޝީދު ގޮވާލައްވައިފި އެވެ.
ބުރާސްފަތި ދުވަހު އެކްސް ގައި ކުރެއްވި ޕޯސްޓެއްގައި ރައީސް ނަޝީދު ވިދާޅުވީ، މިމަހުގެ ނިޔަލަށް، ރާއްޖޭގެ ބޭރު ފައިސާގެ ރިޒާވްގައި ހުރީ 205 މިލިއަން ޑޮލަރު ކަމަށާއި، 2026 ވަނަ އަހަރުގެ އެޕްރީލް މަހު ސުކޫކަށް އެކަނިވެސް 525 މިލިއަން ޑޮލަރު ދައްކަން ޖެހޭނެ ކަމަށެވެ.
މީގެ އިތުރުން، 2026 ވަނަ އަހަރު އަނބުރާ ދައްކަންޖެހޭ އެހެނިހެން ދަރަނިތައް ވެސް ހުރިކަން ފާހަގަކުރެވޭ ކަމަށާއި، އަދި، އެތެރެކުރާ މުދަލުގެ އަގުތައް ވެސް ދައްކަންޖެހޭނެކަން ފާހަގަ ކުރެއްވި އެވެ.
އޭގެ އިތުރުން ރައީސް ނަޝީދު ވިދާޅުވީ، ރާއްޖޭގެ ކްރެޑިޓް ރޭޓިންގ ދަށްވަމުންދާތީ، އައު ބޮންޑެއް ވިއްކުން ދަތިވެދާނެ ކަމަށެވެ.
"ބޭރުގެ ޤައުމަކުން އެހީއެއް ހޯދާނަމަ، އެކަން މިހާރު ކަށަވަރުވެފައި އޮންނަން ޖެހޭނެ،" ރައީސް ނަޝީދު ވިދާޅުވި އެވެ.
ރައީސް ނަޝީދު މިހެން ވިދާޅުވެފައިވާއިރު އަންނަ އަހަރު ރާއްޖޭގެ އިގްތިސާދުގެ ކުރި އެރުން ހިނގަމުންދާ އަހަރަށް ވުރެ ދައްވާނެ ކަން ވޯލްޑް ބޭންކުން ހާމަ ކޮށްފައިވާ މައުލޫމާތުން ދޭހަވެ އެވެ. އެ ބޭންކުން ބުނީ އަންނަ އަހަރު ރާއްޖޭގެ އިގްތިސާދު ކުރިއަރާނީ ލަފާކުރެވޭ ގޮތުގައި 3.9 ޕަސެންޓަށް ކަމަށެވެ. މިއަހަރަށް ލަފާ ކޮށްފައިވަނީ 4.2 އިންސައްތައިގެ ކުރި އެރުން ލިބޭނެ ކަމަށެވެ.
