އެމްޑީޕީ އިން ބާއްވާ ބޮޑު އެއްވުމުގައި ކޮރަޕްޝަނާ ދެކޮޅު އެންމެން ބައިވެރިވާން ނަޝީދު ގޮވާލައްވައިފި
ރައީސް މުއިއްޒުގެ ސަރުކާރުން ދުސްތޫރީ ނިޒާމު ހަލާކުކޮށް ގައުމު ލޫޓުވައިފިކަމަށް އެމްޑީޕީން ބުނޭ
އެމްޑީޕީ ޖަލްސާގައި ކުރީގެ ރައީސް މުހައްމަދު ނަޝީދު
ރައީސް މުހައްމަދު މުއިއްޒުގެ ސަރުކާރުން ދިވެހިރާއްޖޭގެ ދުސްތޫރީ ނިޒާމު މުޅިން ހަލާކުކޮށްލާ ގައުމު ލޫޓުވައިފި ކަމަށް ބުނެ، އެންމެ ބޮޑު އިދިކޮޅު ޕާޓީ، މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ބާއްވާ އެއްވުމަގައި ކޮރަޕްޝަނާ ދެކޮޅު އެންމެހާ ރައްޔިތުން ބައިވެރިވުމަށް ކުރީގެ ރައީސް މުހައްމަދު ނަޝީދު ގޮވާލައްވައިފި އެވެ.
މީގެ ތިން މަސްދުވަސް ކުރިން ޖޫން މަހުގެ 23 ވަނަ ދުވަހު އެމްޑީޕީއާ އަލުން ގުޅިވަޑައިގެންނެވި ކުރީގެ ރައީސް ނަޝީދުގެ ރަސްމީ އެކްސް އެކައުންޓުން ކުރެއްވި ޕޯސްޓެއްގައި ވިދާޅުވީ އަންނަ ހުކުރު ދުވަހުގެ މުޒާހަރާއަކީ ވަކި ޕާޓީއެއްގެ ކަމެއްގެ ގޮތުގައި ދެކެން ނުޖެހޭ ކަމަށާއި އެއީ ކޮރަޕްޝަނާ ދެކޮޅު އެންމެން ބައިވެރިވުން ރަނގަޅު މުޒާހަރާއެއް ކަމަށެވެ.
އެމްޑީޕީން އިންތިޒާމު ކުރާ މުޒާހަރާގައި ކޮރަޕްޝަނާ ދެކޮޅު އެންމެން ބައިވެރިވުން ރަނގަޅު ކަމަށް ނަޝީދު ވިދާޅުވި އިރު، ކޮރަޕްޝަން ހުއްޓުވުމަށާއި މަގާމުގެ ނުފޫޒާއި ބާރުގެ ބޭނުންކޮށްގެން ދައުލަތުގެ ހަޒާނާ އިން ވައްކަންކުރާ މައްސަލަތަކުގައި މަޝްވަރާކޮށް ފިޔަވަޅު އެޅުމަށް މަތީ ފެންވަރުގެ ކޮންފަރެންސަކަށް އެ މަނިކުފާނު ވަނީ ގޮވާލައްވާފަ އެވެ.
"ލޫޓުވައިފި ލޫޓުވައި" ނަމުގައި އެމްޑީޕީން އޮކްޓޯބަރު މަހުގެ 3 ވަނަ ދުވަހު މާލޭގައި ބާއްވާ ބޮޑު އެއްވުމަށް ތައްޔާރުވުމުގެ މަސައްކަތް އަންނަނީ ވަރަށް ފޯރިއާއެކު ކުރަމުންނެވެ. އެގޮތުން މާލެއާއި ހުޅުމާލޭގެ ބޮޑެތި މަގުތަކުގައި އެމްޑީޕީން އަންނަނީ ޕޯސްޓަރުތަކާއި ބެނާތައް ހަރުކުރަމުންނެވެ. އަދި މީގެ އިތުރުން ބޮޑު އެއްވުމަށް ތައްޔާރު ވުމުގެ ގޮތުން ސިލްސިލާ ގޮތެއްގައި މާލެ އާއި ހުޅުމާލޭގެ އެކި ސަރަހައްދުތަކުގައި ޕިކަޕް ޖަލްސާތައް ވެސް ބާާއްވަމުންދެއެވެ.
ރައީސް މުއިއްޒުގެ ސަރުކާރުން މިހާރު ފެންނަނީ ހުދުމުހުތާރު ވެރިކަމެއް ކުރެއްވުމަށްޓަކާ މަގުކޮށަމުންދާ މަންޒަރުކަމަށް ގިނަ ބަޔަކު ސިފަކުރެއެވެ. އަދި ސަރުކާރުގެ ދޯހަޅި ސިޔާސަތުތަކުގެ ސަބަބުން ދިވެހިރައްޔިތުން އިންތިހާއަށް ބިކަވެފައިވާ މި ދަނޑިވަޅުގައި ސަރުކާރު ޒިންމާދާރު ކުރުމުގެ ހަރަކާތްތައް ވަނީ އިތުރުވެފައެވެ. ރައީސް މުއިއްޒުގެ ސަރުކާރުން ދިވެހި ރައްޔިތުންނާއި މުޅި ގައުމު ނިކަމެތިކޮށްފި ކަމަށާއި، ގައުމު ހަމަ މަގަށް އެޅުވުމަށްޓަކައި، އަންނަ އޮކްޓޯބަރު 3، ގައި ރަށްރަށުން ވެސް މީހުން މާލެއަށް އަރައި، ސަރުކާރު ޖަވާބުދާރީކުރުވަން ހުރިހާ ރައްޔިތުން ނުކުތުމަށް ކުރީގެ ރައީސް އިބްރާހިމް މުހައްމަދު ސޯލިހު ވެސް ވަނީ ގޮވާލައްވާފަ އެވެ.
ރައީސް މުއިއްޒުގެ މިސަރުކާރު ޒިންމާދާރު ކުރުވާ ޖަވާބުދާރީ ކުރުވަން އިދިކޮޅު ހުރިހާ ސިޔާސީ ޕާޓީތަކަށް ކުރީގެ ރައީސް އަބްދުﷲ ޔާމީން ވެސް ވަނީ ދައުވަތުއަރުވާފަ އެވެ. އަދި ސަރުކާރު ހަމަމަގަށް އެޅުވުމަށްޓަކާ ހުރިހާ ސިޔާސީ ޕާޓީތަކާއެކު މަސައްކަތްކުރަން އަދާލަތު ޕާޓީ ތައްޔާރަށް އޮތްކަން އެޕާޓީގެ ރައީސް ޝެއިޚް އިމްރާން އަބްދުﷲ ވެސް ވިދާޅުވެފައިވެއެވެ.
