ރައީސް ސޯލިހު ގެ މި ދަތުރުފުޅަކީ ހިރިލަންދޫ ކައުންސިލް ގެ ޚާއްސަ ދައުވަތަކަށް ކުރައްވި ދަތުރުފުޅެއް. މި ދަތުރުފުޅު ގައި އެމަނިކުފާނު ވަނީ އެރަށު ކައުންސިލް އިން ޒަމާނީ ފެންވަރަށް ތަރައްގީ ކޮޮށްފައިވާ "ހިރިވެލި ބީޗް" ހޯމަ ދުވަހު ހަވީރު ހުޅުވައި ދެއްވާފަ.
ރައީސް ސޯލިހު ތ. ހިރިލަންދޫ އަށް ކުރެއްވި ދަތުރުފުޅުގެ ތެރެއިން
ކޮޅުމަޑުލު ހިރިލަންދޫ އަށް ކުރެއްވި ދަތުރުފުޅަށްފަހު ކުރީގެ ރައީސް އިބްރާހިމް މުހައްމަދު ސޯލިހު މާލެ ވަޑައިގެންފި އެވެ.
ރައީސް ސޯލިހު ގެ މި ދަތުރުފުޅަކީ ހިރިލަންދޫ ކައުންސިލް ގެ ޚާއްސަ ދައުވަތަކަށް ކުރައްވި ދަތުރުފުޅެކެވެ. ރައީސް ސޯލިހު ހޯމަ ދުވަހު މެންދުރު ހިރިލަންދޫ އަށް ވަޑައިގެންނެވި އިރު އެމަނިކުފާނަށް ވަނީ އެރަށުން ހޫނު މަރުހަބާއެއް ދަންނަވާފަ އެވެ. ރައީސް ސޯލިހު އަށް މަރުހަބާ ދެންނެވުމަށް އެރަށު ގިނަ އަދަދެއްގެ ރައްޔިތުންވަނީ ބަނދަރަު ސަރަހައްދަށް ޖަމާވެފަ އެވެ.
މި ދަތުރުފުޅު ގައި ރައީސް ސޯލިހު ވަނީ ތ. ހިރިލަންދޫ ކައުންސިލް އިން ޒަމާނީ ފެންވަރަށް ތަރައްގީ ކޮޮށްފައިވާ "ހިރިވެލި ބީޗް" ހޯމަ ދުވަހު ހަވީރު ހުޅުވައި ދެއްވައިފަ އެވެ.
ރައީސް ސޯލިހު ގެ މި ދަތުރުފުޅު ގައި ހިރިލަންދޫ އެމްޑީޕީ ސަޕޯޓަރުންނާއި ބައްދަލުކުރައްވާ ކުރިޔަށް އޮތް ލޯކަލް ކަައުންސިލް އިންތިހާބަށް ތައްޔާރުވުމާ ގުޅޭ މަޝްވަރާތައް ކުރައްވާފައިވެ އެވެ.
މީގެ އިތުރުން ރައީސް ސޯލިހު ވަނީ ހިރިލަންދޫގެ ބައެއް އިސްރައްވެހިންނަށް ޒިޔާރަތް ކުރައްވާ ވަގުތު ކޮޅެއް ހޭދަ ކުރައްވާފަ އެވެ.
ރައީސް ސޯލިހު ގެ ވެރިކަމުގައި ހިރިލަންދޫ ގައި ތަރައްގީގެ ގިނަ މަސައްކަތްތަކެއް ފައްޓަވައި ނިންމަވާފައިވެ އެވެ. އެގޮތުން އެރަށުގެ ފެނާއި ނަރުދަމާ ޤާއިމުކުރުން، ފެނަކަ އައު އޮފީހެއް އިމާރާތްކުރުން، ހިރިލަންދޫ އައު އިންޖީނުގެ އިމާރާތްކުރުމުގެ މަސައްކަތް ފެށުމާއި އިންޖީނުގެ އަށް 1000 ކިލޯވޯޓުގެ 2 ޖެނެރޭޓަރ ސެޓް ފޯރުކޮށްދިނުން، ސޯލާ ޕީވީ ނިޒާމު ގާއިމުކުރުން ހިމެނެ އެވެ.
ކުޑަކުދިންނަށް ހިތްގައިމު ޕާކަކާއި ޒުވާނުންނަށް ފުޓްސަލް ދަނޑަކާއި ވޮލީ ކޯޓެއް ހިރިލަންދޫ ގައި ރައީސް ސޯލިހު ގެ ވެރިކަމުގައި ތަރައްގީ ކޮށްދީފައިވެ އެވެ. ނިމިދިޔަ އެމްޑީޕީގެ ވެރިކަމުގައި ހިރިލަންދޫ ގައި އައުޓްޑޯރ ޖިމެއް ވެސް ވަނީ ގާއިމްކޮށްފަ އެވެ.
މަސްވެރިކަން ފުޅާ ދާއިރާއެއް ގައި ކުރާ، ހިރިލަންދޫ ހުޅަނގު ދެކުނުން 15 މޭލު ބޭރުގައި އެމްޑީޕީ ސަރުކާރުން ވަނީ އޮއިވާލި ކަނދުފައްޗެއް އަޅާފަ އެވެ.
މީގެ އިތުރުން ރައީސް ސޯލިހު ގެ ވެރިކަމުގައި ހިރިލަންދޫ ސްކޫލަށް ދިމާވެފައިވާ ޖާގައި ގެ ދަތިކަން ހައްލުކުރުމުގެ ގޮތުން މަލްޓި ޕާޕަސް ހޯލަކާ އެކު 8 ކްލާސްރޫމް ހިމެނޭ 3 ބުރީގެ އިމާރާތުގެ މަސައްކަތް ވަނީ ފެށިފަ އެވެ. ނަމަވެސް ވެރިކަން ބަދަލުވުމާ އެކު މި މަޝްރޫއު ވަނީ ވަރަށް ބޮޑަށް މަޑުޖެހިފަ އެވެ.
ހިރިލަންދޫ ގައި ރައީސް ސޯލިހު ގެ ސަރުކާރުން ކުރެއްވި އެންމެ މުހިންމު ކަމެއްގެ ގޮތުގައި އެރަށު ރައްޔިތުން ފާހަގަކުރާ ކަމަކީ ރަށުގެ ބިން ހިއްކުމެވެ. އެމްޑީޕީ ސަރުކާރުން 2022 ވަނަ އަހަރު ފެއްޓެވި މި މަސައްކަތުގެ ބޮޑު ބައެއް ވެރިކަން ބަދަލުވި އިރު ވަނީ ނިމިފަ އެވެ.
ރައީސް ސޯލިހު ވަޑައިގެން ބޮޑު ހަފްލާއެއް ބާއްވާ ރިބަން ނުކެނޑިޔަސް އެމަނިކުފާނުގެ ވެރިކަމުގައި ހިރިލަންދޫ ގައި ވަނީ ސެލްފް ސަރވިސް ބޭންކިންގ އޭޓީއެމް ސެންޓަރެއް ހުޅުވާފަ އެވެ.
