ބޭންކް އޮފް މޯލްޑިވްސް (ބީއެމްއެލް) ގެ އިތުބާރު ގެއްލޭފަދަ އެއްވެސް ކަމެއް ކޮށްގެން ނުވާނެ ކަމަށް ކުރީގެ ރައީސް އިބްރާހިމް މުހައްމަދު ސާލިޙް ވިދާޅުވެއްޖެ އެވެ.
ބުދަ ދުވަހު ރައީސް ސާލިޙްގެ ރަސްމީ އެކްސް ގައި ކުރެއްވި ޕޯސްޓެއްގައި ވިދާޅުވެފައިވަނީ، ބީއެމްއެލް އަކީ ވަރަށް ގިނަ އާންމުންނާއި ވިޔަފާރިވެރިންގެ ދިރިއުޅުމާ ގުޅިފައިވާ ތަނެެއް ކަމަށާއި، އެއީ އަބަދުވެސް އެންމެންގެ ފުރިހަމަ އިތުބާރު އޮންނަންޖެހޭ ތަނެއް ކަމަށެވެ.
ރައީސް ސާލިޙް އިތުރަށް ވިދާޅުވެފައިވަނީ ސަރުކާރުން ވިޔަސް ބީއެމްއެލްއަށް އޮތް އިތުބާރު ގެެއްލޭފަދަ އެއްވެސް ކަމެއް ކޮށްގެން ނުވާނެ ކަމަށާއި ބީއެމްއެލްއަށް ކުރާ އިތުބާރު ގެއްލިއްޖެނަމަ އެއީ މުޅި މުޖަތަމަޢަށް ލިބޭނެ ބޮޑު ދެރައެއް ކަމަށެވެ.
ރައީސް ސާލިޙް މިހެން ވިދާޅުވެފައި މިވަނީ، ރުފިޔާ ކާޑަށް ޑޮލަރު ނުލިބޭ ގޮތައް ބީއެމްއެލް އިން ނިންމި ނިންމުމާ ގުޅިގެން ސަރުކާރު ވައްޓާލަން އުޅުނު ކަމަށް ބަލާ، އެ މައްސަލައިގެ ތަހުޤީޤު ފުލުހުން ފަށަފައިވަނިކޮށެވެ.
ރުފިޔާ ކާޑުން ޑޮލަރު ނުލިބޭ ގޮތް ބީއެމްއެލް އިން ހެދުމާ ގުޅިގެން ސީދާ ބަޣާވާތެއް ހިންގަން އުޅުނު ކަމަށް ރައީސް ޑރ. މުހައްމަދު މުއިއްޒު ވެސް ވަނީ ވިދާޅުވެފައެވެ.
މީގެ އިތުރުން ބީއެމްއެލްގެ އިސް މަގާމުތަކަށް ރައީސް ޑރ. މުއިއްޒުގެ އަރިސް ސިޔާސީ ފަރާތްތައް އައްޔަން ކުރުމަަށް މަަސައްކަތް ކުރާ ކަމަށް ބުނެ އާންމުންގެ ފާޑު ކިޔުން ސަރުކާރަށް އިތުރުވެފައިވާކަން ފާހަގަ ކުރެވެއެވެ.
