މީހެއްގެ ވައިބަރ އެކައުންޓް ހެކްކޮށްގެން އެ މީހާގެ ނަމުގައި މަކަރާއި ހީލަތުން 150000 ރުފިޔާ އަށް ވުރެ ގިނަ ފައިސާ ނަގާފައިވާ މައްސަލައިގައި ހުސައިން ފާރިޝް ޢުމަރު 22 އަހަރު ހައްޔަރުކޮށްފި އެވެ.
ހ.ފަރުމާވިލާ / މާލެ، ޙުސައިން ފާރިޝް ޢުމަރު (22އ)
މީހެއްގެ ވައިބަރ އެކައުންޓް ހެކްކޮށްގެން އެމީހާގެ ނަން ބޭނުންކޮށްގެން އެކި މީހުންގެ އަތުން މަކަރާއި ހީލަތުން ފައިސާ ނެގި މައްސަލާގައި އިތުރު މީހަކު ހައްޔަރުކޮށްފި އެވެ.
ފުލުހުން ބުނި ގޮތުގައި މި މައްސަލަ އާއި ގުޅިގެން ހައްޔަރުކޮށްފައިވަނީ ހ.ފަރުމާވިލާ / މާލެ، ޙުސައިން ފާރިޝް ޢުމަރު (22އ) އެވެ.
ފުލުހުން ބުނީ އޭނާ ހައްޔަރު ކުރީ މީހެއް ގެ ވައިބަރ އެކައުންޓް ހެކްކުރުމަށް ފަހު، އެ މީހާގެ ނަމުގައި އެކި ފަރާތްތަކާއިި މަކަރާއި ހީލަތުން މުއާމަލާތުކޮށްފައިވާ މައްސަލަ އާއި ގުޅިގެން ކަމަށެވެ. މި މައްސަލައިގައި އެކި ފަހަރު މަތިން 150،000 އަށްވުރެ ގިނަ ރުފިޔާ ހޯދާފައިވާ ކަމަށް ފުލުހުން ބުނެ އެވެ. އަދި ހޯދި ފައިސާގެ ތެރެއިން ބައެއް ނަގާފައިވާ ކަމަށް ވެސް އެ އިދާރާ އިން ހާމަކުރެ އެވެ.
ފާރިޝް ހައްޔަރުކޮށްފައިވަނީ، ނޮވެމްބަރު މަހުގެ 30 ވަނަ ދުވަހު އެންޓި ސްކޭމް ސެންޓަރަށް ހުށަހަޅާފައިވާ މައްސަލަ އަކާއި ގުޅިގެންނެވެ. އޭނާ ހައްޔަރު ކުރީ ކޯޓު އަމުރެއްގެ ދަށުން ޑިސެންބަރު 17 ވަނަ ދުވަހު އެވެ. ފާރިޝް ގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން އޭނާ ގެ ބަންދަށް 7 ދުވަހުގެ މުއްދަތެއް ދީފައިވެ އެވެ.
މިއީ މި މައްސަލައިގައި ހައްޔަރު ކުރި ހަތަރު ވަނަ މީހާ އެވެ. ކުރިން މި މައްސަލައިގައި ހައްޔަރު ކުރީ ގ. މާލޭހިޔާ 1-16-03 / މާލެ، އަޙްމަދު ޙައްސާން (33އ) އާއި، ހމ.ފްލެޓް ނަންބަރ 06-2-39 / މާލެ، ޙަސަން އަޒުރާޙު (39އ) އާއި، ނ. މަނަދޫ / ވެށި، ޙުސައިން ސަމާޙު (33އ) އެވެ.
ފުލުހުން ދަނީ މި މައްސަލަ އިތުރަށް ތަޙުޤީޤު ކުރަމުން ކަމަށް އެ އިދާރާ އިން ބުނެ އވެެ.
