ސްކޭމްގެ އެކި މައްސަލަތަކުގައި ފާއިތުވި ހަ މަސްދުވަހުގެ ތެރޭގައި 11.4 މިލިއަނަށް ވުރެ ގިނަ ފައިސާއާއި 138،000ށް ވުރެ ގިނަ ޑޮލަރުގެ ގެއްލުން ވެފައިވާ ކަމަށް ފުލުހުންގެ ޚިދުމަތުން ބުނެފިއެވެ.

ސްކޭމްގެ މައްސަލަތަކާ ގުޅޭގޮތުން ފުލުހުން ބުނީ، ރާއްޖޭގައި އިތުރުވަމުންދާ ސްކޭމްގެ މައްސަލަތަކާ ކުރިމަތިލުމަށްޓަކައި 2025 މާރިޗު 17 ގައި ގާއިމުކުރެވުނު އެންޓި-ސްކޭމް ސެންޓަރުން، ހަ މަސްދުވަހުގެ ތެރޭގައި ފާހަގަކޮށްލެވޭ ގިނަ މަސައްކަތްތަކެއް ކޮށްފައިވާ ކަމަށެވެ. ގިނަ އިދާރާތަކެއް ގުޅިގެން މަސައްކަތްކުރާ މި ސެންޓަރުން، އާންމު ރައްޔިތުން ސްކޭމުން ރައްކާތެރިކުރުމަށާއި، ސްކޭމްގެ މައްސަލަތަކުގައި ގެއްލޭ ފައިސާ ރައްޔިތުންނަށް އަނބުރާ ހޯދައިދިނުމަށް ގިނަ މަސައްކަތްތަކެއް ކޮށްފައިވާ ކަމަށް ފުލުހުން ބުނެއެވެ. އަދި މިހާރުވެސް މެދުކެނޑުމެއް ނެތި މަސައްކަތް ކުރަމުންދާ ކަމަށް ފުލުހުން ބުނެއެވެ.

ވޭތުވެދިޔަ ހަ މަސްދުވަހުގެ ތެރޭގައި އެންޓި-ސްކޭމް ސެންޓަރަށް، ތަފާތު އެކި ބާވަތްތަކުގެ ސްކޭމްގެ 1059 މައްސަލަ ރިޕޯޓުކުރެވިފައިވާކަން ފާހަގަކޮށް ފުލުހުން ބުނީ، މީގެ ތެރެއިން އެންމެ ގިނައިން ރިޕޯޓުކުރެވިފައިވަނީ އީ-ކޮމާސް ސްކޭމްގެ މައްސަލަތައް ކަމަށެވެ.

އެގޮތުން އެފަދަ 491 މައްސަލައާއި، ބޭރު ފައިސާ މާރުކުރުމުގެ 250 މައްސަލައާއި، އެހެން މީހެއްގެ ގޮތުގައި ދެއްކުމުގެ (އިމްޕަރސަނޭޝަން) 130 މައްސަލައާއި، އިންވެސްޓްމަންޓް ސްކޭމްގެ 32 މައްސަލަ ރިޕޯޓުކޮށްފައިވާ ކަމަށެވެ. މީގެ އިތުުރުން ވެސް ސްކޭމްގެ އެހެނިހެން ބާވަތްތަކުގެ މައްސަލަ ވެސް ރިޕޯޓުކޮށްފައިވާ ކަމަށް ފުލުހުން ބުނެއެވެ.

މި މައްސަލަތަކުގައި ޖުމުލަ -/11،040،491.28ރ (އެގާރަ މިލިއަން ސާޅީސްހާސް ހަތަރުސަތޭކަ ނުވަދިހަ އެއް ރުފިޔާ އަށާވީސް ލާރި) އަދި 138،060.85 ޔޫއެސް.ޑޮލަރުގެ ގެއްލުންވެފައިވެއެވެ. މީގެ ތެރެއިން -/2،515،484.13ރ (ދެމިލިއަން ފަސްލައްކަ ފަނަރަހާސް ހަތަރުސަތޭކަ އަށްޑިހަ ހަތަރު ރުފިޔާ ތޭރަ ލާރި) އަދި 31،9737 ޔޫއެސް ޑޮލަރު ތަހުގީގުގެ ތެރެއިން އަނބުރާ ހޯދާފައިވާ ކަމަށް ފުލުހުން ބުނެއެވެ.

މީގެ އިތުރުން ފުލުހުން ބުނީ، ރިޕޯޓުކުރެވުނު މައްސަލަތަކުގެ ޑިމޮގްރަފިކްސް ދައްކާ ގޮތުން މަނީ މިއުލްސްގެ ގޮތުގައި 328 އަންހެނުންނާއި، 1525 ފިރިހެނުން ހިމެނޭ ކަމަށާއި، ސްކޭމްގެ ޝިކާރައަކަށްވެފައިވާ 627 އަންހެނުންނާއި 1305 ފިރިހެނުން ހިމެނޭ ކަމަށެވެ.

މި މުއްދަތުގެ ތެރޭގައި ފަސްތަނެއް ބަލައިފާސްކޮށްފައިވާއިރު ހަ މީހަކު ހައްޔަރުކޮށްފައިވާ ކަމަށާއި، ފަސް މައްސަލައެއްގެ ތަހުގީގު ނިންމައި ދައުވާކުރުމަށް ފޮނުވާފައިވާ ކަމަށް ފުލުހުން ބުނެއެވެ.

ފާއިތުވި ހަ މަސް ދުވަހުގެ ތެރޭގައި ފިޔަވަޅު އެޅުނު އެކައުންޓުތަކުގެ ތަފާސްހިސާބަށް ބަލާއިރު ކޯޓު އަމުރުގެ ދަށުން 453 އެކައުންޓް ފްރީޒްކޮށްފައިވެއެވެ. އަދި މި މުއްދަތުގައި 1897 އެކައުންޓް 48 ގަޑިއިރަށް ހިފަހައްޓާފައިވާ ކަމަށް ފުލުހުން ބުނެއެވެ.

މަސައްކަތްތައް ހަރުދަނާކުރުމަށް ކުރެވުނު މަސައްކަތްތަކާ ގުޅޭގޮތުން ފުލުހުން ބުނީ، މި ފާއިތުވި ހަ މަސްދުވަހު، ރައްޔިތުންނަށް ރަނގަޅު ހިދުމަތެއް ފޯރުކޮށްދިނުމަށް ހަރުދަނާ އޮޕަރޭޝަނަލް އޮނިގަނޑެއް އެކުލަވައިލުމުގެ މަސައްކަތް ކޮށްފައިވާ ކަމަށެވެ.

އެގޮތުން ސްކޭމާ ގުޅޭ ހުރިހާ ތަހުގީގެއްގެ މައި މަރުކަޒެއްގެ ގޮތުގައި އެންޓި-ސްކޭމް ސެންޓަރު ގާއިމުކޮށް ބާރުވެރިކުރުވުމާއި، ސްކޭމާ ގުޅުންހުރި އެކައުންޓުތައް ހިފެހެއްޓުމާއި ފައިސާ ޓްރޭސްކުރުމަށް އަވަސް ފިޔަވަޅު އެޅުމަށްޓަކައި މާލީ އިދާރާތަކާއެކު އޮންނަ ގުޅުން ބަދަހިކުރުމުގެ މަސައްކަތް ކުރެވިފައިވެއެވެ. އަދި"އޮޕަރޭޝަން ފްރޮންޓިއަރ+" ފަދަ ބައިނަލްއަގުވާމީ އޮޕަރޭޝަންތަކުގައި ބައިވެރިވެފައިވާ ކަމަށެވެ.

މީގެ ސަބަބުން، ބޯޑަރު ހުރަސްކޮށް ހިންގާ ފްރޯޑާ ދެކޮޅަށް މަސައްކަތްކުރުމާއި ވަގަށްނެގޭ ފައިސާ އަނބުރާ ހޯދުމުގެ ގާބިލުކަން އިތުރުވެފައިވާ ކަމަށް ފުލުހުން ބުނެއެވެ.

މީގެ އިތުރުން ސިމް ކާޑު ނަހަމަ ގޮތުގައި ބޭނުންކުރުމާއި އޮންލައިން އެކައުންޓުތައް ކޮމްޕްރޮމައިޒްކުރުން ފަދަ އަލަށް ފާހަގަކުރެވޭ ސްކޭމްގެ ވައްތަރުތަކާ ގުޅޭގޮތުން އާންމުން ހޭލުންތެރިކޮށް، ހިނގަމުންދާ ސްކޭމްތައް އާންމުންނަށް އަންގައިދީ ރައްކާތެރިކަމުގެ ފިޔަވަޅުތައް ބުނެދީފައިވާ ކަމަށް ފުލުހުން ބުނެއެވެ. އަދި "ސްކޭމް އައްޑަނަ" މި ނަމުގައި ޚާއްސަ ކެމްޕެއިނެއް މުޅި ރާއްޖެއަށް ގެންދިއުމަށް ވަނީ ލޯންޗުކޮށްފައެވެ. މީގެ އިތުރުން ވެސް ތަފާތު މަސައްކަތްތައް ކުރެވިފައިވާ ކަމަށް ފުލުހުން ބުނެއެވެ.