ކަނޑިތީމު ދާއިރާގެ މެމްބަރު އަމީން ފައިސަލް ވިދާޅުވީ ސަރުކާރު ކުންފުނިތަކާއި ބޭރުގެ އެމްބަސީތަކުގެ މުވައްޒަފުން އޮފީސް މަސައްކަތަށް ނުނިކުމެ ސަރުކާރުގެ ޕްރޮޕެގެންޑާ ފެތުރުމުގައި އުޅޭ ކަމަށެވެ. ޕީއެންސީ އިމާރާތް ކުރުމުގައި އާރްޑީސީ އާއި އެމްޕީއެލް ފަދަ ކުންފުނިތަކުގެ މުވައްޒަފުން ރަސްމީ ގަޑީގައި މަސައްކަތް ކުރާ ކަން ހާމަވެފައިވެއެވެ. ކައުންސިލް އިންތިހާބުގައި ނުފޫޒު ފޯރުވުމަށް ބޮޑެތި އާއިލާތަކަށް ވަޒީފާ ދޭ ކަމަށް އަމީން ތުހުމަތު ކުރެއްވިއެވެ.
ރައްޔިތުންގެ މަޖިލީހުގެ ކަނޑިތީމު ދާއިރާގެ މެންބަރު އަމީން ފައިސަލް
މި ސަރުކާރު ވެރިކަމަށް އައި ފަހުން ސަރުކާރު ކުންފުނިތަކާއި، ރާއްޖެ އިން ބޭރުގައި ހުރި ރާއްޖޭ ގެ އެމްބަސީތަކު ގެ މުވައްޒަފުން ރަސްމީ އޮފީސް މަސައްކަތަށް ނުނިކުމެ ކުރަން ޖެހެނީ ސަރުކާރުން ބޭނުންވާ ޕްރޮޕެގެންޑާތައް ފެތުރުމުގެ މަސައްކަތް ކަމަށް ރައްޔިތުންގެ މަޖިލީހުގެ ކަނޑިތީމު ދާއިރާގެ މެމްބަރު އަމީން ފައިސަލް ވިދާޅުވެއްޖެ އެވެ.
އޭނާ އެފަދައިން ވިދާޅުވީ ރާއްޖެ ޓީވީގެ ޓީވީ ޓޯކް ޕްރޮގްރާމްގައި ވާހަކަދައްކަވަމުންނެވެ.
މާލޭގައި އިމާރާތް ކުރާ ޕީއެންސީ 5 ބުރި އިމާރާތަށް ޚަރަދު ކުރަނީ ވެމްކޯ އިން ކަމަށް އެ މަސައްކަތުގައި ހަރަކާތްތެރިވާ މީހުންނާއި ހަވާލާދީ މީޑިއާ އާއި މީސްމީޑިއާ ގައި ދަނީ ވާހަކަ ދެކެވެމުންނެވެ. އަދި އެ ތަން އިމާރާތް ކުރުމަށް މަސައްކަތް ކުރަނީ އާރްޑީސީ، އެމްޕީއެލް ފަދަ ކުންފުނިތަކުގެ މުވައްޒަފުން ކަން ވަނީ ހާމަ ވެފަ އެވެ. ޕީއެންސީގެ ޖަގަހަ އިމާރާތް ކުރުމުގައި އެ މުވައްޒަފުން މަސައްކަތް ކުރަނީ ރަސްމީ ގަޑީގައި އޮފީހުގެ މަސައްކަތަށް ނުކުމެ ފިންގަރ ޖެހުމަށް ފަހު ޕީއެންސީ އޮފީހުގެ މަސައްކަތުގައި ޝާމިލްވާ ގޮތަށެވެ.
އަމީން ވިދާޅުވީ މިއީ ހަމަ އެކަނި މާލޭގެ ހާލަތު ނޫން ކަމަށެވެ. އަމީން ވިދާޅުވީ ރާއްޖޭގެ ރަށްތަކުގައި ވެސް އެކަން ހިނގަނީ އެހެން ކަމަށެވެ.
"މުޅި ރާއްޖޭގައި ވެސް އޮތީ އެހެން. ރާއްޖެ އިން ބޭރު އެމްބަސީތަކުގައި ވެސް އޮތީ އެހެން. ކުންފުނިތަކާއި ސްޓާފުން ގިނަ އެމްބަސީތަކުގައި ވެސް އެހެން. ވަޒީފާ އަށް ނުކުމެ މި ބޭފުޅުންގެ ޕްރޮޕެގެންޑާ ފެތުރުމުގައި މި އުޅެން ޖެހެނީ. ނޫނީ ޖަގަހަ މަރާމާތުކޮށް ޖަގަހަ އާބާތުރަ ފިލުވަން މި އުޅެން ޖެހެނީ. ވަކި ނުފޫޒު ގަދަ ބަޔަކު އުޅެން ފަސޭހަ އަކަށް ރާއްޖެއިން ބޭރުގައި ވެސް މި އުޅެނީ" އޭނާ ވިދާޅުވި އެވެ.
ކުރިއަށް އޮތް ކައުންސިލް އިންތިޚާބުގެ ނަތީޖާ އަށް ނުފޫޒު ފޯރުވުމަށް އެތައް ބަޔަކަށް ވަޒީފާތައް ދޭ ކަމަށް އަމީން ވިދާޅުވި އެވެ. މިއީ ރަށްރަށުގެ ބޮޑެތި އާއިލާތައް ކޮންޓްރޯލް ކުރުމަށް ކުރާ ކަމެއް ކަމަށް އޭނާ ވިދާޅުވި އެވެ. މިހާރު ވެސް ބައެއް ރަށްރަށުގައި ކުންފުނިތަކުން ވަޒީފާ ދިނުމަށް ފަހު، އެ މީހުންނަށް މުސާރަ ދޭތާ 6 މަސް، 8 މަސް ވީ އިރު، އެ މީހުން ކުރަން ޖެހޭ މަސައްކަތެއް ނެތި ތިބެން ޖެހިފައިވާ ކަމަށް އަމީން ވިދާޅުވި އެވެ. މިއީ ދައުލަތުގެ ފައިސާ އާއި ބާރު ނަހަމަ ގޮތުގައި ބޭނުން ކުރުން ކަން އަމީން ވަނީ ފާހަގަކުރައްވާފަ އެވެ.
ޕީއެންސީގެ މުޅި ކެމްޕެއިން ޓީމަށް ވަޒީފާ ދީ ނިންމާފައިވާ ކަމަށާއި، އޭނާ ނިސްބަތްވާ ކަނޑިތީމު ދާއިރާގައި ސަރުކާރުން ދޭން ބޭނުންވާ ވަޒީފާތައް ނުދެވިފައި ހުރީ ދެން އިތުރަށް ވަޒީފާ ދޭނެ ބަޔަކު ނެތިގެން ކަމަށް އަމީން ވިދާޅުވި އެވެ. އެ މިންވަރަށް ސަރުކާރުން އޮތީ ރަށްރަށަށް ނުފޫޒު ފޯރުވާފައި ކަމަށް އަމީން ވިދާޅުވި އެވެ. އަމީން ވަނީ ކުންފުނިތަކުން އެތައް ވަޒީފާ އެއް ދޭ އިރު ކުރާނެ މަސައްކަތެއްގެ އެއްވެސް ތަފްސީލެއް ކުންފުނިތަކުން ރަށު ކައުންސިލްތަކާއި ހިއްސާ ނުކުރާ ކަމަށެވެ.
