ސިޔާސީ ނުފޫޒު ފޯރުވޭގޮތަށް ދައުލަތުގެ މާލިއްޔަތުގެ ގަވައިދު ބަދަލުކޮށްގެން، ސަރުކާރުގެ ޕްރޮޖެކްޓްތައް ދޭ މައްސަލަ ޕްރޮސެކިއުޓަރ ޖެނެރަލް އަށް ހުށަހަޅައިފި އެވެ.

މޯލްޑިވިއަން ޑިމޮކްރަޓިކް ޕާޓީގެ ލީޑަގް ޑައިރެކްޓަރ އަޙްމަދު މަޢުރޫފު، ޕްރޮސިކިއުޓަރ ޖެނެރަލް ޖަސްޓިސް (ރިޓަޔަރޑް) އަލްއުސްތާޛް ޢައްބާސް ޝަރީފަށް ފޮނުވި ސިޓީގައި ވިދާޅުވެފައިވަނީ، މި ހިނގާ ރިޔާސީ ދައުރު ފެށުނުއިރު އަމަލުކުރަމުން އައި ގަވައިދު ނަންބަރު 2023/R-158 (ދައުލަތުގެ މާލިއްޔަތުގެ ގަވާއިދު) އަކީ ޒަމާނީ ޕަބްލިކް ފައިނޭންސް ނިޒާމެއް ގާއިމުކޮށް ހިންގުމަށް ދައުލަތުގެ ކަމާބެހޭ އެންމެހައި އިދާރާތަކުގެ މަޝްވަރާއާއެކު އެކުލަވައިލައިފައިވާ ގަވައިދެކެވެ. އެހެންނަމަވެސް، ނިޒާމީ ގޮތެއްގައި ކޮރަޕްޝަން ހިންގުމަށް ޖާގަ ހޯދުމުގެ ގޮތުން، އިއުލާންކުރުމެއްނެތި އަދި ބިޑްކުރުމުގެ އެއްވެސް އިޖުރާއަތެއް ފުރިހަމަކުރުމަކާ ނުލައި، ސަރުކާރުން ބޭނުން ފަރާތަކަށް ޕްރޮޖެޓްތައް ހަވާލުކުރުމަށް މަގުފަހިކުރުމުގެ ގޮތުން، މި ސަރުކާރުން ވަނީ އެ ގަވައިދަށް 4 ފަހަރެއްގެ މަތިން ބަދަލުގެނެސްފަ އެވެ.

އަދި ދައުލަތުގެ މާލިއްޔަތުގެ ގަވައިދަށް ގެނެސްފައިވާ ބަދަލުތަކުގެ ސަބަބުން، ވަޒީރުންގެ މަޖިލީހުން ނުވަތަ އެ މަޖިލީހުގެ ކޮމިޓީއަކުން، "ރައްޔިތުންގެ އަސާސީ ބޭނުންތަކާއި، ދިރިއުޅުމުގެ ފެންވަރު ރަނގަޅުކޮށްދޭ ބާވަތުގެ މަޝްރޫޢުތަކާއި، ސަލާމަތީ ޚިދުމަތްތަކަށް ޚާއްޞަ މަޝްރޫޢުތައް" ގެ ގޮތުގައި ކަނޑައަޅާ ކޮންމެ މަޝްރޫޢަކީ އެ ކޮމިޓީއިން ބޭނުންވާ ކޮންމެ ފަރާތަކަށް "ސިންގަލް ސޯސް ޕްރޮކިއުމަންޓް" ގެ އުސޫލުން ހަވާލުކުރެވޭނެ މަޝްރޫޢެކެވެ. މި ބަދަލުތަކުގެ ސަބަބުން ދައުލަތުގެ މުޅި ޕްރޮކިއުމަންޓުގެ ނިޒާމު ގަޑުބަޑުވެ، ދިވެހިރާއްޖޭގެ މާލީ ނިޒާމާމެދު އޮންނަ އިތުބާރު އެއްކޮށް ގެއްލިގެން ހިނގައިދާނެ ކަމުގެ ކަންބޮޑުވުން އެބަ އޮތް ކަމަށް މައުރޫފުގެ ސިޓީގައި ބަޔާންކޮށްފައިވެ އެވެ.

ސަރުކާރުގެ ޕްރޮޖެކްޓްތައް ބީލަމަށް ނުލައި، ހާމަކަމެއް، ވާދަ ކުރުމުގެ ފުރުސަތެއް ނެތި، ކެބިނެޓުން ބޭނުންވާ ބަޔަކަށް ބޭނުން އަގެއްގައި ދެވޭނެ ގޮތަށް ގަވައިދު ބަދަލުކުރުމަށްފަހު، 53 ކުންފުންޏަކާ 206 ޕްރޮޖެކްޓް ހަވާލުކުރުމަށް، މި ހިނގާ ނޮވެންބަރު މަހުގެ 6 ވަނަ ދުވަހު އެގްރީމަންޓް ތަކެއްގައި ވަނީ ސޮއިކޮށްފަ އެވެ. އެއްވެސް ހާމަކަމެއް އަދި ހަމަހަމަކަމެއް ނެތި ކޮށްފައިވާ މި ކަމުން ފާހަގަކުރެވޭ މައްސަލަތައް މިސިޓީގައި ވަނީ ތަފްސީލުކޮށް ބަޔާންކޮށްފަ އެވެ.

އެގޮތުން ބީލަމަށް ނުލައި ޕްރޮޖެކްޓްތައް ދެވޭނެ ގޮތަށް ދައުލަތުގެ މާލިއްޔަތުގެ ގާނޫނާ ޚިލާފަށް ގަވައިދު ބަދަލުކުރުމާއި، ސަރުކާރުން ކުރިއަށް ގެންދަން ބޭނުންވާ ޕްރޮޖެކްޓްތައް ދުރާލައި އިއުލާނުކޮށްފައި ނުވުމުގެ އިތުރުން، ސަރުކާރާ ގުޅުން ހުރި ފަރާތްތަކުގެ ކުންފުނިތައް ފިޔަވައި އެހެން އެއްވެސް ފަރާތަކަށް ފުރުސަތު ދީފައި ނުވާ ކަން ވަނީ ފާހަގަކޮށްފަ އެވެ.

މީގެ އިތުރުން ފާހަގަކޮށްފައިވާ ނުކުތާތަކަށް ބަލާއިރު، ކޮންޓްރެކްޓަރުންގެ ދަފުތަރުގައި ނުހިމެނޭ ކުންފުނިތަކަށް ޕްރޮޖެކްޓް ހަވާލުކުރުމާއި، ޕްރޮޖެކްޓްތައް ހަވާލުކުރި ކުންފުނިތަކުގެ ފަންނީ ޤާބިލުކަމާއި ތަޖުރިބާއަށް ބަލައިފައި ނެތުމުގެ އިތުރުން، އެއް ބާވަތެއްގެ އަދި އެއް ބޮޑުމިނެއްގެ ޕްރޮޖެކްޓްތައް އެކި އަގުގައި ދިނުމާއި، އެއްވެސް ގެރެންޓީއެއް ބަހައްޓަން ލާޒިމުކޮށްފައި ނުވުން ހިމެނެ އެވެ.

އެހެންކަމުން ސިޔާސީ ނުފޫޒު ފޯރުވޭގޮތަށް ދައުލަތުގެ މާލިއްޔަތުގެ ގަވައިދު ބަދަލުކޮށްގެން މި ދެންނެވި ފަދަ އަމަލުތައް ކުރަން ސަރުކާރުން ފަށައިފައި ވުމުގެ ސަބަބުން، ދައުލަތުގެ ޕްރޮކިއުމަންޓް ނިޒާމުގެ މިނިވަންކަމާއި، ހާމަކަމާއެކު އަދި ދައުލަތަށް އެންމެ ފައިދާ ވާނެގޮތަށް ގެންދިއުމަށް ހުރަސް އެޅި، ދައުލަތުގެ ފައިސާއާއި މުދަލަށް ޚިޔާނާތްތެރިވުމުގެ ޖާގަ ނުހަނު ބޮޑަށް ހުޅުވިގެންދާނެ ކަމަށް މިސިޓީގައި ވަނީ ބަޔާންކޮށްފަ އެވެ.

މި ސަބަބުތަކަށް ބަލާއިރު، މި ކަމަކީ، ޤާނޫނު ނަންބަރު 9/2014 (ދިވެހިރާއްޖޭގެ ޤާނޫނުލްޢުޤޫބާތު) ގެ 513 ވަނަ މާއްދާގެ (ށ) ގައި ބަޔާންކުރާ ފަދައިން، ރަސްމީ ހައިސިއްޔަތު ނަހަމަ ގޮތުގައި ބޭނުންކުރުން އަދި ރަސްމީ ހައިސިއްޔަތު ނަހަމަ ގޮތުގައި ބޭނުންކޮށްގެން ތިމާއަށް ނުވަތަ އެހެން މީހަކަށް މަންފާއެއް ހޯދައިދިނުމުގެ ޢަމަލުތަކެއްކަން އެނގޭ ކަމަށާއި، މިހެންކަމުން، ކޮރަޕްޝަންގެ މި ޢަމަލުތައް އަވަހަށް ބަލައި، ތަހުގީގުކޮށް، ޤާނޫނީ ފިޔަވަޅު އެޅުމަކީ މި ބާވަތުގެ ކުށްތައް ހުއްޓުވުމަށް ވަރަށް މުހިންމު ކަމެެއް ކަމަށް މައުރޫފުގެ ސިޓީގައި ވަނީ ބަޔާންކޮށްފަ އެވެ.

އަދި ކޮރަޕްޝަންގެ މި އަމަލުތައް ބަލައި، ތަހުގީގުކޮށް، ޤާނޫނީ ފިޔަވަޅު އެޅުން އަވަސްކުރުމުގެ ގޮތުން، މި މައްސަލަ ބެލުމަށް އަމުރުކޮށްދެއްވުން އެދި ދަންނަވާ ކަމަށް މައުރޫފު ވިދާޅުވެފައިވެ އެވެ.