އަޅުގަނޑުމެންގެ ބަޖެޓުން ޚަރަދު ކުރަނީ ފެނާއި ނަރުދަމާ އަށް ވުރެ ބޮޑަށް ބަރު ހަތިޔާރު ގަތުމަށް، މިއީ ރާއްޖެ އަށް ރަނގަޅު ގޮތެއް ނޫން : ޝަމްހީދު
25 ނޮވެމްބަރު 2025 | އަންގާރަ 08:25ރާއްޖޭގެ ބަޖެޓުން ފެނާއި ނަރުދަމާއަށް ވުރެ ބޮޑަށް ހަތިޔާރު ގަތުމަށް ޚަރަދު ކުރާއިރު 2026 ވަނަ އަހަރު ދިފާއީ ހަރަދުތަކަށް 2.8 ބިލިއަން ރުފިޔާ ޚަރަދު ކުރުމަށް ނިންމާފައިވޭ
ހުޅުމާލެ ދެކުނު ދާއިރާގެ މެމްބަރު ޑރ.އަހުމަދު ޝަމްހީދު މަޖިލީހުގައި ވާހަކަދައްކަވަނީ
ރާއްޖޭގެ ބަޖެޓުން ޚަރަދު ކުރަނީ ފެނާއި ނަރުދަމާ އަށް ވުރެ ބޮޑަށް ބަރު ހަތިޔާރު ގަތުމަށް ކަމަށް މޯލްޑިވިއަން ޑިމޮކްރެޓިކް ޕާޓީގެ މެންބަރު އަހުމަދު ޝަމްހީދު މިއަދު ވިދާޅުވެއްޖެ އެވެ.
އޭނާ އެފަދައިން ވިދާޅުވީ އަންގާރަ ދުވަހު ބަޖެޓް ބަހުސްގައި ވާހަކަ ދައްކަވަމުންނެވެ.
ޝަމްހީދު ވަނީ ހަތިޔާރަށް ބޮޑު ޚަރަދެއް ކުރުމަކީ ރާއްޖެ އަށް ރަނގަޅު ގޮތެއް ނޫން ކަމަށް ވިދާޅުވެފަ އެވެ. މި ބިލިއަނެއްހާ ރުފިޔާ ބަޖެޓު ބޭރުން ހޭދަކޮށް މި ސަރުކާރުން ނިންމާފައި ވާއިރު އެކި އެކި ކުންފުނިތަކަށް ފައިސާ ޖަމާކޮށްގެން ހަތިޔާރާ ސޮފްޓްވެއަރ ގަނެފައިވާ ކަމަށް ވިދާޅުވެފަ އެވެ. ނަމަވެސް ރާއްޖޭގެ މިނިވަންކަން ދެމެހެއްޓުމަށް ބޭނުން ވަނީ ބަރު ހަތިޔާރު ނޫން ކަމަށާއި އެކަން ކުރެވޭނީ ރާއްޖެ އާއި ޤައުމުތަކާއި ދެމެދު އޮންނަ ހާރިޖީ ގުޅުމުން ކަމަށް އޭނާ ވިދާޅުވި އެވެ.
"7 ބިލިޔަނެއްހާ ރުފިޔާ ބަޖެޓުން ބޭރުން ހޭދަކޮށްފި. އަޅުގަނޑުމެން މި ދައްކަނީ ތަރައްޤީ އަށް ކަންކަން ނުވާ ވާހަކަ. އެތައް ބިލިއަން ރުފިޔާ އެއް ގޮތް ނޭނގޭ ގޮތަށް ހޭދަކޮށްފި." އޭނާ ވިދާޅުވިއެވެ.
މި ސަރުކާރުން ބަޖެޓް ހޭދަކުރާ ގޮތަށް ޝަމްހީދު ވަރަށް ބޮޑަށް ފާޑު ވިދާޅުވި އެވެ. އޭނާ ވަނީ އާއްމުންނާއި މެދު ވިސްނުމެއް ނެތި ބަޖެޓުގައި ބައެއް ކަންކަން ކޮށްފައިވާ ކަަމަށް ފާހަގަކުރައްވާފައެވެ. އެގޮތުން އާ މުސާރައިގެ އޮނިގަނޑުގެ ސަބަބުން އާއްމުންނަށް އެތައް ދައްޗަކާއި ކުރިމަތިވާ ކަމަށް އޭނާ ވިދާޅުވި އެވެ.
އިއްޔެ ޖުޑީޝަރީ ތިބީ މަގުމަތީގައި އައިޖީއެމްއެޗާއި، ހުޅުމާލެ ހޮސްޕިޓަލާއި، ސިއްހީ ދާއިރާ އާއި އެހެން ދާއިރާތަކުގެ މީހުން ތިބީ މަގުމަތިވެފައި. މި ދައްކަނީ ކުދި ކުދި އަދަދުތަކުގެ ވާހަކަ އެއް ނޫން. އައިޖީއެމްއެޗްގެ ބައެއް މުވައްޒަފުން އަތުން ފަސް ހާސް ރުފިޔާ މަދުވޭ." އޭނާ ވިދާޅުވި އެވެ.
2026 ވަނަ އަހަރު ދިފާއީ ހަރަދުތަކަށް 2.8 ބިލިއަން ރުފިޔާ ޚަރަދުކުރުމަށް ވަނީ ނިންމާފަ އެވެ. މިއީ ހިނގާ 2025 ވަނަ އަހަރުގެ އަސްކަރީ ބަޖެޓާއި އަޅާކިޔާ ނަމަ 456 މިލިއަން ރުފިޔާ އިތުރު އަދަދެކެވެ.
