400 ހައުސިންގ ޔުނިޓު މަޝްރޫއުގެ އަމަލީ މަސައްކަތް މިއަހަރުގެ ފަހު ކުއާޓަރުގައި ފަށާނެ: ސަރުކާރު
މި މަޝްރޫއުގެ މިހާރު ކުރިއަށްދަނީ ކޮންސަލްޓަންސީ ފަރމްއެއް ހޮވުމުގެ މަރުހަލާ
ހައުސިން މަޝްރޫއު އިފްތިތާހް ކުރުން / 14.04.2025
ސައުދީ ފަންޑް ފޮރ ޑިވެލޮޕްމަންޓް ލޯނު ފަންޑިންގެ ދަށުން ކުރިއަށް ގެންދިއުމަށް ހަމަޖެހިފައިވާ 400 އެފޯޑަބަލް ހައުސިންގ ޔުނިޓްގެ މަޝްރޫއު އިފްތިތާހް ކޮށްފިއެވެ.
ހޯމަ ދުވަހު ބޭއްވި ޚާއްސަ ރަސްމިއްޔާތެއްގައި ޗީފް އެގްޒެކެޓިވް އޮފިސަރ އޮފް ސައުދީ ފަންޑް، ސުލްތާން ބިން އަބްދުލްރަޙްމާން އަލް-މަރްޝަދް އަދި މިނިސްޓަރ އޮފް ފިނޭންސް އެންޑް ޕްލޭނިންގ މުސާ ޒަމީރު ވަނީ ސައުދީ ފަންޑް ފޮރ ޑިވެލޮޕްމަންޓް ލޯނު ފަންޑިންގެ ދަށުން ކުރިއަށް ގެންދިއުމަށް ހަމަޖެހިފައިވާ 400 އެފޯޑަބަލް ހައުސިންގ ޔުނިޓްގެ މަޝްރޫއު ރަސްމީކޮށް ފައްޓަވައިދެއްވާފައެވެ.
މި މަޝްރޫއު ކުރިއަށް ގެންދިއުމަށް ސައުދީ ފަންޑު ފޮރ ޑިވެލޮޕްމަންޓް 25 މިލިއަން ޑޮލަރުގެ ލޯނު އެހީވަނީ ދީފައެވެ.
މި މަޝްރޫއާ ގުޅޭގޮތުން މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރއިން ބުނީ މިއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އެންމެ މުހިންމު އެއް ވައުދުފުޅު ކަމަށްވާ ކޮންމެ ރައްޔިތަކަށް ބޯހިޔާވަހިކަމުގެ ފުރުސަތު ފަހިކޮށްދެއްވުމުގެ ސިޔާސަތުގެ ތެރެއިން ކުރިއަށް ގެންދިއުމަށް ހަމަޖެހިފައިވާ އެއް މަޝްރޫއެއް ކަމަށެވެ.
މި މަޝްރޫއުގެ މިހާރު ކުރިއަށްދަނީ ކޮންސަލްޓަންސީ ފަރމްއެއް ހޮވުމުގެ މަރުހަލާއެވެ. އަދި މިއަހަރުގެ ފަހު ކުއާޓަރުގައި އަމަލީ މަސައްކަތް ފެށިގެންދާނެ ކަމަށް މިނިސްޓްރީން ބުނެއެވެ.
ހައުސިންގެ އައު މަޝްރޫއެއްގެ އިފްތިތާހް ކުރިއިރު، ކުރީ ސަރުކާރުން ދޫކޮށްފައިވާ ގެދޮރުވެރިޔާ ސްކީމްގެ ފްލެޓުތައް މިސަރުކާރުން ވަނީ ދޫނުކޮށް ހިފަހައްޓާފައެވެ. އަދި މިސަރުކާރުން އިވެލުއޭޝަން ހެދުމަށްފަހު އާއްމުކޮށްފައިވާ ލިސްޓުގައި 4،000 ފްލެޓުގެ ތެރެއިން ޝަރުތުހަމަވެ، ފްލެޓު ލިބެނީ 1820 މީހުންނަށެވެ. އެއީ 3 ކޮޓަރީގެ ލިސްޓުގައި ހިމެނޭ 3721 މީހުންގެ ތެރެއިން ޝަރުތު ހަމަވެ 75 ޕޮއިންޓު ލިބިފައިވަނީ 1423 މީހުންނާއި 2 ކޮޓަރީގެ ލިސްޓުގައިވާ 1218 މީހުންގެ ތެރެއިން ޝަރުތުހަމަވެ 73 ޕޮއިންޓުލިބުނު 397 މީހުންނެވެ.
