ކުންފުނިތަކަށް މިހާރު ސަބްސިޑީގެ ގޮތުގައި ދޭ ފައިސާ، ކުންފުންޏަށް ދިނުމުގެ ބަދަލުގައި ބޭނުން ޖެހިފައިވާ މީހާގެ އަތައް ދޭ ގޮތައް ނިޒާމު ބަދަލު ކުރާނެ ކަމަށް ފިނޭންސް މިނިސްޓަރ މޫސާ ޒަމީރު ވިދާޅުވެއްޖެ އެވެ.

"އިޖްތިމާއީ ރައްކާތެރިކަން ކަށަވަރުކުރުމަށް ރައްޔިތުންނަށް ދެވޭ އެހީއާއި ސަބްސިޑީ އަކީ އެންމެ ބޭނުންޖެހިފައިވާ މީހާ ދެނެގަނެ، އެންމެ އިންސާފުވެރިކަމާއި އެކު ދެވޭ އެހީތަކަކަށް ހެދުމަކީ މުޅި އިޖުތިމާއީ ރައްކާތެރިކަމުގެ ނިޒާމު ހަރުދަނާކުރުމަށް ސަރުކާރުން އަޅަން ނިންމާފައިވާ މުހިންމު ފިޔަވަޅެއް," 2025 ވަނަ އަހަރުގެ ދައުލަތުގެ ބަޖެޓު ރައްޔިތުންގެ މަޖިލީހަށް ހުށަހަޅުއްވަމުން މިނިސްޓަރ ވިދާޅުވިއެވެ.

މިނިސްޓަރ ވިދާޅުވި ގޮތުގައި، އަސާސީ ޚިދުމަތްތައް ފޯރުކޮށްދޭ ސަރުކާރުގެ ކުންފުނިތަކަށް މިހާރު ދެމުންދާ ސަބްސިޑީތަކުގެ ބަދަލުގައި، އެންމެ ބޭނުންޖެހިފައިވާ ދިވެހިރައްޔިތުން ދެނެގަނެ، ސީދާ އެ ރައްޔިތު މީހާގެ ޖީބަށް ސަބްސީޑީ ލިބޭގޮތަށް ނިޒާމު ބަދަލުކުރަން އަންނަ އަހަރުގެ ބަޖެޓުގައި ހިމަނާފައިވާނެ ކަމަށެވެ.

މިނިސްޓަރ މިހެން ވިދާޅުވި ނަމަވެސް، އިންސާފުވެރިކަމާއެކު އެހީތެރިކަމަށް އެންމެ ބޭނުން ޖެހިފައިވާ މީހާ ކަނޑައަޅާނެ ގޮތެއް އަދި މީހާގެ އަތައް ފައިސާ ފޯރުކޮށްދޭނެ ގޮތުގެ ތަފްސީލު ދެއްވާފައެއް ނުވެއެވެ.

ފަރުދުންނަށް ސަބްސިޑީ ލިބޭ ގޮތައް ނިޒާމަށް ބަދަލު ގެންނަން މި އަހަރުގެ ބަޖެޓުގައިވެސް ހިމަނާފައިވާ ކަމަށް މިނިސްޓަރ ވިދާޅުވިއެވެ. 2024 ވަނަ އަހަރަށް އެމްޑީޕީ ސަރުކާރުން އެކުލަވާލި ބަޖެޓު ތަންފީޒު ކުރަން ހަވާލުވީ އަލަށް އިންތިޚާބުވި ޕީއެންސީ ސަރުކާރަށް ކަމަށް ވުމާއެކު އަހަރު ނިމިގެން ދިޔައިރުވެސް އެ ނިޒާމު އިސްލާހު ކުރެވިފައި ނުވާކަން ފާހަގަ ކުރެވެއެވެ.

މިނިސްޓަރ ބަޖެޓު ހުށަހަޅުއްވަމުން ވިދާޅުވީ، ފަރުދުންނަށް ސަބްސިޑީ ދޭ ނިޒާމަކަށް، ނިޒާމު ބަދަލު ނުކުރެވުނީ މިކަމުގެ ޢަމަލީ މަސައްކަތް ކުރީ  ސަރުކާރުން ކޮށްފައި ނެތުމުން އެކަން ތަންފީޒު ނުކުރެވުނީ ކަމުގައެވެ. މިނިސްޓަރު ވިދާޅުވީ، މިކަމާއި ގުޅޭގޮތުން ކުރަންޖެހޭ މަސައްކަތްތައްކޮށް 2025 ވަނަ އަހަރު އައު ނިޒާމަށް ހިޖުރަކުރެވޭ ވަރަށް ތައްޔާރުވެވިފައިވާ ކަމަށެވެ.