ވަކީލުން ހާޒިރު ނުވެގެން ސާޖިދާ އާއި ދެކޮޅަށް މަންދި ހުށަހެޅި މައްސަލަ ބާތިލުކޮށްފި
ސިވިލް ކޯޓުން ކުރި ހުކުމުގައި ވަނީ މަންދީ ދެއްކި ވާހަކަތަކުގެ ސަބަބުން ދަރިކަލުންގެ ކަރާމާތަށް ގެއްލުންވިކަން ސާބިތުވާ ކަމަށް
މަރިޔަމް ޒުބެއިރު، އެމްޑީޕީ މުޒާހަރާއެއްގެ ތެރެއިން ވާހަކަދައްކަނީ
ރައީސް ދަރިކަލުންގެ ކަރާމާތަށް މަރިޔަމް ޒުބައިރު (މަންދި) އަަރައިގަތް ކަމަށް ސިވިލް ކޯޓުން ނިންމި ނިންމުން ރިވިއުކޮށްދޭން އޭނާގެ ފަރާތުން ހުށަހެޅި މައްސަލައަށް ވަކީލުން ހާޒިރު ނުވެގެން އެ މައްސަލަ ބާތިލުކޮށްފި އެވެ.
މި މައްސަލައަކީ ރައީސްގެ އަނބިކަނބަލުން ސާޖިދާ މުހައްމަދު ސިވިލް ކޯޓަށް ހުށަހެޅުއްވި މައްސަލައިގައި، ދަރިކަލުންގެ ކަރާމާތަށް މަންދީ އަރައިގަތް ކަމަށް މަންދީގެ ޣައިރު ހާޒިރުގައި އެ ކޯޓުން ނިންމުމުން އެ ނިންމުން ރިވިއުކޮށްދިނުމަށް ސާޖިދާ އާއި ދެކޮޅަށް މަންދި ހުށަހެޅި މައްސަލައެކެވެ.
މައްސަލަ ބާތިލުކޮށް ސިވިލް ކޯޓުގެ ގާޒީ އާދަމް ޒާލިފް ނިންމެވި ނިންމެވުމުގައި ބުނެފައިވަނީ މަންދިގެ ފަރާތުން އައްޔަންކޮށްފައިވާ ލޯފާމުގެ 3 ވަކީލުން އައްޔަންކޮށްފައިވާ ކަމަށެވެ. އަދި އޮކްޓޯބަރު 29 ވަނަ ދުވަހުގެ 11:30 އަށް ދައުވާ ކުރާ ފަރާތުން ގަޑިއަށް ހާޒިރުވެފައި ނުވާތީ ދައުވާކުރާ ފަރާތުން އައްޔަންކޮށްފައިވާ ވަކީލުންގެ ތެރެއިން ވަކީލަކަށް 11:43 ހާއިރު ގުޅަން މަސައްކަތް ކުރުމުން ވެސް ފޯނަށް ޖަވާބެއް ނުދޭ ކަމަށާއި، ފަހުން ޖަވާބު ދީ ކޯޓަށް ދަނީ ކަމަށް ބުނެފައިވާ ކަމަށެވެ.
އަދި ފަހުން ވަކީލު ކޯޓުގެ ސެކްޝަނަށް ގުޅައި ލޯފާމުގެ ހުރިހާ ވަކީލުން ތިބީ ޝަރީއަތްތަކުގައި ކަމަށާއި ހުހަށް ހުރި ވަކީލު ބަލިވެ އުޅޭތީ ހާޒިރުވުމަށް އުޒުރުވެރިވާ ކަމަށް ބުނެ ލިޔުން ހުށަހަޅާނެ ކަމަށް ބުނެފައިވާ ކަމަށް ގާޒީގެ ނިންމެވުމުގައިވެ އެވެ.
އަދި ހާޒިރު ނުވެވުނު މަގުބޫލު ސަބަބެއް އޮތްކަން ބަޔާންކޮށް ރޭގަނޑު 7:00 އާއި ހަމައަށް ވެސް އެއްވެސް ލިޔުމެއް ހުށަހަޅާފައި ނުވާ ކަމަށާއި، އެހެންކަމުން ސިވިލް ކޯޓަށް މީހުން ހާޒިރުކުރުމުގައި އަމަލުކުރާނެ ގޮތުގެ ގަވާއިދުގެ 20 ވަނަ މާއްދާއަށް ރިއާޔަތްކޮށް މި މައްސަލަ ބާތިލުކުރެވިދާނެ ކަން އެނގެން އޮތްހިނދު މި މައްސަލަ އިތުރަށް ކުރިއަށް ގެންދަން ނުފެންނަ ކަމަށް ގާޒީ ވަނީ ނިންމަވާފަ އެވެ.
