ކުރީގެ މެންބަރު ޝިޔާން ކްރެޑިޓް ކާޑަށް 10,000 ޑޮލަރު ދައްކަން ހުކުމްކޮށްފި

ތޮއްޑޫ ދާއިރާގެ ކުރީގެ މެންބަރު ހަސަން ޝިޔާން ބީއެމްއެލް އިން ނަގާފައިވާ ކްރެޑިޓް ކާޑަށް ނުދައްކާ ހުރި ފައިސާ ދެއްކުމަށް ހުކުމްކޮށްފިއެވެ.

މި މައްސަލަ އަކީ ޝިޔާން އަށް 119،992 ރުފިޔާގެ ކްރެޑިޓް ކާޑް ލިމިޓެއް ދޫކުރެވި އެ ލިމިޓުގެ ދަށުން ދޫކޮށްފައިވާ ވިސާ ޕްލެޓިނަމް ކްރެޑިޓް ކާޑުން ބޭނުންކޮށްފައިވާ އިރު، އެއްބަސްވެފައިވާ ގޮތަށް ފައިސާ ދައްކާފައިނުވާތީ، މި މުއާމަލާތްތަކާ ގުޅިގެން ދައްކަންޖެހޭ އެންމެހާ ފައިސާ، އިންޓްރެސްޓާއި ޖޫރިމަނާ އެކު އެއްފަހަރާ ހޯދުމަށް އެދި ބީއެމްއެލް އިން ދައުވާ ކުރި މައްސަލައެކެވެ.

ސިވިލް ކޯޓުގެ ހުކުމުގައި ބުނެފައިވަނީ ޝިޔާންގެ މައްޗަށް ބީއެމްއެލް އިން ކުރި ދައުވާ ޝަރިއަތަށް ސާބިތުވާ ކަމަށް ކަނޑައަޅައި، ދައުވާ ލިބވޭ ފަރާތަށް ދޫކޮށްފައިވާ ކްރެޑިޓް ކާޑަށް 16 އޮކްޓޯބަރު 2025 ގެ ނިޔަލަށް 10،069.87 އެމެރިކާ ޑޮލަރު ނުދައްކާ ކަމަށެވެ. އަދި ރިކަވަރީ ފީގެ ގޮތުގައި ޗާޖްކުރެވޭ 5000 ރުފިޔާއާ އެކު މި އެންމެހާ ފައިސާއެއް އިތުރަށް އަރަމުންދާ އިންޓްރެސްޓާއި ޖޫރިމަނާގެ ފައިސާއާއެކު ދެއްކުމުގެ ގޮތުން، ކޮންމެ މަހަކުވެސް އެމަހަކަށް ޖެހޭ މިންވަރަށްވުރެ މަދުނޫން އަދަދެއްގެ ފައިސާ ބީއެމްއެލް އަށް ދެއްކުމަށެވެ.

އެމްޑީޕީގެ މެމްބަރެއްގެ ގޮތުގައި 19 ވަނަ މަޖިލިހަށް އިންތިޚާބުވި ނަމަވެސް ފަހުން ރައީސް މުއިއްޒުގެ ޕާޓީ ޕީއެންސީ އަށް ސޮއި ކުރެއްވި ޝިޔާން އަށް ކުރި ހުކުމުގައި ބުނެފައިވާ ފައިސާ ދައްކަމުން ގޮސް 12 މަސްދުވަހުގެ ތެރޭގައި ދަރަނި ހަލާސްކުރުމަށް އަންގާފައި ވެއެވެ.