އދގެ ޢާއްމު މަޖިލީހުގެ ރައީސުންގެ ކައުންސިލް ބައްދަލުވުމުގައި ކުރީގެ ޚާރިޖީ ވަޒީރު އަދި އާއްމު މަޖިލީހުގެ 76 ވަނަ ސެޝަންގެ ރައީސް ޢަބްދުﷲ ޝާހިދު ބައިވެރިވެވަޑައިގެންފި އެވެ.

މި ބައްދަލުވުން އޮތީ ޤަތަރުގެ ވެރިރަށް ދޯހާ ގައެވެ.

ޢާއްމު މަޖިލީހުގެ ކުރީގެ 13 ރައީސަކު ބައިވެރިވެވަޑައިގެންނެވި މި ބައްދަލުވުމަށްފަހު ނެރުނު ދޯހާ ޑެކްލަރޭޝަންގައި، އާއްމު މަޖިލީހުގެ ރައީސުން ވަނީ 21 ވަނަ ޤަރުނުގެ މައްސަލަތަކަށް ހައްލު ހޯދުމަށް މަސައްކަތްކުރެވޭ ތަނަކަށް އދ ހެދުމަށް، ގެންނަން ޖެހޭ ބަދަލުތައް ފާހަގަކުރައްވާފަ އެވެ. އެގޮތުން ދޭދޭ ޤައުމުތަކުގެ މެދުގައި އުފެދޭ މައްސަލަތައް ހައްލުކޮށް، ދުނިޔޭގައި ސުލްހަ މަސަލަސްކަން ދެމެހެއްޓުމަށް އދ އުފެއްދި މައިގަނޑު މަޤްސަދަށް އަނެއްކާވެސް ރުޖޫޢަވެ، ބައިނަލްއަޤްވާމީ ޤާނޫނުތަކުގެ ބާރު ނެގެހެއްޓުމަށް ކައުންސިލުން ވަނީ ގޮވާލާފަ އެވެ. އަދި ތިމާވެށިގެ ސަމިޓްގައި އެކުލަވާލެވުނު ޕެރިސް އެގްރިމެންޓްގައިވާ ކަންކަން ތަންފީޒުކުރުމަށް ޤައުމުތަކުން ކުރަން ޖެހޭ ކަންކަން ކުރުމަށް އދ އިން ބާރު އެޅުމަށްވެސް ކައުންސިލުން ގޮވާލި އެވެ.

ދޯހާގައި ބެއްވި ކައުންސިލް އޮފް ޕްރެޒިޑެންޓްސް އޮފް ދަ ޔޫ.އެން ޖެނެރަލް އެސެމްބްލީގައި އެ ކައުންސިލްގެ ރައީސްކަމަށް ޤަތަރުގެ ނާސިރް އަބްދުލްޢަޒީޒް ނާސިރު މެމްބަރުންގެ އިއްތިފާޤުން ވަނީ އިންތިޚާބުކޮށްފަ އެވެ. ނާސިރު އަކީ އދގެ 66 ވަނަ ދައުރުގެ އާއްމު މަޖިލީހުގެ ރައީސެވެ. އަދި ނައިބު ރައީސާކަމަށް އިކުއެޑޯރގެ މާރިއާ ފެނާންޑާ އެސްޕިނޯސާ ވެސް ވަނީ އިންތިޚާބު ކޮށްފައެވެ. އެކަމަނާ އަކީ 73 ވަނަ ސެޝަންގެ ރައީސާ އެވެ.

ޝާހިދު އދގެ އާއްމު މަޖިލީހުގެ ރިޔާސަތު ބެލެހެއްޓެވީ އެމަޖިލީހުގެ 76 ވަނަ ސެޝަންގައި، 2021 ވަނަ އަހަރުގެ ސެޕްޓެމްބަރުން 2022 ވަނަ އަހަރުގެ ސެޕްޓެމްބަރަށެވެ.

1997 ވަނަ އަހަރު އުފެއްދި ކައުންސިލް އޮފް ޔޫ.އެން ޖެނެރަލް އެސެމްބްލީ ޕްރެޒިޑެންޓްސް އަކީ އދގެ އާއްމު މަޖިލީހުގެ ރިޔާސަތަށާއި، އާއްމު މަޖިލީހަށް ލަފާ އަރުވާ، އެ މަޖިލީހުގެ މަސައްކަތަކާއި މަލްޓިލޭޓަރަލިޒަމް ކުރިއަރުވާ ކައުންސިލެވެ. މި ކައުންސިލްގެ މެމްބަރުންނަކީ އދގެ އާއްމު މަޖިލީހުގެ ރައީސްކަން ކުރައްވާފައިވާ ބޭފުޅުންނާއި، އެވަގުތު ހިނގަމުންދާ ކައުންސިލްގެ ރައީސެވެ.