ވެނެޒުއޭލާ ގެ ރައީސް މަގާމުން ދުރުކުރަން އެމެރިކާ ސަރުކާރުން ސިއްރު އަސްކަރީ އޮޕަރޭޝަނެއް ފަށަނީ
އެމެރިކާ ސަރުކާރުން ވެނެޒުއޭލާގެ ރައީސް މަދޫރޯ މަގާމުން ދުރުކުރުމަށް ސިއްރު އަސްކަރީ އޮޕަރޭޝަނެއް ފަށަން ތައްޔާރުވަމުންދާ ކަމަށް އޮފިޝަލުންނަށް ހަވާލާދީ ރިޕޯޓުތައް ބުނެފިއެވެ. މަސްތުވާތަކެތީގެ ވިޔަފާރިއާ ގުޅުވައި މަދޫރޯގެ ސަރުކާރަށް ފިއްތުންތައް ބޮޑުކުރަމުން ދާއިރު، ވެނެޒުއެލާގެ ރައްޔިތުންނާއި އަސްކަރިއްޔާ އިން ކޮންމެ މިފަދަ މަސައްކަތަކަށް ދެކޮޅު ހަދާނެ ކަމަށް މަދޫރޯ ވިދާޅުވި.
ވެނެޒުއެލާގެ ރައީސް ނިކޮލަސް މަދޫރޯ ވެނެޒުއެލާގެ ދަރިވަރުގެ ދުވަސް ފާހަގަކުރުގައި ބައިވެރިވެވަޑައިގަންނަވަނީ - ނޮވެމްބަރު 21، 2025
ވެނެޒުއޭލާގެ ރައީސް ނިކޮލަސް މަދޫރޯ މަގާމުން ދުރުކުރަން އެމެރިކާ ސަރުކާރުން ސިއްރު އަސްކަރީ އޮޕަރޭޝަނެއް ފަށަން ތައްޔާރުވަމުންދާ ކަމަށް މިކަމުގެ މައުލޫމާތު އެނގޭ އޮފިޝަލަކާ ހަވާލާދީ ރޮއިޓާސް އިން ރިޕޯޓު ކޮށްފި އެވެ.
ރޮއިޓާސް އަށް މަޢުލޫމާތު ދެމުން އެމެރިކާގެ ހަތަރު އޮފިޝަލަކު ބުނީ، ރައީސް ނިކޮލަސް މަދޫރޯގެ ސަރުކާރަށް ޓްރަމްޕްގެ ސަރުކާރުން ފިއްތުންތައް ބޮޑު ކުރަމުންދާ ދަނޑިވަޅެއް ގައި، ކުރިއަށް އޮތް ދުވަސްތަކުގެ ތެރޭގައި ވެނެޒުއެލާއާ ގުޅުންހުރި އަސްކަރީ އޮޕަރޭޝަންތަކެއްގެ އާ މަރުހަލާއެއް ފެށުމަށް އެމެރިކާއިން ތައްޔާރުވަމުން އަންނަ ކަމަށެވެ.
އެމެރިކާގެ ދެ އޮފިޝަލަކު ބުނެފައިވަނީ، މަދޫރޯއާ ދެކޮޅަށް ފަށާ އާ ހަރަކާތުގެ ފުރަތަމަ ބައިގައި ހިންގާނީ ސިއްރު އޮޕަރޭޝަންތަކެއް ކަމަށް ބެލެވޭ ކަމަށެވެ. މި ކަމާ ބެހޭ ގޮތުން ރޮއިޓާސް އަށް ވާހަކަ ދެއްކި ހަތަރު އޮފިޝަލުން ވެސް ވާހަކަ ދެއްކީ، އެމެރިކާ އިން އަޅަން ނިންމާފައިވާ ފިޔަވަޅުތަކުގެ ނާޒުކުކަމަށްޓަކައި، އެ މީހުންގެ ނަން ހާމަނުކުރުމަށް ޝަރުޠުކޮށެވެ.
ޕެންޓަގަނުން ވަނީ މިކަމާ ގުޅޭ ސުވާލުތައް ވައިޓް ހައުސްއާ ކުރުމަށް އަންގާފައެވެ. އަދި ސީއައިއޭ އިން ވަނީ މިކަމާ ގުޅޭ ގޮތުން އެއްވެސް އެއްޗެއް ބުނުމަށް ދެކޮޅު ހަދާފައެވެ.
ހޮނިހިރު ދުވަހު ސަރުކާރުގެ އިސް އޮފިޝަލަކު ބުނެފައިވަނީ ވެނެޒުއެލާއާ ގުޅޭގޮތުން އަޅަން ޖެހޭ އެއްވެސް ފިޔަވަޅެއް އިސްތިސްނާ ނުކުރާ ކަމަށެވެ.
ނަން ހާމަނުކުރުމަށް ޝަރުޠުކޮށް އެ އޮފިޝަލު ބުނީ، "އެމެރިކާ އަށް މަސްތުވާތަކެތި އެތެރެވުން ހުއްޓުވުމަށާއި، އެކަމުގެ ޒިންމާ އުފުލަންޖެހޭ ފަރާތްތައް ޤާނޫނުގެ ކުރިމައްޗަށް ގެނައުމަށް އެމެރިކާގެ ބާރުގެ ދަށުގައިވާ ހުރިހާ ވަސީލަތެއް ބޭނުންކުރަން ރައީސް ޓްރަމްޕް ހުންނެވީ ތައްޔާރަށް،" ކަމަށެވެ.
ޓްރަމްޕްގެ ސަރުކާރުން ދަނީ އެމެރިކާގެ ރައްޔިތުން މަރުވާން މެދުވެރިވާ ގަވާއިދާ ޚިލާފު މަސްތުވާތަކެތި ފޯރުކޮށްދިނުމުގައި މަދޫރޯ އަދާކުރާ ކަމަށް ބުނާ ދައުރާ ދެކޮޅަށް ފިޔަވަޅު އެޅުމަށް ވެނެޒުއެލާއާ ގުޅުންހުރި ގޮތްތައް ދިރާސާ ކުރަމުންނެވެ. ނަމަވެސް މަދޫރޯ ވަނީ މަސްތުވާތަކެތީގެ ވިޔަފާރިއާ އޭނާއާ ގުޅުވައިގެން އެމެރިކާ އިން ދައްކާ ވާހަކަ ތައް ދޮގުކުރައްވާފައެވެ.
އެމެރިކާގެ ދެ އޮފިޝަލަކު ރޮއިޓާސް އަށް ބުނީ، ދިރާސާ ކުރަމުންދާ ގޮތްތަކުގެ ތެރޭގައި މަދޫރޯ ވެރިކަމުން ދުރުކުރުމުގެ މަސައްކަތް ކުރުން ވެސް ހިމެނޭ ކަމަށެވެ.
2013 ވަނަ އަހަރުން ފެށިގެން ވެރިކަމުގައި ހުންނެވި މަދޫރޯ ވިދާޅުވަމުން ގެންދަވަނީ، ޓްރަމްޕް މަސައްކަތް ކުރައްވަނީ އޭނާ ވެރިކަމުން ދުރުކުރުމަށް ކަމަށާއި، އެފަދަ ކޮންމެ މަސައްކަތަކަށް ވެނެޒުއެލާގެ ރައްޔިތުންނާއި އަސްކަރިއްޔާއިން ދެކޮޅު ހަދާނެ ކަމަށެވެ.
އާދީއްތަ ދުވަހު 63 ވަނަ އުފަންދުވަސް ފާހަގަކުރައްވާ ވެނެޒުއެލާގެ ރައީސް، ހޮނިހިރު ދުވަހުގެ ރޭ ވަނީ އޭނާގެ ހަޔާތުގެ މައްޗަށް ބިނާކޮށް އުފައްދާފައިވާ ޓީވީ ސިލްސިލާއެއްގެ ފުރަތަމަ ބައި ދެއްކުމަށް ކަރާކަސްގެ މައި ތިއޭޓަރުގައި ބޭއްވި ރަސްމިއްޔާތެއްގައި ބައިވެރިވެވަޑައިގެންފަ އެވެ.
ކެރީބިއަން ސަރަޙައްދުގައި އެމެރިކާގެ އަސްކަރީ ބާރު ގަދަކުރުމުގެ މަސައްކަތް ކުރާތާ މަސްތަކެއް ވެފައިވާއިރު، ވެނެޒުއެލާ ގައި ސިއްރު ސީއައިއޭ އޮޕަރޭޝަންތައް ހިންގުމުގެ ހުއްދަ ޓްރަމްޕް ވަނީ ދެއްވާފައެވެ. އެމެރިކާގެ ފެޑެރަލް އޭވިއޭޝަން އެޑްމިނިސްޓްރޭޝަން (އެފްއޭއޭ) އިން ހުކުރު ދުވަހު ވަނީ ބޮޑެތި އެއަރލައިންތަކަށް އިންޒާރުދީ، ވެނެޒުއެލާގެ މަތިން ދަތުރުކުރުމަކީ "ނުރައްކާތެރިވެދާނެ ކަމެއް" ކަމަށާއި، އެކަމަށް ސަމާލުވުމަށް އަންގާފައެވެ.
އެފްއޭއޭގެ އިންޒާރާ ގުޅިގެން ބައިނަލްއަޤްވާމީ ތިން އެއަރލައިނަކުން ހޮނިހިރު ދުވަހު ވެނެޒުއެލާ އިން ފުރަން އޮތް ދަތުރުތައް ވަނީ ކެންސަލްކޮށްފައެވެ.
