ރައީސް ޓްރަމްޕްގެ ފަރާތުން ވެނެޒުއޭލާ އަށް ކުރިމަތިވަމުން އަންނަ "ނުރައްކާތަކާ" ކުރިމަތިލުމަށް އެހީތެރިވެ ދިނުމަށް ރައީސް މަދޫރޯ އޯޕެކް ގެ މެމްބަރުންނަށް ގޮވާލައްވައިފި

އެމެރިކާ އަދި އެ ގައުމުގެ ރައީސް ޑޮނަލްޑް ޓްރަމްޕްގެ ފަރާތުން ވެނެޒުއޭލާ އަށް ކުރިމަތިވަމުން އަންނަ "ނުރައްކާތަކާ" ކުރިމަތިލުމަށް އެހީތެރިވެ ދިނުމަށް އެ ގައުމުގެ ރައީސް ނިކޮލަސް މަދޫރޯ އޯޕެކް (ތެޔޮ އުފައްދާ ގައުމުތަކުގެ ޖަމްޢިއްޔާ) ގެ މެމްބަރު ގައުމުތަކަށް ގޮވާލައްވައިފި އެވެ.

އާދިއްތަ ދުވަހު، އޯޕެކް ގެ މެންބަރުންނަށް ފޮނުއްވި ސިޓީއެއް ގައި މަދޫރޯ ވިދާޅުވެފައިވަނީ، ދުނިޔޭގައި އެންމެ ބޮޑު ތެލުގެ ރިޒާވް ހުރި ގައުމު ކަމަށްވާ ވެނެޒުއޭލާގެ ތެޔޮ ރިޒާވްތައް "ހިފަން" އެމެރިކާ އިން މަސައްކަތް ކުރަމުން ގެންދާ ކަމަށެވެ.

ސަރުކާރުގެ ބްރޯޑްކާސްޓަރ އިން ނެރުނު ސިޓީގެ ކޮޕީ އެއް ގައި މަދޫރޯ ވިދާޅުވެފައި ވަނީ، "މި ހަމަލާ ހުއްޓުވުމަށް، އެ ގައުމުތަކުގެ އެންމެ ބޮޑު އެހީތެރިކަމަށް އުންމީދު ކުރައްވާ ކަމަށެވެ. އޭނާގެ ސިޓީ ގައި އެމެރިކާ ގެ ނުރައްކާތެރިކަން ދަނީ ވަރުގަދަވަމުން ކަމަށާއި، އަދި ތެޔޮ އުފައްދާ އަދި ބޭނުންކުރާ ގައުމުތަކަށް ވެސް ބައިނަލްއަޤްވާމީ ތެލުގެ ބާޒާރުގެ ހަމަޖެހުމަށް ސީރިއަސް ނުރައްކަލެއް އެމެރިކާގެ މި އަމަލުގެ ސަބަބުން ކުރިމަތިވެފައިވާ ކަމަށް ވިދާޅުވެފައި ވެއެވެ.

މަދޫރޯ ވަނީ، ވެނެޒުއޭލާގެ ސަރަހައްދަށާއި އާންމު ރައްޔިތުންނަށް އެމެރިކާ އިން ކުރިމަތިކުރަމުންދާ ނުރައްކާ ކުށްވެރި ކުރައްވާފަ އެވެ.

ވެނެޒުއޭލާ އަށް ދުނިޔޭގެ އެންމެ ބޮޑު ތެލުގެ ރިޒާވް (2023 ވަނަ އަހަރުގެ ނިޔަލަށް 303 ބިލިއަން ފީފާ އަށް ވުރެ ގިނަ ތެޔޮ ހުރިކަމަށް ލަފާކުރެވޭ) ލިބިފައި ވިޔަސް، 2023 ވަނަ އަހަރު އެ ގައުމުން އެކްސްޕޯޓް ކޮށްފައި ވަނީ ޖުމްލަ 4.05 ބިލިއަން ޑޮލަރުގެ ތެލެވެ. މިއީ ތެޔޮ އުފައްދާ އެހެން މުހިންމު ގައުމުތަކާ އަޅާބަލާއިރު ވަރަށް ކުޑަ އަދަދެކެވެ. މީގެ ބައެއް ސަބަބުތަކުގެ ތެރޭގައި ޓްރަމްޕް ގެ ފުރަތަމަ ދައުރުގައި އެމެރިކާ އިން އެޅި ދަތިކުރުމުގެ ފިޔަވަޅުތައް ހިމެނެއެވެ.

އީރާނާއި، އިރާޤާއި، ކުވައިތާއި، ސަޢޫދީ ޢަރަބިއްޔާ އާ އެކު، ލެޓިން އެމެރިކާގެ މި ގައުމަކީ 1960 ގައި އޯޕެކް އުފެއްދުމުގައި ބައިވެރިވި ގައުމެކެވެ.

މަދޫރޯ ގެ ސިޓީ އޯޕެކް ގައުމުތަކަށް ފޮނުއްވީ، ޓްރަމްޕް އޭނާގެ ޓްރޫތު ސޯޝަލް ޕްލެޓްފޯމްގައި، ވެނެޒުއޭލާ ގެ ވައިގެ ސަރަހައްދު ބަންދުކޮށްފައިވާ ކަމަށް ލިޔުއްވިތާ އެއް ދުވަސް ފަހުންނެވެ.

ޓްރަމްޕް ގެ ސަރުކާރުގެ އަސްކަރީ ބާރު ކެރިބިއަން ސަރަހައްދުގައި ފުޅާކުރަމުން ދަނީ އެ ގައުމުގެ ތެޔޮ އަދި ގޭސް ރިޒާވްތަކަށް އަތްގަދަ ކުރަން ކަމަށް، މަދޫރޯގެ ސަރުކާރުން މީގެ ކުރިން ވެސް އެތައް ފަހަރަކު ބުނެފައި ވެއެވެ.

ވައިޓް ހައުސް އިން ބުނާ ގޮތުގައި އެމީހުންގެ ސަމާލުކަން ހުއްޓިފައިވަނީ މަސްތުވާތަކެތި އެތެރެކުރުމާ ދެކޮޅަށް ހަނގުރާމަ ކުރުމަށެވެ. މިހެން އެމެރިކާ އިން ބުނި ނަމަވެސް، ފާޑުކިޔާ ފަރާތްތަކުން ފާހަގަކޮށްފައިވާ ގޮތުގައި ވޮޝިންގޓަން އިން އަމިއްލަ އަށް އެއްކޮށްފައިވާ މައުލޫމާތުތަކުން ދައްކާ ގޮތުގައި ވެނެޒުއޭލާ އަކީ އެމެރިކާ އަށް މަސްތުވާތަކެތި އެތެރެކުރާ މައިގަނޑު ގައުމެއް ނޫނެވެ.

ކެރިބިއަން ސަރަހައްދަށް ޖަމާކޮށްފައިވާ އެެމެރިކާ ގެ އަސްކަރީ އުޅަނދުތަކުން މަސްތުވާތަކެތި އުފުލާ ކަމަށް ތުހުމަތުކުރާ އުޅަނދުތަކަށް އެމެރިކާ އިން މިހާތަނަށް ދިން ހަމަލާތަކުގައި މަދުވެގެން 83 މީހުން މަރުވެފައިވެއެވެ. އިންސާނީ ހައްގުތަކަށް ވަކާލާތުކުރާ ފަރާތްތަކުން މި ހަމަލާތަކަކީ ބައިނަލްއަޤްވާމީ ގާނޫނާ ޚިލާފު ކަމެއް ކަމަށާއި، އަދި މިއީ ގާނޫނާ ޚިލާފަށް މީހުން މެރުން ކަމަށް ބުނެ ކުށްވެރިކޮށްފައިވެއެވެ.

އެމެރިކާ އިން ވަނީ ކެރިބިއަން ސަރަހައްދަށް، ދުނިޔޭގެ އެންމެ ބޮޑު އެއަރކްރާފްޓް ކެރިއަރ، ޔޫއެސްއެސް ޖެރަލްޑް އާރް ފޯޑް އާއި އެހެން ހަނގުރާމަމަތީ ބޯޓުފަހަރު ފޮނުވުމުގެ އިތުރުން އެތައް ހާސް ސިފައިންނާއި އެފް-35 ފައިޓަރ ޖެޓް ހިމެނޭ ގޮތަށް ބޮޑު އަސްކަރީ ބާރެއް ފޮނުވާފައެވެ.