ވެނެޒުއޭލާ ސަރަހައްދު ގައި އެމެރިކާގެ އަސްކަރީ ހަރަކާތްތައް ފުޅާކޮށް، އެއާކްރާފްޓް ކެރިއާ ސްޓްރައިކް ގްރޫޕެއް ކެރެބިއަން ސަރަހައްދަށް ވަދެއްޖެ

އެމެރިކާގެ ސިފައިން އާދީއްތަ ދުވަހު އިއުލާންކުރި ގޮތުގައި އެއާކްރާފްޓް ކެރިއާ ސްޓްރައިކް ގްރޫޕެއް ކެރިބިއަންއަށް ވަދެއްޖެ އެވެ. މިއާ އެކު، ވެނެޒުއެލާ ގެ ކައިރީގައި އެމެރިކާގެ ސިފައިންގެ ހަރަކާތް ވަރަށް ބޮޑަށް ވަނީ ފުޅާ ކޮށްފަ އެވެ.

އެމެރިކާގެ ރައީސް ޑޮނަލްޑް ޓްރަމްޕް ކެރިބިއަން ގައި ސިފައިން އިތުރުކުރުމަށް އަމުރު ކުރައްވާފައި ވަނީ މަސްތުވާތަކެތީގެ ވިޔަފާރި އާ ދެކޮޅަށް އަޅާ ފިޔަވަޅެއްގެ ގޮތުގައި ނަމަވެސް، ވޮޝިންޓަނުން ވެނެޒުއެލާގެ ރައީސް ނިކޮލަސް މަދޫރޯ އާ ދެކޮޅަށް ސިފައިންގެ ހަމަލާ އެއް ދިނުމަށް ވިސްނަމުންދާ ކަމަށް ބައެއް ފަރާތްތަކުން ބުނަމުންދެއެވެ.

ލެޓިން އެމެރިކާ އާއި ކެރިބިއަން ގައި އެމެރިކާގެ ސިފައިންގެ މަސައްކަތް ބަލަހައްޓާ އެމެރިކާގެ ސަދަން ކޮމާންޑް (ސައުތްކޮމް) އިން ބުނެފައި ވަނީ ޔޫއެސްއެސް ޖެރަލްޑް އާރު ފޯޑް ކެރިއާ ސްޓްރައިކް ގްރޫޕް އެފަރާތުގެ ޒިންމާ ހިނގާ ސަރަހައްދަށް ވަދެފައިވާ ކަމަށެވެ.

އާދީއްތަ ދުވަހު ސައުތުކޮމް ގެ ބަޔާނެއް ގައި އިއުލާންކުރި ގޮތުގައި ސްޓްރައިކް ގްރޫޕް ކެރިބިއަން ކަނޑަށް ވަދެފައިވާއިރު، މި ފިޔަވަޅަކީ ޓްރަމްޕް "އެމެރިކާ ދިފާއު ކުރުމުގައި ބައިނަލްއަގުވާމީ ކްރިމިނަލް ޖަމާއަތްތައް ނައްތާލުމަށާއި މަސްތުވާތަކެއްޗާ ދެކޮޅަށް މަސައްކަތް ކުރުމަށް" ދެއްވި އިރުޝާދާ ގުޅިގެން އަޅާފައިވާ ފިޔަވަޅެއް ކަމަށް ބުނެފައިވެއެވެ.

ސްޓްރައިކް ގްރޫޕް ގައި އެމެރިކާގެ އެންމެ ޒަމާނީ އެއާކްރާފްޓް ކެރިއާ އާއި، ދެ ގައިޑެޑް-މިސައިލް ޑިސްޓްރޯޔަރާއި، އެހެނިހެން ސަޕޯޓް ބޯޓުތަކާއި އެއާކްރާފްޓްތައް ހިމެނެއެވެ.

މިއީ "އޮޕަރޭޝަން ސަދަން ސްޕިއާ" ގެ ނަމުގައި ކެރިބިއަން ގައި ވަރަށް ގިނަ ހަނގުރާމަ މަތީ ބޯޓުތަކާ އެކު ހިންގާ އޮޕަރޭޝަނެއް ކަމަށް ރިޕޯޓުތައް ބުނެ އެވެ.

ސެޕްޓެމްބަރު މަހު މަސްތުވާތަކެތީގެ ވިޔަފާރި އާ ދެކޮޅަށް އެމެރިކާ ސިފައިންހަނގުރާމަ ފެށިފަހުން މިހާތަނަށް، އޭއެފްޕީން އާންމުކޮށްފައިވާ ތަފާސްހިސާބުތަކުގައިވާ ގޮތުން، އެމެރިކާގެ ސިފައިން ބައިނަލްއަގުވާމީ ކަނޑުގައި މަސްތުވާތަކެތި އުފުލާކަމަށް ތުހުމަތުކުރެވޭ މަދުވެގެން 80 މީހުން މަރާލާފައިވެއެވެ.

ކެރިބިއަން އާއި އިރުމަތީ ޕެސިފިކް ގައި ދިން 20 ހަމަލާ ގައި މަރުވި މީހުންނަކީ މަސްތުވާތަކެތީގެ ވިޔަފާރިވެރިން ކަމަށް އެމެރިކާ އިން ބުނި ނަމަވެސް އެކަން ސާބިތު ކުރުމަށް އެއްވެސް ތަފްސީލެއް އެ ގައުމުން ހާމަ ކޮށްފަ އެއް ނުވެއެވެ.

މާހިރުން ބުނާ ގޮތުގައި، އެ އެމީހުންނަކީ މަސްތުވާތަކެތީގެ ވިޔަފާރި ކުރާ ފަރާތްތައް ކަމުގައި ވިޔަސް ބެލެވޭނީ އެ މީހުން މަރާލާފައި ވަނީ ގާނޫނީ އިޖުރާއަތުތަކެއް ނެތި ކަމުގައެވެ.

އަނެއް ކޮޅުން ވެނެޒުއޭލާ އިން ދެކެނީ އެމެރިކާ ސިފައިންގެ ހަރަކާތް އިތުރުކުރުމަކީ ސީދާ ބިރުދެއްކުމުގެ އަމަލެއްގެ ގޮތުގައެވެ.

އެމެރިކާ އިން ވެނެޒުއޭލާގެ ރައީސް މަދޫރޯ އަކީ އެ ގައުމުގެ ގާނޫނީ ރައީސްކަމުގައި ގަބޫލެއް ނުކުރެ އެވެ. އެމެރިކާ އިން ބުނަނީ ރައީސް މަދޫރޯ އަކީ މަސްތުވާތަކެތީގެ ކާޓެލެއްގެ ލީޑަރެއް ކަމަށެވެ. އަދި މަސްތުވާތަކެތީގެ ވިޔަފާރި ކުރާ ކަމުގެ ތުހުމަތުގައި އޭނާ ހައްޔަރު ކުރުމަށް އެހީވެދޭ ފަރާތަކަށް 50 މިލިއަން ޑޮލަރުގެ އިނާމެއް އެމެރިކާ އިން ހުށަހަޅާފައި ވެއެވެ.