މަސްއޫލިއްޔަތުން އެކަހެރި ކޮށްފައިވާ ފުލުހުންގެ އިސް އޮފިސަރުގެ މައްސަލަ އަލުން ބަލަނީ
ގާސިމާ ބައްދަލުކުރި ކަމަށް ބުނެ ރޯދަ މަހުގެ ތެރޭގައި
ފުލުހުންގެ މައި އިދާރާ، ޝަހީދު ހުސެއިން އާދަމް ބިލްޑިންގ
ޖުމްހޫރީ ޕާޓީގެ ލީޑަރު ގާސިމް އިބްރާހިމްއާ ބައްދަލުކުރި ކަމަށް ބުނެ މަގާމު މަސްއޫލިއްޔަތުން އެކަހެރިކޮށްފައިވާ ފުލުހުންގެ ކްރައިމް އިންވެސްޓިގޭޝަން ޑިޕާޓްމެންޓުގެ ޑެޕިއުޓީ ކޮމާންޑަރު ޗީފް ސުޕްރިންޓެންޑެންޓް އަބްދުﷲ އަހުމަދުގެ މައްސަލަ އަލުން ބެލުމަށް ނިންމައިފި އެވެ.
ރާއްޖެއެމްވީއަށް އިތުބާރު ހުރި މަސްދަރަކުން މައުލޫމާތު ލިބިފައިވާ ގޮތުގައި ރޯދަ މަހުގެ ތެރޭގައި ގާސިމާ ބައްދަލުކުރި ކަމަށް ބުނެ އަބްދުﷲ އަހުމަދުގެ ސުލޫކީ މައްސަލައެއް ޑިސިޕްލިނަރީ ބޯޑުން ބެލި އެވެ. އެ ބޯޑުން އެ މައްސަލަ ބެލުމަށް ފަހު ފުރަތަމަ ނިންމާފައިވަނީ އޭނާއާ މެދު އެއްވެސް ފިޔަވަޅެއް ނޭޅުމަށެވެ.
އެހެންނަމަވެސް، ޑިސިޕްލިނަރީ ބޯޑުގެ އެ ނިންމުމާ މެދު "ވެރިޔަކު" ހިތްހަމަނުޖެހުމުން އަނެއްކާ މައްސަލަ ބެލުމަށް ފަހު މަގާމުގެ މަސްއޫލިއްޔަތުތަކުން އޭނާ އެކަހެރި ކުރީ އެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި މަގާމުގެ މަސްއޫލިއްޔަތުން އެކަހެރިކޮށްފައި ހުންނަތާ ތިން މަހަށް ވުރެ ގިނަ ދުވަސް ފަހުން، އަނެއްކާ ވެސް އޭނާގެ މައްސަލަ ބެލުމަށް ފުލުހުންގެ ޑިސިޕްލިނަރީ ބޯޑުން ވަނީ ނިންމާފަ އެވެ.
ޗީފް ސުޕްރިންޓެންޑެންޓް އަބްދުﷲ އަހުމަދަކީ ކްރައިމް އިންވެސްޓިގޭޝަން ޑިޕާޓްމެންޓުގެ ޑެޕިއުޓީ ހެޑްގެ މަގާމަށް ހަމަޖެއްސުމުގެ ކުރިން، ފުލުހުންގެ ފޮރެންސިކް ޑިޕާޓްމެންޓުގެ ވެރިޔެކެވެ.
ކްރައިމް އިންވެސްޓިގޭޝަން ޑިޕާޓްމެންޓުގެ ޑެޕިއުޓީ ހެޑްގެ މަގާމަށް އޭނާ ހަމަޖެއްސީ އެ މަގާމުގައި ކުރިން ހުންނެވި، ޗީފް ސުޕަރިންޓެންޑެންޓް އޮފް ޕޮލިސް މުހައްމަދު ރިޔާޒު ކޮމިޝަނަރުގެ ބިއުރޯއަށް ބަދަލުކުރުމަށް ފަހުގަ އެވެ.
މިކަމާ ގުޅޭ ގޮތުން ފުލުހުންނާ ސުވާލުކުރުމުން ބުނީ ވަކިވަކި ފުލުހުންގެ މަސްއޫލިއްޔަތުތަކާ ގުޅޭ މައުލޫމާތު މީޑިއާއަށް ހަމާނުކުރާ ކަމަށެވެ.
