ރާއްޖޭގައި ނިއޯނޭޓަލް ނާސިންގ ގައި ޚާއްސަވެފައިވާ ސްޕެޝަލައިޒްޑް ނަރުހެއް ނެތް: އައިޖީއެމްއެޗްގެ ސީއީއޯ

ދިވެހިރާއްޖޭގައި ނިއޯނޭޓަލް ނާސިންގ ގައި ޚާއްސަވެފައިވާ ސްޕެޝަލައިޒްޑް ނަރުހެއް ނެތް ކަމަށް އައިޖީއެމްއެޗްގެ ސީއީއޯ އިބްރާހީމް އަބްދުއްރައްޒާގު ހަލީމް ވިދާޅުވެއްޖެއެވެ.

ނިއޯނޭޓަލް ނަރުހުންގެ ކޮންފަރެންސް ހުޅުވުމަށް ދަރުމަވަންތަ ހޮސްޕިޓަލުގައި މިދިޔަ ބުދަ ދުވަހު ބޭއްވި ރަސްމިއްޔާތުގައި އައިޖީއެމްއެޗްގެ ސީއީއޯ އަބްދުއްރައްޒާގު ހަލީމް ވިދާޅުވީ މި ކޮންފަރެންސްއިން ރާއްޖޭގައި އަލަށް އުފަންވާ ކުދީންނަށް ދެވޭ ފަރުވާގެ ނިޒާމު އިތުރަށް ފުރިހަމަ ކުރެވިގެންދާނެ ކަމަށެވެ. މިފަދަ ކޮންފަރެންސްތަކުގެ ސަބަބުން ނިއޯނޭޓަލް ނާސިންގެ ޕްރެކްޓިސްގައި ދިރާސާ ކުރުމާއި، އައު އިޖާދުތައް ހޯދުމުގެ ސަގާފަތެއް ބިނާ ކުރުމަށް ވެސް ބާރުއެޅިގެންދާނެ ކަމަށް އޭނާ ވިދާޅުވިއެވެ.

ރާއްޖޭގެ މިހާރުގެ ހާލަތަށް އިޝާރާތް ކުރައްވައި ހަލީމް ވިދާޅުވީ ފަރުވާ ދިނުމުގައި ގިނަ ކުރިއެރުންތަކެއް ލިބެމުންދާ ކަމަށާއި، ދުވަސް ނުފުރާ އުފަންވާކުދީންނާއި، ނާޒުކު ހާލަތުގައި އުފަންވާ ކުދީން ދިރިހުރުމުގެ ނިސްބަތް އިތުރުވަމުންދާ ކަމަށެވެ.

ނަމަވެސް ތަމްރީން ވެފައިވާ ނިއޯނޭޓަލް ނަރުހުންގެ އަދަދު ވެސް މަދު ކަމަށާއި، ނިއޯނޭޓަލް ނާސިންގ ގައި ޚާއްސަވެފައިވާ ސްޕެޝަލައިޒްޑް ނަރުހެއް ނެތުން ވެސް މިއީ ކުރިމަތިވެފައިވާ ގޮންޖެހުމެއް ކަމަށް ހަލީމް ވިދާޅުވިއެވެ.

ދިވެހިރާއްޖޭގެ މިހާރުގެ ހާލަތަށް ބަލާއިރު ފަރުވާ ދިނުމުގައި ގިނަ ކުރިއެރުންތަކެއް މިދަނީ ގެނެވެމުން. ނަތީޖާއަކީ ދުވަސް ނުފުރާ އުފަންވާކުދީންނާ ނާޒުކު ހާލަތުގައި އުފަންވާ ކުދީން ދިރިހުރުމުގެ ނިސްބަތް އިތުރުވަމުންދާކަން. ނަމަވެސް ތަމްރީން ވެފައިވާ ނިއޯނޭޓަލް ނަރުހުންގެ އަދަދު ވެސް މަދުކަމަށް ފާހަގަކުރެވޭ. އަދި ނިއޯނޭޓަލް ނާސިންގ ގައި ޚާއްސަވެފައިވާ ސްޕެޝަލައިޒްޑް ނަރުހެއް ނެތުން ވެސް މިއީ ކުރިމަތިވެފައިވާ ގޮންޖެހުމެއް. އެހެންނަމަވެސް ގައުމުގެ އެކިއެކި ކަންކޮޅުތަކުގައި އެންއައިސީޔޫ ފެސިލިޓީތައް ގާއިމް ކުރަމުންދާއިރު، މިކަމަށް މަސައްކަތްތަކެއް ކުރުމަށް ކަމާގުޅޭ ދައުލަތުގެ ވުޒާރާތަކާއި އަދި އެކިއެކި މުއައްސަސާތަކާ އެކީ ހައްލެއް ހޯދުމަށް މާލޭ ސިޓީ އޮފް ހޮސްޕިޓަލްސްއިން މަސައްކަތް ކުރާކަމުގެ ޔަގީންކަން އަރުވަން.

އައިޖީއެމްއެޗްގެ ސީއީއޯ އިބްރާހީމް އަބްދުއްރައްޒާގު ހަލީމް

ނަރުހުންގެ މަސައްކަތަށް އިޝާރާތް ކުރައްވައި ހަލީމް ވިދާޅުވީ މިފަދަ ކޮންފަރެންސްތަކުގެ ސަބަބުން މަސައްކަތަށް އިތުރު ކުރިއެރުން ލިބޭނެ ކަމަށް އުންމީދު ކުރާ ކަމަށެވެ. އަދި މިހާރު ވެސް ދާއިރާ ކުރިއެރުވުމަށް އިންސާނީ ވަސީލަތް ކުރިއެރުވުމަށް ގިނަ މަސައްކަތްތަކެއް ކުރަމުންދާ ކަމަށް އޭނާ ވިދާޅުވިއެވެ.