ލާމަރުކަޒީ ޤާނޫނު އަދިވެސް ކޮށަނީ: ބަހަނާ އަކީ ތަރައްޤީ އަށް މަގުފަހިކުރުން!

ވެރިކަަމަށް އައީއްސުރެ ރައީސް މުއިއްޒު ކުރައްވާ ކަމަކީ ލާމަރުކަޒީ ނިޒާމް ކޮށާ މަށާ ބޭނުންވާ ބަދަލުތަކެއް އެ ނިޒާމަށް ގެންނެވުމެވެ. ސާފުކޮށް މި ނިޒާމާއި މެދު އެ މަނިކުފާނު ގެ ނުރުހުން އޮތް މިންވަރު އޮތީ ފެންނާށެވެ. މިހާރު މި ފެންނަނީ އަނެއްކާވެސް އޭގެ އިތުރު ބޮޅެކެވެ.

މިހާރު ވެސްސަރުކާރު ގެ ފަރާތުން ލާމަރުކަޒީ ޤާނޫނަށް އިސްލާހުތަކެއް އެ ވަނީ ހުށަހަޅާފަ އެވެ. ސަރުކާރުން ބުނާ ގޮތުން ނަމަ ތަރައްޤީ ގެ ޕްލޭންތައް ކައުންސިލްތަކަށް އަވަހަށް ނިންމުމަށް މަގުފަހިކުރަން ލާމަރުކަޒީ ޤާނޫނަށް އިސްލާހު ގެނައުން ނޫން ގޮތެއް ހަމަ ނެތެވެ. އަދި އަވަހަށް މަސައްކަތް ފެށުމަށް މަގުފަހިވާނީ ވެސް މި އިސްލާހު ގެނެސްގެން ކަމަށް ބަންޑާރަނައިބު ވެސް އެބަ ވިދާޅުވެ އެވެ.

އެ މަނިކުފާނު ވިދާޅުވަނީ ކައުންސިލަރުންގެ އަދަދު މަދުކުރާ އިރު މިހާރު އެ އަދަދު އޮންނަ ގޮތުން ނިންމުންތައް ބނުނިމި ލަސްވާ ކަމަށެވެ. ފަހަރުގައި އެ ވިދާޅުވާ ލަސްވުމަކީ ކޮންޓްރޯލް ގެ ލަސްވުން ކަމަށް ވެދާނެ އެވެ. ދެން ވިދާޅުވީ އަދަދު މަދު ކުރަނީ ޚަރަދު ބޮޑުވާތީ ކަމަށެވެ. އަޖައިބު އަންތަރީސް ނުވޭތޯ އެވެ. ހާހުން ގުނާލެވޭ ސިޔާސީ ބޭފުޅުން މަދު ނުކޮށް ކައުންސިލަރުން ގެ ގައިގައި އަތްލަން މި އުޅުއްވަނީ ރައްޔިތުންނަށް ކޮން ހެވެއް އެދިގެން، ކޮން ޚަރަދެއް ކުޑަ ކުރަންތޯ އެވެ.

ދައްކަވާ ބަހަނާ އަކީ ތަރައްޤީ ގެ ވާހަކަ އެވެ. ރައްޔިތުން ގާތު އަހާ ނުލާ ރައްޔިތުން ގެ ކައުންސިލަރުން ގެ އަދަދު ބޭނުންވާ ގޮތަށް މަހާ ކުދި ކޮށްލަނީ އެވެ. ތަފާތު ގޮތަކަށް ބުނާ ނަމަ ކައުންސިލްތައް ސައިޒު ކުރަނީ އޭ ވެސް ބުނެވިދާނެ އެވެ.

ހަގީގަތަކީ މި ސަރުކާރުން ލާމަރުކަޒީ ޤާނޫނު އަދިވެސް ކޮށާ މަށަނީ އެވެ. ސަރުކާރު ގެ ބަހަނާ އަކީ ތަރައްޤީ އަށް މަގުފަހިކުރުމެވެ. އެކަމަކު ފެންނަނީ ބާރުތައް ޖަމާކުރާ މަންޒަރެވެ. މިކަން ކުރަނީ ރައްޔިތުންނަށް ހެޔޮ އެދިގެން ތަރައްޤީ ނުވެގެން ކަމަށް ބުނުމަކީ ދިވެހިންނަކީ މޮޔައިން ކަމަށް ހީކުރުމެވެ. ވެރި މީހާ ބުނީމަ ބޮޑު ކަތީބާއި ކުޑަ ކަތީބު ރަށު ގެ ކަންކަން ނިންމި ޒަމާން ދިވެހިން ބޭނުން ނަމަ ޑިމޮކްރަސީ އެއް ނުގެންނާނެ އެވެ.

ހަގީގަތަކީ މިހާރު މި ގައުމު ގެ ބާރުތައް ވަކިވުމާއި ލާމަރުކަޒީ ނިޒާމް ގެ ބާރު ކިލަނބުކަމެވެ. ފަހަރަކު ބާރެއް ނަގަމުން ގޮސް ކައުންސިލްތަކަށް އޮންނާނެހާ ވެސް ކަމަކީ ވިހާ މަރުވާ މީހުން ގެ ތަފްސީލް ބެލެހެއްޓުމެވެ. އެއީ ތަރައްޤީ ކަމަށް ބަލާނަމަ އެ ތަރައްޤީ މިނާ ނާޅި އެއް ވިސްނާ ވިސްނާ ވެސް ނޭނގުނެވެ. ހަމަގައިމު ވެސް ޑިމޮކްރަސީ ދަން ގޮތަކީ ގިނަ އަޑުތައް އަހާ ގިނަ މީހުން ގެ ބަސް ހިމެނޭހެން ނިންމުންތައް ނިންމުމެވެ. ދުނިޔެ ދަންނަ ލާމަރުކަޒީ އުސޫލަކީ ވެސް އެއީ އެވެ.