އެކައުންޓްތައް ފްރީޒް ކުރަން އެދުނީ ސަރުކާރު ކޮށި އަރައިގެން، ހުކުރު ދުވަހުގެ އިހުތިޖާޖު ކުރިޔަށް ދާނެ: ޝާހިދު
އެމްޑީޕީގެ އެކައުންޓްތައް ފްރީޒް ކުރުމަށް ކޯޓުގައި އެދުނީ ސަރުކާރު ކޮށި އަރައިގެން
ލޫޓުވައިފި، ލޫޓުވައިފި އިހުތިޖާޖު ގައި ބައިވެރިވުމަށް ކުރެންދޫ ޓީމު މާލެ އަންނަން ފުރުން
އެމްޑީޕީގެ އެކައުންޓްތައް ފްރީޒް ކުރީ ސަރުކާރު ކޮށި އަރައިގެން ކަމަށާއި، އެހެން ހެދިޔަސް ހުކުރުދުވަހުގެރޭ އެމްޑީޕީގެ ފަރާތުން މާލޭގައި ކުރިޔަށްގެންދިއުމަށް ހަމަޖެހިފައިވާ އެއްވުން ކުރިޔަށް ގެންދަވާނެކަމަށް އެޕާޓީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމުގައި ވާހަކަފުޅު ދައްކަވަމުން އެމްޑީޕީގެ ރައީސް އަބްދުﷲ ޝާހިދު ވިދާޅުވީ، އެމްޑީޕީގެ އެކައުންޓްތައް ފްރީޒް ކުރުމަށް ސަރުކާރުން ކޯޓުގައި އެދުނީ ސަރުކާރު ކޮށި އަރައިގެން، އެމްޑީޕީގެ ސިޔާސީ ހަރަކާތްތައް މުޅިން ހުއްޓާލުމުގެ މަގްސަދުގައި ކަމަށެވެ.
އެމްޑީޕީގެ އެކައުންޓްތައް ފްރީޒް ކުރުމުގެ މަސައްކަތް ފެށީ ސަރުކާރު ކޮށި އަރައިގެން. އެކައުންޓްތައް ފްރީޒް ކުރަން އެ ނިންމީ އެމްޑީޕީގެ ސިޔާސީ ހަރަކާތްތައް މުޅީން ހުއްޓުވާލުމުގެ މަގްސަދުގަ. ސަރުކާރަށް ވެގެން ވަންޏާ އެމްޑީޕީ އުވާލާނެ. އެމަގު މިހާރު ކޮށަމުން އެދަނީ. އެކަމު ރައީސް މުއިއްޒަށް ދަންނަވާލަން ބޭނުންވަނީ ޕާޓީގެ އެކައުންޓްތައް ފްރީޒް ކުރެއްވިޔަސް އިހްތިޖާޖު ކުރިޔަށް ގެންދާނަންއެމްޑިޕީގެ ރައީސް އަބްދުﷲ ޝާހިދު
ހުކުރު ދުވަހުގެ ރޭ ބޭއްވުމަށް ހަމަޖެހިފައިވާ މި ބޮޑު އެއްވުމަށް އެމްޑީޕީން ދަނީ ފުރިހަމައަށް ތައްޔާރުވަމުންނެވެ. އެހެންނަމަވެސް، އެއްވުމުގައި ގިނަބަޔަކު ބައިވެރިވާނެ ކަމުގެ ބިރަށް ރައީސް މުއިއްޒުގެ ސަރުކާރުން ދަނީ ދުރާލާ ފިޔަވަޅުތައް އަޅަމުންނެވެ. އެގޮތުން، ހުކުރު ދުވަހަކީ ރަސްމީ ބަންދު ދުވަހެއް ކަމުގައިވިޔަސް، އެއްވުމަށް ދާން ބޭނުންވާ ފަރާތްތަކަށް ހުރަސްއެޅުމުގެ ގޮތުން ސަރުކާރުގެ ކުންފުނިތަކާއި އިދާރާތަކުން އެދުވަހު އެކި ހަރަކާތްތައް ބޭއްވުމަށް ރާވައި، މުވައްޒަފުންނަށް އެކަމުގައި ބައިވެރިވުމަށް އަންގަމުންދާކަން ފާހަގަކުރެވެއެވެ.
މީގެއިތުރުން، ބޮޑުއެއްވުމާ ގުޅުވައިގެން ރައްޔިތުންގެ ހިތްތަކުގައި ބިރުވެރިކަން އުފެއްދުމަށް އެއްވެސް އަސްލެއްނެތް ވާހަކަތައް ސަރުކާރުން ދަނީ ފުލުހުންވެސް ހިމެނޭހެން ހުރިހާ ނުފޫޒެއް ބޭނުންކޮށްގެން ފަތުރަމުންނެވެ.
ނަމަވެސް މިހާރުވެސް ރާއްޖޭގެ އެކި ކަންކޮޅުތަކުން ގިނަ އަދަދެއްގެ ރައްޔިތުން ވަނީ އެއްވުމުގައި ބައިވެރިވުމަށްޓަކައި މާލެ އައިސްފައެވެ. އަދާލަތު ޕާޓީން ވެސް ވަނީ މި އެއްވުމުގައި ރަސްމީކޮށް ބައިވެރިވާން ނިންމާފައެވެ. އަދި ކުރީގެ ރައީސް އިބްރާހިމް މުހައްމަދު ސޯލިހު އަދި ކުރީގެ ރައީސް މުހައްމަދު ނަޝީދު ވެސް ވަނީ ވީހާވެސް ގިނަ ރައްޔިތުން މި އެއްވުމުގައި ބައިވެރިވުމަށް ގޮވާލައްވާފައެވެ.
އެއްވުން ފެށިގެންދާނީ ހުކުރު ދުވަހުގެ ރޭ 8:30 ގައި އާޓިފިޝަލް ބީޗުގައެވެ.
