ފާރިސްގެ މައްޗަށް ދައުވާކޮށްފައިވަނީ ހެކި އުފައްދައިގެން: ރައީސް މައުމޫނު
9 ސެޕްޓެމްބަރު 2017 | ހޮނިހިރު 13:34ސިޔާސީ މީހުންނަށް ދައުވާ އުފުލުމަކުން މަސައްކަތަށް އެއްވެސް ފަސްޖެހުމެއް ނުވަތަ ހުއްޓުމެއް ނާންނާނެ
މާފުށީ ޖަލުގައި އޮންނެވި ފާރިސް މައުމޫނަށް ޒިޔާތް ކުރެއްވުމަށް ރައީސް މައުމޫނު ފުރާވަޑައިގަންނަވަނީ
ދިއްގަރު ދާއިރާގެ މެމްބަރު އަހުމަދު ފާރިސް މައުމޫންގެ މައްޗަށް ރިޝްވަތު ހިއްޕެވި ކަމަށް ބުނާ ދަޢުވާއުފުލާފައި ވަނީ އުފައްދާފައި ހުރި ހެކިތަކެއްގެ މައްޗަށް ބިނާކޮށްގެން ކަމަށް ބައްޕާފުޅު އަދި ކުރީގެ ރައީސުލްޖުމްހޫރިއްޔާ މައުމޫނު އަބްދުއްޤައްޔޫމް ވިދާޅުވެއްޖެ އެވެ.
ފާރިސް މައުމޫނުގެ މައްސަލާގައި ރައީސް މައުމޫނު ނެރުއްވި ބަޔާނުގައި އެމަނިކުފާނު ވިދާޅުވެފައި ވަނީ، ފާރިސް މައުމޫން ހައްޔަރު ކޮށްފައި ވަނީ ރައްޔިތުންގެ މަޖިލީހުގެ މެންބަރުންނަށް ރިޝްވަތު ދިން ކަމަށް ބުނާ މައްސަލައެއްގައި އެއްވެސް ހެއްކެއް ޤަރީނާއެއް ނެތި ޤާނޫނީ އިމުގެ ބޭރުން ކަމަށެވެ. އަދި ފާރިސް މައުމޫންގެ މައްޗަށް ރިޝްވަތު ހިފިކަމަށް ބުނާ ދަޢުވާއުފުލާފައި ވަނީ ވެސް އުފައްދާފައި ހުރި ހެކިތަކެއްގެ މައްޗަށް ބިނާކޮށްގެންކަން، ޕްރޮސިކިއުޓަރ ޖެނެރަލްގެ ފަރާތުން ކްރިމިނަލް ކޯޓަށް ހެކީގެ ގޮތުގައި ހުށަހަޅާފައިވާ ލިޔެކިއުންތަކުން ވެސް ސާބިތުވާ ކަމަށް ވެސް ވިދާޅުވެފައިވެއެވެ.
ރައީސް މައުމޫނު ވިދާޅުވީ، އަޙްމަދު ފާރިސް މައުމޫންގެ މައްޗަށް ކުރާ ދަޢުވާ ސާބިތު ކުރުމަށް ހެކީގެގޮތުގައި ޕްރޮސިކިއުޓަރ ޖެނެރަލް ހުށަހަޅާފައިވާ މޮބައިލް ފޯނެއްގެ ފޮރެންސިކް ރިޕޯޓަށް ބެލުމުން، އެ ފޯނުން ފެނުނު ކަމަށް އެ ރިޕޯޓްގައި ބަޔާންކޮށްފައިވާ ބައެއް ފޮޓޯތަކަކީ އެ ފޯނު ފުލުހުންގެ ބެލުމުގެ ދަށަށް ގެންދިޔަ ތާރީޚުގެ ފަހުން އެ ފޯނުގައި ރައްކާކުރެވިފައިހުރި ފޮޓޯތަކެއްކަން އެނގޭކަމަށެވެ. އެހެންކަމުން މިއީ އުފައްދާފައިހުރި ހެކިތަކެއްކަން ކަށަވަރުވާ ކަމަށް އެމަނިކުފާނު ވިދާޅުވެފައިވެއެވެ.
އޭގެ އިތުރުން އަޙްމަދު ފާރިސް މައުމޫން ގެ މައްޗަށް ރިޝްވަތު ދިނުމުގެ ތުހުމަތުކޮށް އެ ތުހުމަތުގައި ޝަރީޢަތް ނިމެންދެން ބަންދުކޮށްފައި ބެހެއްޓުމަށް ކްރިމިނަލް ކޯޓުން އަމުރު ނެރުއްވާފައިވާއިރު، އެ މައްސަލައިގެ ތަޙްޤީޤު ނިންމުމަށް ފަހު ޕްރޮސިކިއުޓަރ ޖެނެރަލް އުފުއްލަވާފައިވާ ދަޢުވާއަކީ ބަންދު ކުރެވިފައިވާ ތުޙުމަތާ ދިމާ އިދިކޮޅަށް ޤާނޫނުލް އުޤޫބާތުގެ 510 ވަނަ މާއްދާގެ (ހ) އާއި ހަވާލާދީ އެ މާއްދާގެ (ރ)ގެ ދަށުން ރިޝްވަތު ހިފުމުގެ ދަޢުވާކަން ރައީސް މައުމޫނު ނެރުއްވި ބަޔާނުގައި ފާހަގަކުރައްވާފައިވެއެވެ. އަދި ދައުލަތުން ދަޢުވާ ކޮށްފައިވާ މައްސަލަ އާއި ފާރިސް މައުމޫންގެ މައްޗަށް ތުހުމަތުކޮށް ތަޙްޤީޤު ހިންގި މައްސަލައާ އެއްވެސް ގުޅުމެއް ނެތްއިރު އަދި ކުރިން ކުރި ތުހުމަތަށް ދަޢުވާ އުފުލުމަށް ޖިނާއީ އިޖުރާޢަތުގެ ޤާނޫނުގައި ކަނޑައަޅާފައިވާ މުއްދަތު ވެސް ފަހަނައަޅައިގޮސްފައި ވުމުން، މިހާރު ފާރިސް މައުމޫން ހުންނެވި ޤާނޫނާ ޚިލާފަށް ބަންދު ކޮށްފައިކަން އޮޅުމެއް ނެތި ކަށަވަރުވާ ކަމަށް ރައީސް މައުމޫނު ވިދާޅުވި އެވެ.
ރައީސް މައުމޫނު ވިދާޅުވީ، ފާރިސް މައުމޫން ހައްޔަރުކޮށް، ޤާނޫނީ އިމުގެ ބޭރުން އެމަނިކުފާނާއި ދޭތެރޭގައި ޢަމަލު ކުރަމުން ގެންދަވާކަން ދައުލަތުން އުފުލި ދަޢުވާއާއިއެކު ހުށަހެޅި އުފައްދާފައިވާ ހެކި ތަކުން ސާބިތުވާ ކަމަށެވެ. އަދި ފާރިސް މައުމޫންގެ މައްޗަށް ޙަޤީޤަތާ ޚިލާފު އެކި ތުހުމަތުތައްކޮށް އެމަނިކުފާނު ހައްޔަރުކޮށް ބަންދުގައި 54 ދުވަސްވީ އިރުވެސް އަނިޔާ ދެމުން އެގެންދަނީ، ކޮށްފައިނުވާ ކުށެއްގެ ދޮގު ތުހުމަތު އަޅުވައި އަދި ސިޔާސީ ޕާޓީ ތަކުން ކުރަމުން ގެންދާ އިސްލާޙީ މަސައްކަތްތައް ހުއްޓުވުމުގެ ގޮތުން ކަމުގައި ދެކޭ ކަމަށް ރައީސް މައުމޫނު ވިދާޅުވި އެވެ.
ގުޅިފައިވާ ސިޔާސީ ޕާޓީ ތަކުން އިސްލާހީ މަސައްކަތް ފެށުމާއެކު ސިޔާސީ އެކި ބޭފުޅުންނަށް އެކިއެކި ތުހުމަތުކޮށް ފުލުސް އޮފީހަށް ގެންގޮސް ބަންދުކޮށް ދައުވާ އުފުލަމުންދާކަން ފާހަގަކޮށް ރައީސް މައުމޫނު ވިދާޅުވީ، ދައުވާ އުފުލުމަކުން މަސައްކަތަށް އެއްވެސް ފަސްޖެހުމެއް ނުވަތަ ހުއްޓުމެއް ނާންނާނެ ކަން، އިސްލާހަށް ލޯބިކުރާ އެންމެހާ ދިވެހި ލޮބިވެތި ރައްޔިތުންނަށް ޔަގީންކޮށް އަރުވާ ކަމަށެވެ. އަދި އަޙްމަދު ފާރިސް މައުމޫނާމެދު ޤާނޫނާ ޚިލާފަށް ކުރަމުންދާ ކަންކަން ހުއްޓާލައި، ޤާނޫނާ ޚިލާފަށް ކުރެވިފައިވާ ބަންދުން މިވަގުތުން މިވަގުތަށް މިނިވަން ކުރުމަށް ދަޢުލަތުގެ ކަމާބެހޭ އެންމެހާ މުއައްސަސާ ތަކަށް ރައީސް މައުމޫނު ވަނީ ގޮވާލާފަ އެވެ.
