ސުލްހަވެރިކަމާ އެކު އެއްވެ އުޅުމުގެ މިނިވަން ކަމުގެ ގާނޫނު އުވާލުމަށް ރައްޔިތުންގެ މަޖިލިހަށް ހުށަހެޅި ބިލު ރައްޔިތުންގެ މަޖިލީހުގެ ޕީއެންސީ މެންބަރުން ބޭރު ކޮށްލައިފި އެވެ.

ސުލްހަވެރިކަމާ އެކު އެއްވެ އުޅުމުގެ މިނިވަން ކަމުގެ ގާނޫނު އުވާލުމަށް ހުށައެޅުއްވީ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް އެވެ.

މީކާއިލް މި ބިލު ހުށަހެޅުއްވި ސަބަބެއް ކަމަށް ވިދާޅުވެފައި ވަނީ ދިވެހި ރާއްޖޭގެ ޖުމްހޫރިއްޔާގެ ގާނޫނު އަސާސީ ގެ 32 ވަނަ މާއްދާގައި ދައުލަތުން ކުރިން ހުއްދަ ހޯދުމަކާ ނުލައި ސުލްހަވެރިކަމާއެކު އެއްވެ އުޅުމުގެ މިނިވަންކަން ކޮންމެ މީހަކަށްމެ ލިބިގެންވާ ކަމަށް ބަޔާން ކޮށްފައި ވީ ނަަމަވެސް ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނުގެ ސަބަބުން އެ މިނިވަން ކަމަށް ހުރަސް އެޅޭތީ ކަމަށެވެ.

ރައްޔިތުންގެ ސަލާމަތާއި ރައްކާތެރި ކަމަށް އަދި މުޖުތަމައުގެ ރައްކާތެރި ކަން ބެލެހެއްޓުމަށް ފުލުހުންނަށް ކޮންމެހެން ލިބިދޭން ޖެހޭ ބާރާއި އިޚްތިޔާރު އެހެން ގާނޫނު ތަކުން ލިބިދޭތީ މި ގާނޫނު ވުޖޫދުގައި އޮތުމުގެ ބޭނުމެއް އޮތް ކަމަށް ނުދެކޭ ކަމަށް ވެސް ބިލު ހުށަހެޅުމުގެ މަގްސަދުތަކުގެ ތެރޭގައި ހިމެނޭ ކަމަށް ވެސް ބުނެފައިވެ އެވެ.

ބިލަށް ބަހުސް ކުރައްވަމުން މީކާއިލް ވިދާޅުވީ އެ ގާނޫނު އެމްޑީޕީގެ ސުޕަރ މެޖޯރިޓީ އޮތް 19 ވަނަ ރައްޔިތުންގެ މަޖިލީހުން އުވާނުލެވުމަކީ ހެދުނު ވަރަށް ބޮޑު ގޯހެއް ކަމަށެވެ.

ހޯމަ ދުވަހުގެ މަޖިލީހުގެ ޖަލްސާގައި އެ ބިލު މަޖިލީހަށް ބަލައިގަތުމާ މެދު ވޯޓަށް އަހާފައި ވެއެވެ. ބިލު ބަލައިގަތުމަށް ފެނޭތޯ ނެގި ވޯޓުގައި، ޕީއެންސީގެ 48 މެންބަރުން ވަނީ ބިލު ބަލައިގަތުމަށް ނުފެންނަ ކަމަށް ވޯޓު ދެއްވާފަ އެވެ. ބިލު ބަލައިގަތުމަށް ވޯޓު ދެއްވީ 11 މެންބަރުންނެވެ.

އެއްވެ އުޅުމުގެ ގާނޫނު އިސްލާހު ކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ. ނަމަވެސް ޕީއެންސީ މަޖިލިސް މެންބަރުން މިވަނީ އެ ވައުދުފުޅާ ޚިލާފުވެ، އެއްވެ އުޅުމުގެ ހައްގު ހަނިވާ ގޮތަށް އޮތް ގާނޫނު އުވާލަން ހުށަހެޅި ބިލު ބޭރު ކޮށްލާފަ އެވެ.