ޖައިޝަންކަރު ވިދާޅުވީ، ހަމަލާ ދިން މީހުން އިންސާފުގެ ކުރި މައްޗަށް ގެންނަން ޖެހޭނެ ކަމަށް

އިންޑިއާގެ ފަތުރުވެރިންތަކަކަށް އަމާޒުކޮށް ކަޝްމީރުގައި ދިން ހަމަލާގައި ޝާމިލުވާ އެންމެހާ ފަރާތްތައް އިންސާފުގެ ކުރި މައްޗަށް ގެންނަން ޖެހޭނެ ކަމަށް، އިންޑިއާގެ އެކްސްޓާނަލް އެފެއާޒް މިނިސްޓަރު ޖައިޝަންކަރު ވިދާޅުވެއްޖެ އެވެ.

މިދިޔަ ހަފުތާގެ ތެރޭގައި ދެވުނު މި ހަމަލާގެ ސަބަބުން، 26 މީހަކު ވަނީ މަރުވެފަ އެވެ. އިންޑިއާ އިން ތުހުމަތު ކޮށްފައިވާ ގޮތުގައި އެ ހަމަލާ ދީފައި ވަނީ ޕާކިސްތާނުން ރާވައިގެންނެވެ. ނަމަވެސް، އިންޑިއާ އިން ކޮށްފައިވާ އެ ތުހުމަތުތައް ޕާކިސްތާނުން ވަނީ ދޮގު ކޮށްފަ އެވެ.

އެކަމުގެ ސަބަބުން އެ ދެ ޤައުމުގެ ދެ މެދުގައި ވަނީ ބޮޑު ނުތަނަވަސްކަމެއް އުފެދިފަ އެވެ. އަދި ޕާކިސްތާނުން ބުނެފައިވާ ގޮތުގައި އިންޑިއާ އިން އަންނަނީ އެ ޤައުމަށް ހަމަލާ ދޭން ތައްޔާރުވަމުންނެވެ. 

އެެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯއާ އެކު ބޭއްވި މަޝްވަރާ ބައްދަލުވުމުގައި ޖައިޝަންކަރު ވިދާޅުވީ، އެ ހަމަލާ ރާވައި ހިންގި ފަރާތްތައް އިންސާފުގެ ކުރި މައްޗަށް ގެނެސް، އެ މީހުންނަށް ހައްޤު އަދަބު ލިބެން ޖެހޭނެ ކަމަށެވެ. 

އިންޑިއާގެ ބޮޑުވަޒީރު ނަރެންދްރަ މޯދީ ވަނީ، މި ހަމަލާ އަށް ޖަވާބު ދިނުމުގެ ފުރިހަމަ މިނިވަންކަން އަސްކަރިއްޔާ އަށް ދެއްވާފައި އެވެ.

އެހެން ނަމަވެސް ޕާކިސްތާނުން މި ހަމަލާއާ އެއްވެސް ގުޅުމެއް ނެތް ކަމަށް ބުނެފައިވާއިރު، އެ ޤައުމަށް ދެވޭ ކޮންމެ ހަމަލާ އަކަށް ހަރުކަށި ޖަވާބެއް ދޭނެ ކަމަށް ބުނެފައިވެ އެވެ.