18 އެޕްރީލް 2025 ދުވަހު ގެ ހެނދުނު ގެ ވަގުތެއްގައި، ޒަޚަމްތަކަކާ އެކު ޒުވާނަކު މާލޭ ގެއެއް ގެ ފުރާޅުމަތީގައި އޮއްވައި ފެނިފައިވާ މައްސަލައިގައި ގ. އެރިޔަދޫ، ރައުދު އަހުމަދު ޒިލާލު ގެ މައްޗަށް ދައުލަތުން ކުރި ދައުވާ އަށް އޭނާ އިއުތިރާފު ވެއްޖެ އެވެ.

ރައުދު ގެ މައްޗަށް ދައުވާ ކުރަން ޕީޖީ އޮފީހުން ފޮނުވީ މެއި މަހު ގެ ފަހުކޮޅެވެ. ރައުދު ގެ މައްޗަށް ދައުވާކުރީ އެހީ އަށް ބޭނުންވެފައިވާ މީހާއަށް އެކަށީގެންވާ ސަބަބެއް ނެތި، އެހީތެރިކަން ފޯރުކޮށް ނުދިނުމު ގެ ކުށު ގެ ދައުވާ އެވެ. މި މައްސަލައި ގެ އަޑު އެހުމެއް ބުދަ ދުވަހު ވަނީ ބާއްވާފަ އެވެ.

ޕީޖީ އޮފީހުން ބުނީ، އެ ދައުވާ އުފުލަނީ 18 އެޕްރީލް 2025 ދުވަހު 04:54 އެހައިކަށް ހާއިރު ހ. ފެންޓެނޯއީ ގޭގެ 9 ވަނަ ފަންގިފިލާ ގެ ސިޑި ގޮޅީގައި ހުންނަ ފެން ލައިޓުން (ކުޑަދޮރަކުން) ހ. މިޓާޒް ގޭގެ ފުރާޅު މައްޗަށް ޔުމްނު ވެއްޓުނުކަން އެނގި ހުރެ، އޭނާ އަށް އެހީތެރިވެދީފައި ނުވާތީ އާއި، އޭނާއަށް އެހީތެރިކަން ހޯދުމަށް އެދި ކަމާ ގުޅުން ހުރި އެއްވެސް އިދާރާއަކަށް ރިޕޯޓުކޮށްފައި ނުވާތީ ކަމަށެވެ.

ބުދަ ދުވަހު ރައުދު ވަނީ އޭނާ ގެ މައްޗަށް ކުރާ ދައުވާ އަށް އިއުތިރާފުވެފައި ކަމަށް ވުމާއި އެކު ދެން މި މައްސަލަ ކުރިއަށް ދާނީ އަވަސް ނިޔާ ގެ މައްސަލަ އެއް ގެ ގޮތުގަ އެވެ. ދެން އޮންނާނީ މި މައްސަލައިގައި ޙުކުމް ކުރުމެވެ. އޭނާ ގެ މައްޗަށް ކުރާ ދައުވާ ގެ އަސާސީ އަދަބަކީ 1 މަހާއި 6 ދުވަހު ގެ ޖަލު ހުމުކެވެ.