ފަލަސްޠީނުގެ ދައުލަތް ޤާއިމު ކުރުމަށް ފްރާންސް އާއި ސައުދީ އިން ހުށަހަޅާފައިވާ ޤަރާރަށް ޖަރުމަނުން ތާއީދު ކުރަނީ
12 ސެޕްޓެމްބަރު 2025 | ހުކުރު 03:58ފްރާންސް އާއި އިނގިރޭސިވިލާތުން ފަލަސްޠީނުގެ މިނިވަން ދައުލަތް ބަަލައި ގަންނަން ނިންމާފައިވީ ނަމަވެސް، ޖަރުމަނުން އެ ފަދަ ނިންމުމެއް ނިންމާފައި ނުވެ އެވެ. ނަމަވެސް، ޖަރުމަނުން ވަނީ އެ ހުށަހެޅުމަށް ތާއީދުކޮށް ވޯޓު ދިނުމަަށް ނިންމާފައި ކަމަށް ބުނެފައިވެ އެވެ.
އދ ގެ ދިދަ އަދި ފަލަސްޠީނުގެ ދިދަ
ފަލަސްޠީނުގެ މިނިވަން ދައުލަތެއް ޤާއިމުކޮށް، ދެ ދައުލަތުގެ ޙައްލު ހޯދުމަށް ފްރާންސް އާއި ސައުދީ އަރަބިއްޔާ އިން އިސް ނަގައިގެން ހުށަހަޅާފައިވާ ހުށަހެޅުމަށް ތާއީދު ކުރުމަށް، ޖަރުމަނުން ނިންމައިފި އެވެ.
ފްރާންސް އާއި ސައުދީ އަރަބިއްޔާ އިން އިސް ނަގައިގެން ވަނީ، އެމެރިކާގެ ނިއު ޔޯކުގައި އޮންނަ އދ ގެ ޖެނަރަލް އެސެމްބްލީގައި ފަލަސްޠީނުގެ މިނިވަން ދައުލަތް ބަަލައި ގަތުމުގެ މައްސަލަ ކުރިއަށް ގެންދަން ނިންމައިފަ އެވެ.
އެ ހުށަހެޅުމަށް ތާއީދު ކުރުމަށް ޖަރުމަނުން ނިންމާފައި މި ވަނީ، ދާދި ފަހުން ގަތަރުގެ ވެރި ރަށް ދޯހާ އަށް އަމާޒުކޮށް އިސްރާއީލް އިން ހަމަލާ ދީފައިވާ ދަނޑިވަޅެއްގަ އެވެ. ޖަރުމަނުން ވަނީ، އިސްރާއީލް އިން ގަތަރަށް ދިން ހަމަލާ ވެސް ކުށްވެރިކޮށްފަ އެވެ. އަދި އިސްރާއީލާ ދެކޮޅަށް ފިޔަވަޅު އެޅުމަށް ޔޫރަޕިއަން ޔޫނިއަން (އީޔޫ) އިން ކުރަމުން އަންނަ މަސައްކަތަށް ތާއީދު ކުރުމަށް ވެސް ޖަރުމަނުން ވަނީ ނިންމައިފަ އެވެ.
އެކި އެކި މަސްދަރުތަކާ ހަވާލާދީ މީޑިއާ ތަކުގައި ބުނެފައިވާ ގޮތުން، އދ ގައި ވޯޓަށް އެހުމަށް ހަމަޖެހިފައިވާ "ނިއު ޔޯކް ޑެކްލަރޭޝަން" އަށް ތާއީދު ކުރުމަށް ޖަރުމަނުންް ނިންމާފައިވާ ކަމަށެވެ. އެ ޤަރާރުގައި ފަލަސްޠީނުގެ މިނިވަން ދައުލަތެއް ޤާއިމު ކުރުމަށާއި، ފަލަސްޠީނުގެ ރެފިއުޖީންނަށް އެނބުރި ޤައުމަށް ދިޔުމުގެ ހައްޤު ދިނުމަށް ހުށަހަޅާ ކަމަށެވެ.
ފްރާންސް އާއި އިނގިރޭސިވިލާތް އަދި ބައެއް އެހެން ޤައުމު ތަކުން ފަލަސްޠީނުގެ މިނިވަން ދައުލަތް ބަަލައި ގަންނަން ނިންމާފައިވީ ނަމަވެސް، ޖަރުމަނުން އެ ފަދަ ނިންމުމެއް ނިންމާފައި ނުވެ އެވެ. ނަމަވެސް، ޖަރުމަނުން ވަނީ އެ ހުށަހެޅުމަށް ތާއީދުކޮށް ވޯޓު ދިނުމަަށް ނިންމާފައި ކަމަށް ބުނެފައިވެ އެވެ.
ފަލަސްޠީނުގެ މިނިވަން ދައުލަތް ބަަލައި ގަތުމަކީ އެމެރިކާ އާއި އިސްރާއީލް އިން ތާއީދު ކުރާ ކަމެއް ނޫނެވެ. ފަލަސްޠީނުގެ މިނިވަން ދައުލަތް ބަލައި ގަތުމަށް ޤައުމު ތަކުން ނިންމާފައި ވާއިރު، އެމެރިކާ އާއި އިސްރާއީލް އިން ވެސް ވަނީ އެ ޤައުމުތަކަށް ނުރުހުން އަމާޒުކޮށްފަ އެވެ. އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވަނީ، މިވަގުތު ފަލަސްޠީނުގެ ދައުލަތެއް ޤާއިމު ކުރުމަށް ގޮވާލުމަކީ ވެސް، ބިރުވެރި ކަމެއް ކަމަށް ވިދާޅުވެފަ އެވެ.
ފްރާންސް އާއި ސައުދީ އަރަބިއްޔާ އިން ހުށަހަޅާފައިވާ ޤަރާރަށް ތާއީދު ކުރަން ޖަރުމަނުން ނިންމި ނަމަވެސް، ރެފިއުޖީން އެނބުރި ގެނައުމުގެ މައްސަލައިގައި ޖަރުމަނުގެ ސްޓޭންޑު ބަދަލު ނުވާ ކަމަށް މަސްދަރު ތަކުން ވަނީ ބުނެފަ އެވެ. އެގޮތުން އަދި ވެސް ޖަރުމަނުން ބޭނުން ވަނީ، އެކަމުގައި މަޝްވަރާ ތަކެއް ކޮށްގެން އެކަމުގައި ގޮތެއް ނިންމަން ކަމަށް މަސްދަރު ތަކުން ބުނެފައިވެ އެވެ.
ދެ ދައުލަތުގެ ޙައްލުގެ އިތުރުން އެ ޤަރާރުގައި ބުނެފައި ވަނީ، 2023 ވަނަ އަހަރުގެ އޮކްޓޫބަރު މަހު ހަމާސް ޖަމާއަތުން ދީފައިވާ ހަމަލާ އާއި، އެ ހަމަލާ އަށް ފަހު ރަހީނު ކޮށްފައިވާ ރައްޔިތުން މިނިވަން ކުރުމާއި، ހަމާސް އިން ޣައްޒާ ކޮންޓްރޯލް ކުރުން ހުއްޓާލަން ވެސް ޖެހޭ ކަމަށެވެ.
މަސްދަރު: ބްލޫމްބާގް
