ފޮޓޯ ޓެކްނިކް މުހައްމަދު ދީދީ ނިޔާވެއްޖެ

ފޮޓޯގްރަފީގެ ދާއިރާ އިން ރާއްޖެ އަށް ގިނަ ޚިދުމަތްތަކެއް ކޮށްދެއްވި، ހ.ފުލިދޫގެ މުހައްމަދު ދީދީ (ފޮޓޯ ޓެކްނިކް މުހައްމަދު ދީދީ) ނިޔާވެއްޖެ އެވެ.

އޭނާ ނިޔާވެފައި ވަނީ ހޮނިހިރު ދުވަހު ކުއްލި ގޮތަކަށެވެ.

Advertisement

އޭނާ އަކީ ރާއްޖޭގައި 80ގެ އަހަރުތަކުގައި ޒަމާނީ ފެންވަރުގެ ސްޓޫޑިއޯ އެއް ޤާއިމްކޮށް، ފުޅާ ދާއިރާ އެއްގައި އެ މަސައްކަތް ކުރައްވާފައިވާ ބޭފުޅެކެވެ. މީގެ އިތުރުން އޭނާ އަކީ އޭޑަބްލިއުއޭއައި - އެމެރިކަން ރައިޓަރސް އެންޑް އާޓިސްޓްސް އިންކޯޕަރޭޓެޑް އިން ތަމްރީނު ކުރި ކޮޕީރައިޓަރެއް، އަދި ޕްރޮފެޝަނަލް ރައިޓަރސް އެސޯސިއޭޝަންގެ މެމްބަރެއް ވެސް މެ އެވެ.

1980 އިން ފެށިގެން އޭނާ ވަނީ މާކެޓިން ދާއިރާގައި ވެސް މުހިންމު މަސައްކަތްތަކެއް ކުރައްވާފައެވެ. މީގެ އިތުރުން ރާއްޖޭގެ ފޮޓޯގްރަފީ ދާއިރާ އަށް މުހައްމަދު ދީދީ ވަނީ މުހިންމު ޚިދުމަތްތަކެއް ކުރައްވާފަ އެވެ. އޭނާ އަކީ ކޮޕީރައިޓަރެއްގެ ގޮތުގައި ވެސް މުހިންމު މަސައްކަތްތަކެއް ކުރައްވާފައިވާ ބޭފުޅެކެވެ.

އޭނާ އަކީ ރާއްޖެ އަށް ރީތި ނަން ހޯދައި ދެއްވާފައި ވާތީ ސަރުކާރުން ދެއްވާ ޚާއްޞަ އިނާމު 1986 ވަނަ އަހަރު ހާސިލްކުރައްވާފައިވާ ބޭފުޅެކެވެ. ހަމައެހެންމެ ޢާންމު ޚިދުމަތުގެ އިނާމު މުހައްމަދު ދީދީ އަށް 1990 ވަނަ އަހަރު ލިބިފައިވާ އިރު އެ އިނާމް އޭނާ އަށް ދީފައި ވަނީ ފޮޓޯގެ މަސައްކަތް ރާއްޖޭގައި ތަރައްޤީކުރުމުގެ ރޮނގުންނެވެ. މުހައްމަދު ދީދީ އަކީ ރާއްޖޭގައި ފޮޓޯ ނެގުމަށް މަޝްހޫރު މީހުން މަދު ދުވަސް ވަރު އެ މަސައްކަތް ބައިނަލްއަޤްވާމީ ފެންވަރަކަށް ކުރައްވާފައިވާ ފާހަގަކޮށްލެވޭ ޝަހުސިއްޔަތެކެވެ.

އޭނާ ފޮޓޯގެ މަސައްކަތް ފުރަތަމަ ފަށްޓަވާފައި ވަނީ އެމް.އެސް.އެލް.ގެ ބޯޓެއްގެ ވަޒީފާގައި އުޅުއްވަމުންނެވެ. އެއަށްފަހު 1970 ވަނަ އަހަރު ވަކި ޚާއްޞަ ތަނެއް ވަނީ ހައްދަވާފަ އެވެ. މީގެ އިތުރުން މިމަސައްކަތް ކުރެއްވުމުގައި ބޭރުގެ އެކިއެކި މަޢުރަޟުތަކުގައި އޭނާގެ ފޮޓޯ ބައިވެރިކުރައްވައިގެން ވަނަތައް ހާސިލްކުރައްވާފައިވެ އެވެ. މީގެ އިތުރުން ދުނިޔޭގެ އެންމެ މަޝްހޫރު ކުންފުނި ކަމުގައިވާ ކޮޑެކް ކުންފުނީގެ ބައެއް މަސައްކަތްތަކުގައި މުހައްމަދު ދީދީ ވަނީ ބައިވެރި ވެވަޑައިގަންނަވާފަ އެވެ.