ތޫފާން އިރްމާ ގެ ސަބަބުން ކެރީބިއަން ސަރަހައްދުން މަދުވެގެން ހަތް މީހުން މަރުވެއްޖެ
އެޓްލާންޓިކް ކަނޑުގައި އިތުރު ދެ ތުފާން ވަނީ އުފެދިފައި
ގަދަ ވަޔާއެކު ބޯކޮށް ވާރޭވެހެމުންދާއިރު ޕުއަޓާ ރީކޯގެ މަގެއްގައި ފުލުހުން ޕެޓްރޯލް ކުރަނީ
ކެރީބިއަންގެ ސަރަހައްދުގެ ގައުމުތަކަށް އަރާފައިވާ ތޫފާން އިރްމާ ގެ ސަބަބުން ކެރީބިއަންގެ ގައުމުތަކަށް ބޮޑެތި ގެއްލުންތައް ލިބި އަދި މަދުވެގެން ހަތް މީހުން މަރުވެއްޖެ ކަމަށް ރިޕޯޓުތައް ބުނެފިއެވެ.
ކުޑަ ޖަޒީރާ ގައުމުތަކާއި އަދި ރަށްތައް ހިމެނޭ ކެރީބިއަންގެ ގައުމުތަކަށް އަރާފައިވާ ތޫފާން އިރްމާ ގެ ސަބަބުން މަރުވި މީހުންގެ އަދަދު އަދިވެސް އިތުރުވާނެ ކަމަށް ބެލެވޭއިރު ކުޑަ ރަށެއް ކަމަށްވާ ބާބިއުޑާ ގައި "އިންސާނުންނަށް ކިރިޔާ ދިރިއުޅެވެނީ" ކަމަށް ރިޕޯޓުތައް ބުނާއިރު ފްރާންސްގެ ބާރުގެ ދަށުގައި އޮތް ސަރަހައްދެއް ކަމަށްވާ ސެއިންޓް މާޓިން "ގާތްގަނޑަކަަށް އެއްކޮށް" ހަލާކުވެފައިވާ ކަމަށް ރިޕޯޓުތައް ބުނެއެވެ.
އިރްމާ ހުރީ މިވަގުތު ހުރީ ކެޓަގަރީ 5 ގައި ކަމަށްވާއިރު އެމެރިކާގެ ބާރުގެ ދަށުގައިވާ ސަރަހައްދެއް ކަމަށްވާ ޕުއަޓާ ރިކޯގެ އުތުރުން ދަތުރުކޮށްފައިވާ ކަމަށްވެސް ރިޕޯޓުތައް ބުނެއެވެ. ޕުއަޓާ ރީކޯގެ ތިން މިލިއަން މީހުންގެ ތެރެއިން ދެބައިކުޅަ އެއްބައި މީހުން ވަނީ ކަރަންޓް ލިބުމުން މަހްރޫމްވެފައެވެ. އަދި ގަދަ ވަޔާއެކު ބޯކޮށް ވަނީ ވާރޭ ވެހިފައެވެ.
ކެރީބިއަންގެ އެންޓިގުއާ އަށް މާބޮޑު ގެއްލުމެއް ލިބިފައިނުވާ އިރު ކެރިބީއަންގެ ތިންވަނަ އަށް އެންމެ ބޮޑު އެއާޕޯޓު ސެއިންޓް މާރޓިންސް އެއާޕޯޓު ވަނީ އެއްކޮށް ހަލާކުވެފައެވެ.
އެޓްލާންޓިކް ކަނޑުގައި އިތުރު ދެ ތުފާން އުފެދިފައިވާ ކަމަށްވެސް ރިޕޯޓުތައް ބުނެއެވެ. އަދި އެކަމާ ގުޅޭ ތަފްސީލެއް ނުލިބެއެވެ.
