ރައީސް ޞާލިހު ރައީސް މުއިއްޒު އަށް: ރަށްރަށަށް ދަތުރުކުރަމުންދަނީ 1 ޓަނުގެ ހައިމާކަކާއި ކޮޅުވެއްޓިއެއް ހިފައިގެން، ދެން ކޮން ތަރައްގީއެއްތޯ ގެނެވޭނީ؟
ރައީސް ޞާލިހު ވިދާޅުވީ މާލޭގެ އުނދަގޫތައް ހައްލުކުރެވޭނީ ރަށްރަށާއި ސަރަހައްދުތަކުގައި ސެންޓަރުތައް ހަދައިގެން ހިދުމަތްދީގެން ކަމަށް
ކުރީގެ ރައީސް އިބްރާހިމް މުހައްމަދު ޞާލިހު "ހޯރަފުށީ ދުވަސް" ޖަލްސާގައި ވާހަކަފުޅު ދައްކަވަނީ
ވަރުބަލިކަމެއް ނެތި ރާއްޖޭގެ އެއް ރަށުން އަނެއް ރަށަށް ރައީސް ޑރ. މުހައްމަދު މުއިއްޒު ދަތުރުފުޅު ކުރައްވަނީ 1 ޓަނުގެ ހައިމާކަކާއި ކޮޅުވެއްޓިއެއް ހިފައިގެން ކަމަށާއި، ގެނެވޭނީ ކޮން ތަރައްގީއެއްތޯ ވިދާޅުވެ ކުރީގެ ރައީސް އިބްރާހިމް މުހައްމަދު ޞާލިހު ރައީސް މުއިއްޒުއަށް ފާޑުވިދާޅުވެއްޖެ އެވެ.
"ހޯރަފުށީ ދުވަސް" ޖަލްސާގައި ވާހަކަފުޅުއްދައްކަވަމުން ރައީސް ޞާލިހު ވިދާޅުވީ މާލެ ކައިރީގައި ފަތުރުވެރިކަން ތަރައްގީވެ އޭގެ ނަތީޖާއަކަށް ވެގެންދިޔައީ މާލެ ތަރައްގީ ވެގެންދިޔަ ކަމަށެވެ. އަދި އެއާއެކު ހުރިހާ ހިދުމަތެއް ހޯދަން އަންނަން ޖެހުނީ މާލެ އަށް ކަމަށާއި، މިއަދު މާލެއަށް ދިމާވެފައިވާ އުނދަގުލަކީ ވެސް އެއީ ކަމަށް ރައީސް ޞާލިހު ވިދާޅުވި އެެވެ. ރައީސް ޞާލިހު ވިދާޅުވީ މިކަން ހައްލު ކުރެވޭނީ މާލެ އެކަނި ތަރައްގީ ކޮށްގެން ނޫން ކަމަށާއި، ރަށްރަށާއި ހާއްސަކޮށް އެކި ސަރަހައްދުތަކުގައި ސެންޓަރުތައް ހަދައިގެން ހިދުމަތް ދީގެން ކަމަށެވެ.
ރައީސް ޞާލިހު ވިދާޅުވީ އެމްޑީޕީގެ ޕްލޭނަކީ އެކީ ރޭވުންތެރިކަމާއިއެކު ފައިސާ ވެސް ހޯދައިގެން ކަމަށެވެ. އަދި މަސައްކަތްތައް ފެށި، ވިސްނުމެއް ގެންގުޅެ ކުރެހުންތައް ކުރެހި ފައިސާ ހޯދައިގެން އެކަން ކުރުމުން ހޯރަފުށީ އެއަރޕޯޓު ވެސް މަގުތަކުގެ ފޭސް އެކެއްގެ މަސައްކަތް ވެސް ނިމިފައިވާ ކަމަށެވެ.
ރައީސް ޞާލިހު ވިދާޅުވީ ނަމަވެސް ހިތާމައަކީ މިއަދު ހޯރަފުށީގައި ފަށާފައި ހުރި ބައެއް މަސައްކަތްތައް ހުއްޓިފައިވާ ކަމެވެ. ސަބަބަކީ ރޭވުންތެރިކަމެއް ޕްލޭނެއް މިއަދު ވެރިކަމުގައި ތިބި ބޭފުޅުންގެ ނެތުން ކަމަށެވެ.
މިއަދު 2026 ވަނަ އަހަަރުގެ ބަޖެޓު އެ ހުށަހެޅީ. 64 ބިލިއަން ރުފިޔާ. 2024 އާއި 2025 ނިމިގެން މިދަނީ 55 ބިލިއަނާއި 56 ބިލިއަނުގެ ބަޖެޓެއް ހުސްވަމުން އެދަނީ. ކޮންކަމެއްތޯ ރާއްޖެއަށް ކުރެވިފައިވަނީ. ތަރައްގީގެ ކޮން މަޝްރޫއެއްތޯ ފެށިފައިވަނީ. ހޯރަފުށީގެ ވާހަކަ ތިބޭފުޅުން ތިދެއްކެވީ. އަޅުގަނޑު ދާ ކޮންމެ ރަށަކުން އެ ޝަކުވާ އާދޭ. މި ދައްކަނީ މަދު އަދަދެއްގެ ފައިސާގެ ވާހަކައެއް ނޫން. ތަފްސީލެއް ހާމައެއް ނުކުރޭ. ބަޖެޓެއް ހުށަހަޅާ އިރު ކަން ކުރާނެ ގޮތެއް ތަފްސީލެއް ނުދެއްވާ. ދެން ކިހިނެއްތޯ ކަމެއް ކުރާނީ. މިއަދު އަޅުގަނޑުމެންނަށް މި ފެންނަނީ ވަރުބަލިކަމެއް ނެތި ރާއްޖެގެ އެއް ރަށުން އަނެއް ރަށަށް ދަތުރުކުރާތަން. 1 ޓަނުގެ ހައިމާކަކާއި ކޮޅުވެއްޓިއަކުން. އެނޫން ކަމެއް ނުފެނޭ. ދެން ކޮން ތަރައްގީއެއްތޯ ގެނެވޭނީ.ކުރީގެ ރައީސް އިބްރާހިމް މުހައްމަދު ޞާލިހު
ރައީސް ޞާލިހު ވިދާޅުވީ މިއީ މިއަދު ރާއްޖޭގެ ހާލަތު އޮތް ގޮތް ކަމަށެވެ.
