ނިމިދިޔަ ސަރުކާރުން އެކުލަވާލި ބިންވެރިޔާ ސްކީމުގެ ދަށުން މާލެ ސަރަހައްދުން ދޫކޮށްފައި ހުރި ގޯތިތައް އަތުލަން ޖެހޭ ކަމަށް ވިދާޅުވެ ޕީއެންސީގެ ޕާލަމެންޓަރީ ގްރޫޕުގެ ލީޑަރު އިބްރާހިމް ފަލާހު ދައްކަވާފައިވާ ވާހަކަތަކަށް އެ ޕާޓީގެ، މައްޗަންގޯޅި މެދު ދާއިރާގެ މެންބަރު، އަހުމަދު ޒަމީރު ރައްދު ދެއްވައިފި އެވެ.

އަންގާރަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި ވާހަކަ ދައްކަވަމުން ފަލާހު ވަނީ ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ބިންވެރިޔާ ސްކީމްގެ ދަށުން ހުޅުމާލެ، ގުޅީފަޅު އަދި ގިރާވަރުފަޅުން ދޫކޮށްފައިވާ ގޯތިތައް ދައުލަަތަށް އަނބުރާ ނަގަން ޖެހޭ ކަމަށް ވިދާޅުވެފަ އެވެ.

ރައްޔިތުންނަށް ދީފައިވާ އެ ބިންތަކުގައި ވަށާ ފާރެއް ރާނާފައި ހުރިއްޔާ ވަށާފާރުގެ ބަދަލު ދީ، ގޯއްޗެއް ރާނާފައި ހުރިއްޔާ އެ ތަނެއްގެ ބަދަލު ވެސް ދިނުމަށް ފަހު އެ ތަންތަން ދައުލަތަށް ނަގަންޖެހޭ ކަމަށް ފަލާހު ވަނީ ވިދާޅުވެފަ އެވެ.

އެކަމާއި ގުޅޭ ގޮތުން ވާހަކަ ދައްކަވަމުން ޒަމީރު ވިދާޅުވީ ފަލާހުގެ އެ ވާހަކަތަކުގެ ސަަބަބުން ވަރަށް ބޮޑަށް އާއްމުންގެ ޕްރެޝަރ ކުރިމަތިވި ކަމަށެވެ. ޒަމީރު ވަނީ ފަލާހުގެ ވާހަކަތަކާއި ގުޅިގެން އާއްމުންގެ ކިބައިން ލިބުނު ޝަކުވާތަކަށް ޖަވާބުދީ ޑެމޭޖް ކޮންޓްރޯލް ކުރުމަށް މަަސައްކަތް ކުރައްވާފަ އެވެ. އަދި މާލެއިން ދޫކޮށްފައިވާ އެއްވެސް ގޯއްޗެއް ސަރުކާރުން އަތު ނުލާނެ ކަމަށް ވިދާޅުވި އެވެ.

"އެއްވެސް މީހަކަށް ލިބިފައި އޮތް ގޯއްޗެއް މި ސަރުކާރަކުން ނައަތުލާނެޔޭ، އެ ޔަގީންކަން އަޅުގަނޑު ދެން. އެއީ މި ސަރުކާރުގެ ވިސްނުމެއް ނޫން. އެ ގޯއްޗެއް އޮތް ތަނަކުން ދޭނެ." އޭނާ ވިދާޅުވި އެވެ.

ރާއްޖޭގެ އެހެން ސަރަހައްދުތަކުން ވެސް ބިން ހިއްކަނީ މާލެ އެކޭ އެއްފަދައިން ލޯނުތަކުގެ އެހީގައި ކަމަށާއި ގޯތި ދިނުމުގައި ގެންގުޅެން ވާނީ އެއް އުސޫލެއް ކަމަށް ޒަމީރު ވިދާޅުވި އެވެ.

މިދިޔަ ސަރުކާރު ބަދަލުވި އިރު ވެސް ގޯތި ދޫކުރި ހުރިހާ ސަރަހައްދެއް ވަނީ ހިއްކުމުގެ އަމަލީ މަސައްކަތް ފަށާފަ އެވެ. ބޮޑު ބައެއް ނިމިފައިވަނިކޮށް، މިސަރުކާރުން ވަނީ އެމަޝްރޫއުތަކުގެ އަމަލީ މަސައްކަތް ހުއްޓުވައި، ބޯހިޔާވަހިކަމަށް ފުށިދިއްގަރުފަޅުގެ މަޝްރޫއު ފަށާފަ އެވެ. މި މަޝްރޫއުގެ މަސައްކަތް "ރަސްމާލެ" ނަމުގައި ހިއްކަން ފަށާފައިވަނީ 18 ޑިސެންބަރު 2023 ގަ އެވެ. ނަމަވެސް އެމަޝްރޫއު ވެސް ކުރިއަށް ނުގެންދެވި ވަނީ ހުއްޓިފަ އެވެ. ގިނަ ބައެއްގެ ފާޑުކިޔުން އަމާޒުވުމާ ގުޅިގެން ގުޅީފަޅު، ގިރާވަރުފަޅު އަދި ހުޅުމާލެ ފޭސް 3 ހިއްކުމުގެ މަސައްކަތް ވަނީ ފަށާފަ އެވެ.