މި ސަރުކާރަކީ މަގާމުތަކަށް މީހުން އައްޔަނު ކުރާއިރު ކުލަ އަކަށް ނަސަބަކަށް ހަސަބަކަށް ބަލާ ސަރުކާރެއް ނޫން: މެންބަރު ފަލާހު
3 ޑިސެމްބަރު 2025 | ބުދަ 08:22ޖަޕާނަށް ސަފީރެއްގެ ގޮތުގައި އައްޔަންކުރި މަހުލޫފަކީ އެކަމަށް ރާއްޖެއިން ނެގޭނެ އެންމެ އެކަށީގެންވާ ބޭފުޅާ
ބުދަ ދުވަހު ކުރިއަށް ގެންދިޔަ ރައްޔިތުންގެ މަޖިލީހުގައި ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އިބްރާހިމް ފަލާހު ވާހަކަ ދައްކަވަނީ | ރާއްޖެއެމްވީ
ރައީސް ޑރ.މުހައްމަދު މުއިއްޒު ގެ ސަރުކާރަކީ މަގާމުތަކަށް މީހުން އައްޔަނު ކުރާއިރު ކުލަ އަކަށް ނަސަބަކަށް ހަސަބަކަށް ބަލާ ސަރުކާރެއް ނޫން ކަމަށް ޕީއެންސީގެ ޕީޖީ ގްރޫޕް ގެ ލީޑަރު އަދި ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އިބްރާހިމް ފަލާހު ވިދާޅުވެއްޖެ އެވެ.
ބުދަ ދުވަހު ކުރިއަށް ގެންދިޔަ ރައްޔިތުންގެ މަޖިލީހުގައި މެންބަރު ފަލާހު ވަނީ ޖަޕާނަށް ދިވެހިރާއްޖެ އިން ކަނޑައެޅި ސަފީރު އަހްމަދު މަހުލޫފަށް ވަރަށް ބޮޑަށް ތައުރީފް ކުރައްވައި ވާހަކަ ދައްކަވާފަ އެވެ. ޖަޕާނަށް ސަފީރެއްގެ ގޮތުގައި މި މަޖިލީހަށް ފޮނުވާފައިވާ ނަންފުޅަކީ އެކަމަށް ރާއްޖެއިން ނެގޭނެ އެންމެ އެކަށީގެންވާ އެންމެ ރަނގަޅު ބޭފުޅާ ކަމަށް އޭނާ ވިދާޅުވި އެވެ. އަދި ވިދާޅުވީ މިކަމާ ދޭތެރޭގައި ދައްކާނެ އިތުރު ވާހަކައެއް ނެތް ކަމަށާއި، މިއީ ރަނުން ރަނަށް ކޮށްފައިވާ ކަމެއް ކަމަށެވެ.
މެންބަރު ފަލާހު ވިދާޅުވީ މި ސަރުކާރަކީ މަގާމުތަކަށް މީހުން އައްޔަނު ކުރާއިރު ކުލަ އަކަށް ނަސަބަކަށް ހަސަބަކަށް ބަލާ ސަރުކާރެއް ނޫން ކަމަށާއި، ގައުމަށް ޚިދުމަތް ކުރުމުގައި އެބޭފުޅާ އަށް އެކަމުގެ ގާބިލް ކަމާއި، އެކަމުގެ ހުނަރާއި ތަޖުރިބާ ހުރި މިންވަރަށް މިސަރުކާރުން ބަލާނެ ކަމަށެވެ.
މެންބަރު ފަލާހު ވިދާޅުވީ ސަރުކާރު މިނިންމުމާއެކު ކުރިއަށް އޮތްތަނު ގައި ރާއްޖެ އާއި ޖަޕާނު ގެ ގުޅުން ވަރަށް ބޮޑަށް ރަނގަޅުވެ، މިހާރަށްވުރެ މާމަތީ ހަރުފަތަކަށް މިގުޅުން ކުރިއަށް ދާނެ ކަމަށެވެ.
އެއީ މީގެ ކުރިން ރާއްޖޭގައި މިދިޔަ ސަރުކާރުގައި ވެސް ވަރަށް މަތީ މަގާމެއް ވަރަށް ރަނގަޅަށް ހަގީގަތުގައި އެމްޑީޕީ ވެރިކަމުގައި ރާއްޖެއަށް ޚިދުމަތް ކުރުމުގައި ވަޒީރަކު މަގާމެއް އެންމެ ރަނގަޅަށް އަދާކުރި ބޭފުޅަކީ އަހުމަދު މަހުލޫފު. އަޅުގަނޑުމެންގެ މި ސަރުކާރަކީ މި ސަރުކާރަކީ މަގާމުތަކަށް މީހުން އައްޔަނު ކުރާއިރުގައި ކުލަ އަކަށް ނަސަބަކަށް ހަސަބަކަށް ބަލާ ސަރުކާރެއް ނޫން. ގައުމަށް ޚިދުމަތް ކުރުމުގައި އެބޭފުޅާއަށް އެކަމުގެ ގާބިލް ކަމާއި، އެކަމުގެ ހުނަރާއި ތަޖުރިބާ ހުރި މިންވަރަށް މިސަރުކާރުން ބަލާނެ. އެހެންވީމަ އަޅުގަނޑު ދަންނަވާލަން ބޭނުންވަނީ މި ނަންފުޅު މިއީ މިކަމަށް އެންމެ އެކަށީގެންވާ ބޭފުޅާއޭ. އަހުމަދު މަހުލޫފަކީ ޒުވާން ބޭފުޅެއް. މިކަން ކުރެވޭ ތައުލީމާ ތަޖުރިބާ ހުރި ބޭފުޅެއް މިކަމުގެ ހުނަރު ހުރި ބޭފުޅެއް. މިކަމުގެ ހުނަރު ދައްކާފައި ހުރި ބޭފުޅެއް. އެހެންވީމަ ހަގީގަތުގައި މިއާ ދޭތެރޭގައި ކިޔާނެ މާ ގިނަ ވާހަކަ އެއް ނެތް އަޅުގަނޑުމެން. މިއޮތީ މިކަން ރަނުން ރަނަށް މިކަން ކޮށްފައި.އިނގުރައިދޫ ދާއިރާގެ މެންބަރު އިބްރާހިމް ފަލާހު
މެންބަރު ފަލާހު މިމޭރުމުން ވާހަކަ ދެއްކެވި ނަމަވެސް މަހުލޫފު މި މަގާމަށް އައްޔަން ކުރެއްވީ، ވެރިކަން ކުރާ ޕީއެންސީއާ 14 ނޮވެންބަރު 2025 ވަނަ ދުވަހު އެ ޕާޓީއަށް ސޮއިކުރުމާ ގުޅިގެން ކަމަށް ގިނަ ބަޔަކު ދަނީ ބުނަމުންނެވެ. އަދި މި ސަރުކާރުގައި ވަޒީފާގެ ބިރު ދައްކާ ކަމަށާއި، ސަރުކާރަށް ފާޑު ކިޔާ އާއިލާތައް ކޮންޓްރޯލް ކުރުމަށް ސަރުކާރުން ވަޒީފާ ހަމަޖައްސައި ދެމުންދާ ކަމަށް އެއާއިލާތަކުން ބުނެފައިވެ އެވެ. އަދި ސަރުކާރުގެ ވަޒީފާގައި ހުރެ، ސަރުކާރަށް ފާޑު ކިޔާނަމަ ވަޒީފާއިން ވަކި ކުރުމާއި، ވަޒީފާ އަދާކުރާ ތަން ބަދަލު ކުރުމާއި، އަދިވެސް އެހެނިހެން ގޮތްގޮތުން ވަރަށް ބޮޑަށް ދަތި ކުރަމުންދާ ކަމަށް ބައެއް މީހުން ތުހުމަތު ކޮށްފައިވެ އެވެ.
