އެމްއާރުއައި ނަތީޖާ ވަރަށް ރަނގަޅު، އިތުރު ތަފްސީލް ޑޮކްޓަރު ގާތު އަހާ: ޓްރަމްޕް
28 އޮކްޓޯބަރު 2025 | އަންގާރަ 08:12އެމްއާރުއައި ހަދާފައިވާ ކަމަށް ޓްރަމްޕް ވިދާޅުވުމުން، އެމްއާރުއައި ހަދަން ޖެހުނު ސަބަބުން އޮޅުން ފިލުވުމަށް ނޫސްވެރިން ވަނީ ސުވާލު ކޮށްފަ އެވެ. ނަމަވެސް، އެ ސުވާލަށް ސީދާ ޖަވާބެއް ނުދެއްވައި ޓްރަމްޕް ވިދާޅުވީ، އެ ސަބަބު ޑޮކްޓަރުންގެ ގާތުން އޮޅުންފިލުވުމަށެވެ.
ޓްރަމްޕް ވޯލްޓަރ ރީޑް މެޑިކަލް ސެންޓަރުގައި ހެދި އެމްއާރްއައި ސްކޭނުން ވަރަށް ރަނގަޅު ނަތީޖާއެއް ލިބުނު ކަމަށް ބުނެފައިވޭ
އެއާ ފޯސް ވަންގައި ހުންނަވައި ޓްރަމްޕް ނޫސްވެރިންނާ ވާހަކަ ދައްކަވަނީ
އެމެރިކާގެ ރައީސް ޑޮނަލްޑް ޓްރަމްޕްގެ އެމްއާރުއައި ސްކޭންގެ ނަތީޖާ ރަނގަޅު ކަމަށާއި، އިތުރު ތަފްސީލް ޑޮކްޓަރުންގެ ގާތުން އެހުމަށް އޭނާ ވިދާޅުވެއްޖެ އެވެ.
ދާދި ފަހުން ޓްރަމްޕް ވަނީ ވޯލްޓާ ރީޑް މެޑިކަލް ސެންޓަރަށް ވަޑައިގެން އެމްއާރުއައި ސްކޭނެއް ހައްދަވައިފަ އެވެ. މިއީ ޓްރަމްޕްގެ ޞިއްޙީ ޙާލު ކޮޅާ ގުޅޭ ގޮތުން އެކި އެކި ވާހަކަތައް ދެކެވެމުން އައި ދަަނޑިވަޅެއްގައި ޓްރަމްޕް ހައްދަވާފައިވާ ސްކޭން އެކެވެ.
އެއާ ފޯސް ވަންގައި ހުންނަވައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވެފައި ވަނީ، އޭނާގެ މެޑިކަލް ޓެސްޓު ތަކުގެ ނަތީޖާ ލިބިފައިވާ ކަމަށާއި، ނަތީޖާތައް ރަނގަޅު ކަމަށެވެ. އެމްއާރުއައި ސްކޭނެއް ހައްދަވާފައި ވީ ނަމަވެސް، އެކަން ކުރަން ޖެހުނު ސަބަބެއް ޓްރަމްޕް ހާމަ ކުރައްވާފައި ނުވެ އެވެ.
އެމެރިކާގެ ރިޔާސީ ގަނޑުވަރު ވައިޓް ހައުސް އިން ވެސް ވަނީ، މި މަހުގެ ކުރީ ކޮޅު ޓްރަމްޕްގެ ޞިއްޙީ ޙާލަތާ ގުޅޭ ގޮތުން ރިޕޯޓެއް އާންމު ކޮށްފަ އެވެ. އެ ރިޕޯޓުގައި ބަޔާން ކޮށްފައި ވަނީ ޓްރަމްޕްގެ ޞިއްޙީ ޙާލު ކޮޅު ވަރަށް ރަނގަޅު ކަމަށާއި، އޭނާގެ މެޑިކަލް ޗެކަޕްގައި އެޑްވާންސްޑް އިމޭޖިން އަދި ލެބޯޓަރީ ޓެސްޓުތަކާއި ޕްރިވެންޓިން ހެލްތު އެސެސްމަންޓުތައް ވެސް ހިމެނުނު ކަމަށެވެ.
އުމުރުފުޅުން މިހާރު 79 އަހަރުވެފައިވާ ޓްރަމްޕްގެ ޞިއްޙީ ޙާލު ކޮޅާ ގުޅޭ ގޮތުން މިދޭތެރެއިން ވަނީ ގިނަ ކަންބޮޑުވުން ތަކެއް އުފެދިފަ އެވެ. އެގޮތުން ޓްރަމްޕްގެ އަތް ތިލައިގައި ލޭ ގަނޑުވެފައި ހުރުމާއި، ފައި ދުޅަވެފައިވާތީ އެކަމާ ގުޅިގެން ގިނަ ބަޔަކު ކަންބޮޑުވުން ފާޅު ކުރި އެވެ. ނަމަވެސް، އޭރު ވެސް ވައިޓް ހައުސް އިން ބުނެފައި ވަނީ ޓްރަމްޕްގެ ޞިއްޙީ ޙާލު ކޮޅު ވަރަށް ރަނގަޅު ކަމަށެވެ.
ވައިޓް ހައުސް އިން މިއަހަރުގެ ޖުލައި މަހު ބުނެފައި ވަނީ ޓްރަމްޕް އަށް ކްރޮނިކް ވީނަސް އިންސަފިޝެންސީ ބައްޔެއް ޖެހިފައިވާ ކަމަށެވެ. ނަމަވެސް އެކަމަށް ފަރުވާ ހޯއްދަވާފައިވާ ކަމަށާއި، ޓްރަމްޕް ހުންނެވީ ޞިއްޙީ ގޮތުން ވަރަށް ފުރިހަމަ އަށް ކަމަށް ޑޮކްޓަރު ބުނެފައިވާ ކަމަށް ވައިޓް ހައުސް އިން ހާމަ ކޮށްފައިވެ އެވެ.
އެމްއާރުއައި ހަދާފައިވާ ކަމަށް ޓްރަމްޕް ވިދާޅުވުމުން، އެމްއާރުއައި ހަދަން ޖެހުނު ސަބަބުން އޮޅުން ފިލުވުމަށް ނޫސްވެރިން ވަނީ ސުވާލު ކޮށްފަ އެވެ. ނަމަވެސް، އެ ސުވާލަށް ސީދާ ޖަވާބެއް ނުދެއްވައި ޓްރަމްޕް ވިދާޅުވީ، އެ ސަބަބު ޑޮކްޓަރުންގެ ގާތުން އޮޅުންފިލުވުމަށެވެ. އެކަން ފާހަގަ ކުރައްވައި ޓްރަމްޕް ވިދާޅުވެފައި ވަނީ، އޭނާ އަށް ދޫކޮށްފައިވާ ވާރުގެ ތަފްސީލް މެޑިކަލް ރިޕޯޓެއް އެހެން އެއްވެސް މީހަކަށް ދޫކޮށްފައި ނުވާނެ ކަމަށެވެ.
މަސްދަރު: ބްލޫމްބާގް
