ވެނެޒުއޭލާ އާ ދެކޮޅަށް ހަނގުރާމަ އެއް އުފައްދަން އެމެރިކާ އިން މަސައްކަތް ކުރާ ކަމަށް އެ ގައުމުގެ ރައީސް މަދޫރޯ ވިދާޅުވެއްޖެ

އެމެރިކާ ސަރުކާރުން އޭނާއާ ދެކޮޅަށް ހަނގުރާމައެއް "އުފައްދަމުން" ދާކަމަށް، ވެނެޒުއޭލާގެ ރައީސް ނިކޮލަސް މަދޫރޯ ވިދާޅުވެއްޖެ އެވެ.

ދެ ގައުމުގެ ގުޅުން ގޯސް ވަމުން ދާ މި ދަނޑިވަޅުގައި އެމެރިކާ އިން ވަނީ ދުނިޔޭގެ އެންމެ ބޮޑު ހަނގުރާމަ މަތީ މަނަވަރު ދެކުނު އެމެރިކާގެ މި ޤައުމާ ދިމާއަށް ފޮނުވާފަ އެވެ.

މިއީ ވެނެޒުއޭލާ ގެ ސަރަހައްދަށް އެމެރިކާގެ އަސްކަރިއްޔާ ޖަމާ ކުރަމުން ގެންދާ އިރު، މަދޫރޯ ގެ ސަރުކާރު ވައްޓާލަން އެމެރިކާ އިން އުޅޭ ކަމުގެ އަޑުތައް ވަނީ ގަދަވެފަ އެވެ.

މަދޫރޯ ހުކުރު ދުވަހުގެ ރޭ ޤައުމީ ޓީވީ ގައި ވިދާޅުވީ، 90 މަތިންދާބޯޓާއި ހަމަލާދޭ ހެލިކޮޕްޓަރު އުފުލޭ ޔޫއެސްއެސް ޖެރަލްޑް އާރް ފޯޑް ވެނެޒުއޭލާ އާ ކައިރިވަމުން ދާއިރު، ޓްރަމްޕްގެ ސަރުކާރުން "އައު ދާއިމީ ހަނގުރާމައެއް އުފައްދަމުން" ދާކަމަށް.

ޓްރަމްޕް ވަނީ މަދޫރޯ އަކީ ނުރައްކާތެރި ގޭންގެއް ކަމަށް ވާ ޓްރެން ޑި އަރާގުއާ ގެ އިސްވެރިޔާ ކަމަށް ވިދާޅުވެފައެވެ. އެހެން ނަމަވެސް އެކަމުގެ އެއްވެސް ހެއްކެއް ދައްކަވާފަ އެއް ނުވެ އެވެ.

މިދިޔަ އަހަރު ވެނެޒުއޭލާގެ އިންތިޚާބު ވަގަށް ނެގިކަމުގެ ތުހުމަތު މަދޫރޯ އަށް ފުޅާ ދާއިރާއެއްގައި ކުރެވި، އެމެރިކާ ހިމެނޭ ގޮތަށް ގިނަ ޤައުމުތަކުން ވަނީ އޭނާ މަގާމުން ދުރުވުމަށް ގޮވާލާފަ އެވެ.

ސަރަޙައްދުގައި ހަމަނުޖެހުން އިތުރު ވަމުންދާ އިރު، ޓްރަމްޕް ވިދާޅުވެފައި ވަނީ ވެނެޒުއޭލާ ގައި ސީއައިއޭ ގެ އޮޕަރޭޝަންތަކަށް ހުއްދަ ދެއްވާފައިވާ ކަމަށާއި، ކެރިބިއަންގައި އޮންނަ ވެނެޒުއޭލާ ގައި ހަރަކާތްތެރިވާ މަސްތުވާތަކެތީގެ ވިޔަފާރި ކުރާ ގޭންގުތަކާ ދެކޮޅަށް އެއްގަމުގެ ހަމަލާތައް ދިނުމަށް ވިސްނަމުންދާ ކަމަށް ވިދާޅުވެފައެވެ.

ތެލުގެ މުއްސަނދިކަން ލިބިފައިވާ ވެނެޒުއޭލާ އަކީ ކޮކޭން ފަތް އުފައްދާ ގައުމެއް ނޫން ކަމަށް މަދޫރޯ ވަނީ ވިދާޅުވެފަ އެވެ.

ސެޕްޓެމްބަރ 2 އިން ފެށިގެން، އެމެރިކާގެ ބާރުތަކުން ވަނީ 10 އުޅަނދަކަށް ހަމަލާދީފައެވެ. އޭގެ ތެރެއިން 8 ހަމަލާ ދީފައިވަނީ ކެރިބިއަން ގައެވެ. ހަމަލާތައް ދިން ސަބަބެއް ކަމަށް އެމެރިކާ އިން ބުނެފައި ވަނީ އެ ބޯޓު ފަހަރު ގައި އެމެރިކާ އަށް މަސްތުވާތަކެތި ވަގަށް އުފުލާތީ އެވެ. މި ހަމަލާތަކުގައި މަދުވެގެން 43 މީހުން ވަނީ މަރުވެފައެވެ.