250 މިލިއަން ޑޮލަރުގެ ބޯލް ރޫމް އަށް އަމިއްލަ ނަން ދޭން އުޅޭ ވާހަކަ ޓްރަމްޕް ދޮގު ކުރައްވައިފި

އެމެރިކާގެ ރިޔާސީ ގަނޑުވަރު، ވައިޓް ހައުސްގެ އީސްޓް ވިންގް ތަޅާލުމަށް ފަހު، އެ ތަނުގައި 250 މިލިއަން އެމެރިކާ ޑޮލަރުގެ ބޯލް ރޫމެއް ތަރައްޤީ ކުރަމުން އަންނައިރު، އެ ތަނަށް އަމިއްލަ ނަން ދޭން އުޅޭ ވާހަކަ އެމެރިކާގެ ރައީސް ޑޮނަލްޑް ޓްރަމްޕް ދޮގު ކުރައްވައިފި އެވެ.

ޓްރަމްޕްގެ ނިންމެވުމަށް ވައިޓް ހައުސްގެ އީސްޓް ވިންގް ތަޅާލުމުގެ މަސައްކަތް ފަށާފައިވާއިރު، ޓްރަމްޕް ވިދާޅުވެފައި ވަނީ، 150 އަހަރަށް ވުރެ ގިނަ ދުވަސް ވެފައިވާއިރު، ކޮންމެ ރައީސަކު ވެސް ވައިޓް ހައުސްގައި ބޯލް ރޯމެއް (އިވެންޓް ހޯލެއް) ހުރުމަށް އެދިވަޑައިގެންފައިވާ ކަމަށެވެ.

އެމެރިކާ ސަރުކާރުގެ ބައެއް އިސް އޮފިޝަލުންނާ ހަވާލާދީ މީޑިއާ ތަކުގައި ބުނެފައި ވަނީ، ޓްރަމްޕް ބޭނުންފުޅު ވަނީ އެ ބޯލް ރޫމް އަށް އޭނާގެ އަމިއްލަ ނަން ދިނުމަށް ކަމަށެވެ. އޭބީސީ ނިއުސް އިން ބުނެފައި ވަނީ، އެ ބޯލް ރޫމް އަށް ދިނުމަށް ނިންމާފައިވާ ނަމަކީ "ޕްރެޒިޑެންޓް ޑޮނަލްޑް ޖޭ ޓްރަމަޕް ބޯލް ރޫމް" ކަމަށެވެ.

އެކަމާ ގުޅޭ ގޮތުން ވައިޓް ހައުސްގެ އިސް އޮފިޝަލަކު ވިދާޅުވެފައި ވަނީ، އެ މަޝްރޫއު ކުރިއަށް ގެންދިޔުމަށް މިހާތަނަށް 350 މިލިއަނަށް ވުރެ ގިނަ އެމެރިކާ ޑޮލަރު ލިބިފައިވާ ކަމަށެވެ. ބޯލް ރޫމް ތަރައްޤީ ކުރުމުގެ މަޝްރޫއު އަށް ބޮޑެތި އަދަދު ތަކުން ޑޮލަރު ލިބެމުން އަންނާތީ، ކުރިއަށް އޮތް ތަނުގައި އެ އަދަދު އިތުރުން އެކަށީގެންވާ ކަމަށް ވެސް ވަނީ ބުނެފަ އެވެ.

އިތުރަށް ލިބުނު ފައިސާއާ ގުޅޭ ގޮތުން ސުވާލު ކުރުމުން ޓްރަމްޕް ވިދާޅުވެފައި ވަނީ، އެތައް މިލިއަން ޑޮލަރެއް ލިބެމުން އަންނަ ކަމަށެވެ. އަދި އެ ފައިސާ ޚަރަދު ކުރާނީ ވައިޓް ހައުސް އަށް ކަމަށް ވެސް ޓްރަމްޕް ވިދާޅުވި އެވެ. މީގެ ކުރިން ވައިޓް ހައުސް އަށް ވަރަށް ބޮަށް އިހުމާލުވެފައިވާ ކަމަށް ފާހަގަ ކުރައްވައި ޓްރަމްޕް ވިދާޅުވީ، އޭނާގެ މުސާރަ ވެސް ޚަރަދު ކުރަނީ ވައިޓް ހައުސް އަށް ކަމަށެވެ.

ބޯލް ރޫމް އަށް އަމިއްލަފުޅު ނަން ދިނުމާ ގުޅޭ ގޮތުން ދެކެވެމުން އަންނަ ވާހަކަ ތަކަަށް އިޝާރާތް ކުރައްވައި ޓްރަމްޕް ވިދާޅުވީ، އެއީ ދޮގު ޚަބަރު ތަކެއް ކަމަށެވެ. މިވަގުތު ވަކި ނަމެއް ދިނުމަށް ނިންމާފައި ނުވާ ކަމަށާއި އެއީ ފަހުގެ ކަމެއް ކަމަށް ވެސް އޭނާ ވަނީ ވިދާޅުވެފަ އެވެ.

90،000 އަކަ ފޫޓުގެ މި އިމާރާތަކީ މިހާރުގެ މައި އިމާރާތާއު، އީސްޓް އަދި ވެސްޓް ވިންގްގެ ޖުމުލަ ބޮޑު މިނުގެ ދެގުނަށް އަށް ވުރެ ބޮޑު އިމާރާތެކެވެ. ޓްރަމްޕް ވިދާޅުވެފައި ވަނީ، މިހާރު ތަރައްޤީ ކުރަމުން އަންނަ ބޯލް ރޫމުގައި 650 މީހުންނަށް އިށީނދެވޭނެ ޖާގަ ހުންނާނެ ކަމަށެވެ. މިއީ މިހާރުގެ އީސްޓް ވިންގްގެ ޖާގަ އަށް ވުރެ ތިން ގުނަ ބޮޑު ޖާގައެއް ކަމަށް ބުނެފައިވެ އެވެ.

މީގެ އިތުރުން ޓްރަމްޕް ވިދާޅުވެފައި ވަނީ އެ މަޝްރޫއު ފައިނޭންސް ކުރުމަށް، އެޕަލް، އެމެޒޯން، ލޮކްހީޑް މާޓިން އަދި ކޮއިންބޭސް ފަދަ ބޮޑެތި ކުންފުނި ތަކުން 25 މިލިއަން އެމެރިކާ ޑޮލަރާ ހަމައަށް ހަދިޔާ ކޮށްފައިވާ ކަމަށެވެ.