އަލް-އަޤްޞާ ވަށައިގެން އިސްރާއީލުން ކޮންނަމުން ދިއުމުގެ ސަބަބުން މިސްކިތުގެ ބައެއް ވެއްޓުމުގެ ބިރު އެބައޮތް: ވަފާ ނިއުސް
24 އޮކްޓޯބަރު 2025 | ހުކުރު 20:03މުޤައްދަސް އަލް-އަޤްޞާ މިސްކިތް ވަށައިގެން އިސްރާއީލުން ކުރިއަށް ގެންދާ ކޮނުންތަކުން މިސްކިތުގެ ދަށުން ބިންގަނޑަށް ބޮޑު ގެއްލުމެއް ލިބި، ވެއްޓިދާނެކަމުގެ ނުރައްކާ އެބައޮތް. އިސްރާއީލުން މިކުރާ މަސައްކަތަކީ ސައިންޓިފިކް ހަމަތަކާ ޚިލާފަށް، ހަމައެކަނި ސިޔާސީ މަޤްސަދު ޙާސިލްކުރުމަށް ކުރާ ނުރައްކާތެރި ކަމެއް.
ޖެރޫސަލަމް ގެ ގަދީމީ ސިޓީގެ އަލް-އަޤްސާ މިސްކިތުގެ ގޯތި ތެރޭގައި ހުންނަ ޑޯމް އޮފް ދަ ރޮކް ކައިރިން މީހަކު ހިނގާފައި ދަނީ
އިސްރާއީލު ސަރުކާރުން އަލް-އަޤްޞާ މިސްކިތް ވަށައިގެންނާއި ޖެރޫސަލަމްގެ ގަދީމީ ސިޓީގެ ސަރަހައްދުތައް ކޮންނަމުން ދިއުމުގެ ސަބަބުން މިސްކިތުގެ ބައެއް ވެއްޓިދާނެކަމުގެ ބިރު އެބައޮތް ކަމަށް ފަލަސްތީނުގެ ވަފާ ނިއުސް އޭޖެންސީން ބުރާސްފަތި ދުވަހު ރިޕޯޓުކޮށްފިއެވެ.
ނިއުސް އޭޖެންސީ އަށް ދެއްވި އިންޓަވިއުއެއްގައި، ޖެރޫސަލަމް ގަވަރނަރޭޓުގެ މުރުޝިދު މަޢުރޫފް އަލް-ރިފާއީ ވަނީ "އަލްއަޤްޞާ މިސްކިތުގެ ދަށުން ކުރިން ކޮނެފައިވާ ކޮނުން ތަކާއި އަދި މިހާރު ކުރިއަށް ގެންދާ ކޮނުންތަކުގެ ސަބަބުން، މިސްކިތުގެ ބައެއް ވެއްޓިދާނެ،" ކަމުގެ އިންޒާރު ދެއްވާފައެވެ.
"މި ކޮނުންތަކުގެ ސަބަބުން ގަދީމީ ގެތަކާއި ގަދީމީ މަދަރުސާތައް ފަދަ ފަލަސްތީނުގެ ބައެއް މުހިންމު އާސާރުތައް ހަލާކުވެ، އަދި އަލް-އަޤްޞާ މިސްކިތުގެ ދަށުގެ ފަސްގަނޑު ހަލާކުވެ، މިސްކިތުގެ ބިންގަލުގެ ސްޓެބިލިޓީ އަށް ނުރައްކާވެދާނެ" ކަމަށް އަލް-ރިފާއީ ވިދާޅުވިއެވެ.
އޭގެ އިތުރުން އޭނާ ވިދާޅުވަނީ އިސްރާއީލުން ކޮންނަމުން ގެންދަނީ ސައިޓިފިކް އުސޫލަކުން ނޫން ކަމަށާއި ހަމަ އެކަނި ސިޔާސީ ބޭނުމަކަށް ޓަކައި ކަމުގައެވެ.
"މި ކޮނުންތަކުގައި ސައިންޓިފިކް މެތޮޑޮލޮޖީއެއް ނެތް، އަދި މިއީ ހަމައެކަނި ސިޔާސީ މަޤްޞަދުތަކަށްޓަކައި ކުރާ ކަމެއްކަން ޔަޤީން."
