އަޤްޞާ މިސްކިތަށް ޔަހޫދީ ފުލުހުން ދިން ހަމަލާތައް، މަންޒަރު ދުށް މީހެއްގެ ދުލުން!

ކޮންމެ އަހަރެއްގެވެސް ރަމަޟާން މަހާ ދިމާކޮށް، ޔަހޫދީ އިޒްރޭލުން ފަލަސްޠީނަށް ދޭ ހަމަލާތައް ވަރުގަދަ ކުރާ ވާހަކައަކީ އާ ވާހަކައެއް ނޫނެވެ. ނަމަވެސް، މިއީ އެވާހަކަތައް ނުދައްކާ ދޫކޮށްލަންޖެހޭ ސަބަބެއް ނޫނެވެ. އަނިޔާ ލިބެމުން ދަނީ މުސްލިމު އަޚުންނާ އުޚުތުންނަށެވެ. އިންސާނީ ޙައްޤުތަކުގެ ނަމުގައި ޤައުމުތަކަށް އަރާ، އެތައް ބައެއްގެ މިނިވަންކަމާ އިސްތިޤުލާލު ނަގާލަމުންދާ ހުޅަނގުގެ ޤައުމުތަކުން މިކަމުގައި ހަނު އޮންނަ އޮތުމާ މެދު ވިސްނާ ފިކުރު ކުރަން ޖެހެއެވެ. ޔަހޫދީ އިޒްރޭލުގެ ޢުދުވާންތަކުގެ ބިރުވެރިކަމާއި ނަމާންކަން، އެކަން ތަޙައްމަލު ކުރި މީހުންނަށް ވުރެ ވަކިން ރަނގަޅަށް ބަޔާން ކޮށްދެވޭނެ އެހެން ބަޔަކުވެސް ނުތިބޭނެއެވެ.

މި އަހަރުގެ ރަމަޟާން މަހާއެކުވެސް ޔަހޫދީ އިޒްރޭލުގެ ޢުދުވާންތައް ވަރުގަދަ ކުރަން ފެށިއެވެ. އެކި ގޮތްގޮތުން ދުއްތުރާތައް ކުރިމަތި ކުރަމުން ގޮސް، އޭޕްރިލް 5 ވަނަ ދުވަހުގެ ރޭ ވެގެން ދިޔައީ އެންމެ ވަރުގަދަ ހަމަލާތަކެއް ދިން އެއް ރެއަށެވެ. ހަމަލާތައް ވަރުގަދަ ކުރީ އަލް-އަޤްޞާ މިސްކިތުގައެވެ. ސޯޝަލް މީޑިއަގައި ދައުރުވަމުންދާ އެ މަންޒަރުތައް ބަލާލި ކޮންމެ މީހެއްގެ ގައިން ހީބިހި ނަގައިގެންދެއެވެ.

ފަތިހަކަށް އަލިވިލެން ދިޔަ އެ ދަންވަރުގެ ވަޤުތުގައި، އިޒްރޭލުގެ ޔަހޫދީން ވަނީ ރޭ އަޅުކަމަށް އަޤްޞާ މިސްކިތުގައި ތިބި އެތައް ބަޔަކަށް ހަމަލާދީފައެވެ.

އިޒްރޭލުގެ މި ލާއިންސާނީ އަނިޔާތަކާއެކު ހުޅަނގު އައްސޭރީގައި މުޒާހަރާތައް ވަނީ ފަށާފައެވެ. އިޒްރޭލުގެ އަސްކަރިއްޔާއިން ވަނީ، އިޒްރޭލަށް އަމާޒުކޮށް ޣައްޒާއިން 9 ރޮކެޓެއް ފޮނުވާލި ކަމަށް ބުނެފައެވެ. މިއާއެކު، މި ރަމަޟާން މަހަކީވެސް އިޒްރޭލާއި ފަލަސްޠީނާ ދެމެދު އަނެއްކާވެސް ވަރުގަދަ ކުރިމަތިލުންތަކެއް ނުވަތަ ހަނގުރާމައެއް ކޮށްފާނެ މަހަކަށް ވެގެން ހިނގައިދާނެ ކަމުގެ ބިރު ވަނީ ބޮޑުވެފައެވެ.

1444 ވަނަ އަހަރު ރަމަޟާން މަސް ދިމާވެފައި މި ވަނީ، ޔަހޫދީން ފާހަގަ ކުރާ ޕާސްއޯވަރއާއި ނަޞާރާއިން ފާހަގަ ކުރާ އީސްޓަރގެ ދުވަސްވަރާއެވެ.