އަލް އަގްސާ މިސްކިތުގެ ގޯތި ތެރެއަށް ޔަހޫދީން ތަކެއް ވަދެގަނެ އަޅުކަން ކޮށްފި
މުސްލިމުން ނޫން އެހެން މީހުން މިސްކިތުގެ ގޯތިތެރޭގައި އަޅުކަން ކުރުމަކީ މަނާ ކަމެއް
ބުރާސްފަތި ދުވަހު އަލް އަޤްސާ މިސްކިތުގެ ގޯތި ތެރެއަށް ޔަހޫދީންގެ ބަޔަކު ވަނީ ވަދެގަނެފައި
އިސްލާމްދީނުގައި ތިން ވަނަ އަށް އެންމެ މާތް ބިނާގެ ގޮތުގައި ބެލޭ، ޔަހޫދީ ދައުލަތުން ހިސޯރު ކޮށްފައިވާ އިރުމަތީ ޖެރޫސަލަމްގައި ހުންނަ އަލް-އަޤްޞާ މިސްކިތުގެ ގޯތިތެރެ އަށް ޔަހޫދީންގެ ގްރޫޕަކުން ވަދެގަނެއްޖެއެވެ.
ފަލަސްތީނުގެ ވަފާ ނިއުސް އޭޖެންސީން ރިޕޯޓުކުރި ގޮތުގައި، ބުރާސްފަތި ދުވަހު އިސްރާއީލުގެ ޣައިރު ގާނޫނީ ސެޓްލަރުންގެ ތެރެއިން ގުރޫފެއްގެ މީހުން އަލް-އަޤްޞާ މިސްކިތުގެ ގޯތިތެރެއަށް ވަދެގަތީ އިސްރާއީލު ސިފައިންގެ ހިމާޔަތުގެ ދަށުގައެވެ.
ސެޓްލަރުންގެ ގޮތުގައި މުޚާތަބު ކުރެވޭ ޔަހޫދީންނަކީ ހިފާފައިވާ ވެސްޓް ބޭންކާއި އީސްޓް ޖެރޫސަލަމްގައި އޮންނަ ފަލަސްޠީނުގެ އަމިއްލަ ބިންތަކުގައި ޤާނޫނާ ޚިލާފަށް ދިރިއުޅޭ އިސްރާއީލުގެ ރައްޔިތުންނެވެ.
އިސްރާއީލު ސިފައިންގެ ޙިމާޔަތުގެ ދަށުން އެމީހުން ވަދެގަނެ، މިސްކިތުގެ ގޯތިތެރޭގައި ޔަހޫދީ ދީނުގެ ދީނީ އަޅުކަންކޮށްފައި ކަމަށް ރިޕޯޓު ކޮށްފައިވެއެވެ.
ޖެރޫސަލަމްގެ މިހާރުގެ ހާލަތުގެ މައްޗަށް ހަދާފައިވާ އެއްބަސްވުން ތަކުގެ ދަށުން، މުސްލިމުން ނޫން އެހެން މީހުން މިސްކިތުގެ ގޯތި ތެރޭގައި އަޅުކަން ކުރުމަކީ މަނާކަމެކެވެ.
