ދައުލަތް ހިންގަމުންދަނީ އެންމެ ދެމެހެއްޓެނިވި ގޮތެއްގައެއް ނޫން: އިމާދު
އިމާދު ވިދާޅުވީ، މުޅި ދައުލަތުގައިވެސް ހަރުދަނާ ސިޔާސަތުތަކެއް އޮންނަން ޖެހޭ ކަމަށް
ކުރީގެ ރައްޔިތުންގެ މަޖިލީހުގެ ޚާއްސަ މެމްބަރު އިމާދު ސާލިޙު
ދައުލަތް މިހާރު އޮޕަރޭޓް ކުރަމުންދަނީ އެންމެ ދެމެހެއްޓެނިވި ގޮތެއްގައެއް ނޫން ކަމަށް ކުރީގެ ރައްޔިތުންގެ މަޖިލީހުގެ ޚާއްސަ މެމްބަރު އިމާދު ސާލިޙު ވިދާޅުވެއްޖެއެވެ.
ރާއްޖެޓީވީގެ ޓީވިޓޯކް ޕްރޮގްރާމްގައި ވާހަކަ ދައްކަވަމުން އިމާދު ވިދާޅުވީ، މުޅި ދައުލަތުގައިވެސް ހަރުދަނާ ސިޔާސަތުތަކެއް އޮންނަން ޖެހޭ ކަމަށެވެ. އެކަމަށްޓަކައި ދައުލަތުގެ ޚަރަދު ކުޑަކުރަންޖެހޭކަން އިމާދު ފާހަގަ ކުރެއްވިއެވެ.
އިމާދު ވިދާޅުވީ، ދައުލަތް މިހާރު އޮޕަރޭޓް ކުރަމުންދަނީ އެންމެ ދެމެހެއްޓެނިވި ގޮތެއްގައެއް ނޫން ކަމަށެވެ. އެގޮތުން ކޮންމެ ވެރިކަމެއް އަންނައިރު ވަޒީފާތައްވެސް ނީލަމުގެ އުސޫލުން ބެހުމާއި، އެކަމުގެ ސަބަބުން ޤައުމުގެ އުފެއްދުންތެރިކަމަށް އަސަރު ކުރާ މިންވަރަށް އިމާދު ވަނީ އަލިއަޅުވާލައްވާފައެވެ.
އޭގެ އިތުރުން، ސަރަޙައްދީ ގޮތުންވެސް ތަރައްޤީ ގެނައުމަށް މަސައްކަތްތަކެއް ކުރަންޖެހޭކަމަށް އިމާދު ވިދާޅުވިއެވެ. އެގޮތުގެ މަތިން އައްޑޫގެ ސަރަޙައްދުގައި ކުރެވިދާނެ ކަންތައްތަކެއް ހުރިކަމަށްވެސް އިމާދު ވިދާޅުވިއެވެ.
ސަރުކާރު އަންނަ ގޮތަށް ނިމިދިޔަ ސަރުކާރުގެ މަޝްރޫއުތައް ކުރިއަށް ގެންދިއުމަކީވެސް މުހިއްމު ކަމެއްކަމަށް އިމާދު ވިދާޅުވިއެވެ. ދައުލަތުގެ ސިޔާސަތުތައް ބައްޓަން ކުރަން ޖެހޭނީވެސް އެ ކަންކަމަށް ބަލައިގެންކަމަށް އިމާދު ވިދާޅުވިއެވެ. ނަމަވެސް މިހާރު އަދި އެ މަންޒަރު ފެންނަމުން ނުދާކަން އިމާދު ފާހަގަ ކުރެއްވިއެވެ.
އޭގެ އިތުރުން، އިޤްތިސާދީ ތަސައްވުރު ބިނާ ކުރަންވާނީ އާންމު ރައްޔިތު މީހާގެ އަސާސީ ކަންކަން ފުރިހަމަ ކޮށްދިނުމަށްފަހުކަމަށްވެސް އިމާދު ވިދާޅުވިއެވެ. އެއީ ދައުލަތުން ފަހިކޮށްދޭން ޖެހޭ ކަންކަން ކަމަށްވާއިރު، އެކަމުގެ ބޮޑު ބައި އޮތީ ޙައްލު ނުކުރެވިކަމަށް އިމާދު ވިދާޅުވިއެވެ.
