ނަތަންޔާހޫ، ނެޝަނަލް ސެކިއުރިޓީ އެޑްވައިޒަރު މަގާމުން ވަކި ކޮށްފި

އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ، ނެޝަނަލް ސެކިއުރިޓީ އެޑްވައިޒަރުގެ މަގާމުގައި ހުންނެވި ޓްޒަޗި ހަނެގްބީ މަގާމުން ވަކި ކުރައްވައިފި އެވެ.

އިސްރާއީލްގެ ބޮޑު ވަޒީރުގެ އޮފީހުން ނެރެފައިވާ ބަޔާނެއްގަިއ ބުނެފައި ވަނީ، ނަތަންޔާހޫ ވަނީ ނެޝަނަލް ސެކިއުރިޓީ ކައުންސިލްގެ އެންމެ އިސްވެރިޔާ މަގާމުން ވަކި ކޮށްފަ އެވެ. އަދި އެ މަގާމަށް ވަގުތީ ގޮތުން ގިލް ރެއިޗް އައްޔަން ކުރެއްވުމަށް ނިންމަވާފައިވާ ކަމަށް ވެސް ބަޔާނުގައި ވަނީ ބުނެފަ އެވެ.

ނެޝަނަލް ސެކިއުރިޓީ ކައުންސިލްގެ އިސްވެރިޔަކށް ވަގުތީ ގޮތުން ހަމަޖެއްސެވި ގިލް ރެއިޗް މީގެ ކުރިން ހުރީ، އެ ކައުންސިލްގެ ނައިބުގެ މަގާމުގަ އެވެ.

ހަނެގްބީ ވަނީ ވޭތުވެ ދިޔަ ތިން އަހަރު ވަންދެން ގައުމީ ސަލާމަތާ ބެހޭ ކައުންސިލުގެ އިސްވެރިޔާގެ މަގާމު ފުރުއްވާފައި އެވެ. އޭނާ ކުރެއްވި މަސައްކަތް ތަކަށް ޝުކުރު އަދާ ކުރައްވާ، ކުރިއަށް އޮތް ދުވަސް ތަކުގައި ކާމިޔާބާއި ދުޅަހެޔޮކަމަށް އެދިވަޑައިގަންނަވާ ކަމަށް ބޮޑުވަޒީރު ނެތަންޔާހޫ ވިދާޅުވި އެވެ.

މި ބަދަލު ގެނެސްފައި މި ވަނީ އިސްރާއީލް އާއި ހަމާސްއާ ދެމެދު ހިނގަމުންދާ ހަނގުރާމައިގެ ތެރޭގައި، އިސްރާއީލުގެ ސަލާމަތީ އޮނިގަނޑަށް ގެންނަ އެތައް ބަދަލު ތަކެއްގެ ތެރެއިންނެވެ.

ގައުމީ ސަލާމަތާ ބެހޭ ކައުންސިލަކީ އިސްރާއީލުގެ ސަލާމަތީ ސިޔާސަތުތައް އެކުލަވާލުމުގައި އެންމެ މުހިންމު ދައުރެއް އަދާކުރާ އެއް މުއައްސަސާއެވެ.