ލ. އަތޮޅަށް ރައީސް މުހައްމަދު މުއިއްޒު މިހާރު ކުރައްވަމުން ގެންދަވާ ދަތުރުފުޅުގައި އެ އަތޮޅު ދަނބިދޫ އަށް ވަޑައިގެން އެރަށުގައި ގިނަ މަޝްރޫއުތަކެއް ފެށިގެން ދިޔައީ ރައީސް "އެވަނީ ފެށިފައި" އޭ ވިދާޅުވި ބަސްފުޅުންނެވެ.

އެ ރަށުގެ ރައްޔިތުންނާ ބައްދަލު ކުރައްވާ އަންގާރަ ދުވަހު މުއިއްޒު ދެއްކެވި ވާހަކަފުޅުގައި ވިދާޅުވީ މޫސުން ތަން ނުދުނިމުގެ ސަބަބުން ރަސްމިއްޔާތެއްގެ ސިފައިގައި މަޝްރޫއުތައް ފެށޭ ގޮތް ނުވީ ކަމުގައެވެ. އެހެން ނަމަވެސް މަޝްރޫއުތައް އެވަނީ ފެށިފައި ކަމުގައި ރައީސް ވިދާޅުވިއެވެ.

"ރަށުގެ ތަރައްޤީ އަށް ވަރަށް މުހިންމު މަޝްރޫޢުތަކެއް މިއަދު ފެށިގެން މިދިޔައީ. މޫސުން ތަންނުދިނުމުގެ ސަބަބުން ރަސްމިއްޔާތެއްގެ ސިފައިގައި، ޢަމަލީގޮތުން މަސައްކަތްތައް އެގޮތަށް ނުފެށުނު ނަމަވެސް، ފެށިގެން ގޮސްފައި އެބަވޭ."

އެގޮތުން ރައީސް ވިދާޅުވި ބަސްފުޅުން އެރަށުގައި ފެށުނު މަޝްރޫއުތަކުގެ ތެރޭގައި ސިއްހީ މަރުކަޒަށް އިތުރުކުރެވޭ އިމާރާތެއްގެ މަސައްކަތް ހިމެނެއެވެ.

"ޞިއްޙީ މަރުކަޒު ތަރައްޤީ ކުރުމަށްޓަކައި، ޞިއްޙީ މަރުކަޒަށް އިތުރުކުރެވޭ އިމާރާތެއްގެ މަސައްކަތް، މިހާރު އެވަނީ ފެށިފައި،" ކަމަށް މުއިއްޒު ވިދާޅުވިއެވެ.

އޭގެ އިތުރުން "ފުލުހުންގެ މަރުކަޒެއް ގާއިމު ކުރުމުގެ މަސައްކަތް ވެސް މިހާރު ވަނީ ފެށިފައި،" ކަމަށް ވެސް ވިދާޅުވިއެވެ.

ރަށުގެ މަގުތައް ޒަމާނީ ފެންވަރަކަށް ހެދުމުގެ އެއްބަސްވުމުގައި ސޮއި ކުރުމުގެ ރަސްމިއްޔާތު އޮތް ނަމަވެސް ރައީސް މުއިއްޒު ވިދާޅުވީ، އެމަސައްކަތް ކުރިއަށް ދާނީ ނަރުދަމާގެ މައްސަލަ އޭގެ ކުރިން ހައްލު ކޮށްގެން ކަމުގައެވެ.

"ނަރުދަމާގެ މައްސަލަ ޙައްލު ކުރުމަށް ފަހު، މިއަދު ސޮއި ކުރެވިގެން ދިޔަ މަގުތައް ހެދުމުގެ މަސައްކަތް، އަޅުގަނޑު ހިތުން ފެށޭނެ."

މުއިއްޒު ވިދާޅުވީ، ދަނބިދޫގައި 500 މީހުންގެ ޖާގައިގެ މިސްކިތެއް ގާއިމު ކުރުމަށް، މި އަހަރު ތެރޭގައި ޢަމަލީ މަސައްކަތް ފެށުމަށްޓަކައި، ދާދި އަވަހަށް ކުންފުންޏަކާ އެގްރީމަންޓް ހައްދަވާނެ ކަމަށެވެ. އެއީ ކޮން ކުންފުންޏެއް ކަން ހާމަ ނުކުރެއްވިޔަސް މުއިއްޒު ވިދާޅުވީ، މި އަހަރު ތެރޭގައި މިސްކިތުގެ މަސައްކަތް ފަށާނެ ކަމަށެވެ.

ހޭންޑްބޯލް ކޯޓެއް އެޅުމަށް މި އަހަރުގެ ތެރޭގައި ފަރާތަކާ ހަވާލުކުރެވޭނެ ކަމަށާއި މި އަހަރުގެ ތެރޭގައި ހޭންޑްބޯލް ކޯޓު އެޅުމުގެ މަސައްކަތް ވެސް ފެށިގެންދާނެ ކަމަށް މުއިއްޒު ވިދާޅުވިއެވެ.