ފާރިސްގެ މައްސަލާގައި 45 ސިޓީ މުވައްސަސާތަކަށް، އެކަށީގެންވާ ޖަވާބެއް ނުލިބޭ

ކޯޓު އަމުރެއްގެ ދަށުން ބަންދު ކޮށްފައި ހުރި ދިއްގަރު ދާއިރާގެ މެމްބަރު އަހްމަދު ފާރިސް މައުމޫނުގެ ފަރާތުން ދައުލަތުގެ އެކި މުއައްސަސާތަކަށް 45 ސިޓީ އާއި މައްސަލަ ހުށަހަޅާފައިވާނެ ކަމަށް އޭނާގެ ގާނޫނީ ވަކީލް މައުމޫނު ހަމީދު ވިދާޅުވެއްޖެ އެވެ.

ފާރިސްގެ ގާނޫނީ ވަކީލުންގެ ފަރާތުން ބޭއްވި ނޫސްވެރިންގެ ބައްދަލުވުމުގައި މައުމޫނު ހަމީދު ވިދާޅުވީ ފާރިސް ބަންދުގައި ހުންނަވާތާ 50 ދުވަސްވެފައިވާއިރު ފާރިސްއާމެދު އަމަލުކުރަމުންދާ ގޮތާމެދު ދައުލަތުގެ މުއައްސަސާތަކުން އެކަށީގެންވާ ފިޔަވަޅުތަކެއް އަޅާފައިނުވާ ކަމަށެވެ.

"މީގެ ތެރޭގައި މޯލްޑިވްސް ޕޮލިސް ސާވީސް، މޯލްޑިވްސް ކަރެކްޝަނަލް ސާވީސް، ހިއުމަންރައިޓްސް ކޮމިޝަންސް، ޖުޑިޝަލް ސާވީސް ކޮމިޝަންސް، ކްރިމިނަލް ކޯޓު، ހައިކޯޓު އަދި ސުޕްރީމް ކޯޓު ހިމެނިގެންދޭ އަދި އޭގެ އިތުރަށް ރައްޔިތުންގެ މަޖިލީހަށް އެތަކެއް ސިޓީއެއް ހުށަހަޅާފައިވާނެ،" މައުމޫނު ހަމީދު ވިދާޅުވި އެވެ.

ރައްޔިތުންގެ މަޖިލީހުގެ މެމްބަރަކަށް ހުންނަވައި، ރައްޔިތުންގެ މަޖިލީހަށް ފޮނުވި ސިޓީތަކަށް އެކަށީގެންވާ އެއްވެސް ޖަވާބެއް ދީފައިނުވާއިރު ޖަވާބު ހޯދުމަށް ތިން ދުވަހެއްގެ މަތިން އެ އިދާރާއަށް ވަޑައިގެންނެވި ކަމަށްވެސް މައުމޫނު ވިދާޅުވި އެވެ.

"އަޅުގަނޑުމެނަށް އެނގިފަ އޮތް ގޮތުން (ރައްޔިތުންގެ މަޖިލީހުގެ) އެ އިދާރާގައި 135 މުވައްޒަފުން ތިއްބަވާ. އެތައް މިލިއަނުން ބަޖެޓް އޮވޭ. އެހެން ނަމަވެސް މި ދެންނެވި ސުވާލަށްވެސް، އަހްމަދު ފާރިސް މައުމޫނު ހައްޔަރުކުރި މައްސަލަ ރައްޔިތުންގެ މަޖިލީހުގެ އިމްތިޔާޒް ކޮމެޓީއަށް ހުށަހެޅުނުކަން ނުވަތަ ނޫންކަން ވިދާޅުވާން އެނގިވަޑައިގަންނަވާ އެއްވެސް ބޭފުޅަކު ނެތް. ޖަވާބު ދާރީވާން ކެރިވަޑައިގަންނަވާ އެއްވެސް ބޭފުޅަކު ނެތް،" މައުމޫނު ހަމީދު ވިދާޅިވި އެވެ.

ފާރިސް ބަންދުގެ މުއްދަތުގެ އިތުރުކުރި މައްސަލަ އާއި ކޯޓު އަމުރު ނެރިފައިވާ މައްސަލަ ހައި ކޯޓަށް ހުށަހެޅި ނަމަވެސް އަޑުއެހުންތައް ނިމި ހުކުމް ނުކޮށް ގިނަ ދުވަސްތަކެއް ވަނީ ވެފަ އެވެ. އެ މައްސަލަ އަވަސްކޮށްދިނުމަށް ފާރިސްގެ ފަރާތުން ހައިކޯޓުގައި ވަނީ އެދިފަ އެވެ. އަދި ފާރިސް ބަންދު ބަހައްޓާފައިވަނީ ގާނޫނާ ގަވައިދާ ހިލާފަށް ކަމަށްވާތީ އޭނާ ދޫކޮށްލުމުގެ އަމުރެއް ނެރެދިނުމަށް ޕްރޮސެކިއުޓާ ޖެނަރަލަށްވެސް ވަނީ ސިޓީއަކުން ދަންނަވާފަ އެވެ.

ފާރިސްގެ މައްޗަށް ތުހްމަތު ކުރާ ޖިނާއީ ތުހްމަތުތަކުގެ މައްސަލާގެ ޝަރީއަތް ނިމެންދެން އޭނާ ބަންދުގައި ބަހައްޓަން ކްރިމިނަލް ކޯޓުން ވަނީ އަމުރުކޮށްފަ އެވެ.

ފާރިސްގެ މައްޗަށް ޖިނާއީ ދެ ދައުވާއެއް ވަނީ ދައުލަތުން އުފުލާފަ އެވެ. އޭގެ ތެރެއިން ޝަރީއަތް ފެށިގެން ކުރިއަށްދަނީ އޭނާގެ މައްޗަށް އުފުލި ޝަހްސް އޮޅުވާލުމުގެ ދައުވާ އަށެވެ.