"1.8 ބިލިއަން ރުފިޔާއަށް، އަނެއްކާވެސް 3 ޑްރޯން ގެނެސްފި"
ރާއްޖޭގެ އިޤްތިޞާދީ ހާލަތު ދަށްވެފައިވާ ދަނޑިވަޅެއްގައި ސަރުކާރުން 1.8 ބިލިއަން ރުފިޔާއަށް 3 އަސްކަރީ ޑްރޯން ގެނައުމާމެދު ގިނަބަޔަކު ސުވަލު އުފައްދާ
މީގެކުރިން ސަރުކާރުން ގެނެސްފައިވާ ޑްރޯން އެއް ކައިރީ، ރައީސް މުއިއްޒު އަދި ޑިފެންސް މިނިސްޓަރ ޣައްސާން މައުމޫން
1.8 ބިލިއަަން ރުފިޔާ (90 މިލިއަން ޑޮލަރު) ހަރަދުކޮށްގެން ރައީސް މުއިއްޒުގެ ސަރުކާރުން އަނެއްކާވެސް 3 ޑްރޯން ގެނެސްފިކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެމްބަރު މުހައްމަދު ވަހީދު ވިދާޅުވެއްޖެއެވެ.
މާފަންނު ބޮނޑިބަތް ޕާކުގައި އެމްޑިޕީން ހުކުރު ދުވަހުގެރޭ ބޭއްވި ކަންމަތީ ޖަލްސާގައި ވާހަކަ ދައްކަވަމުން ވަހީދު ފާހަގަކުރެއްވި ގޮތުގައި، މީގެ ކުރިން ރައްޔިތުންގެ މަޖިލީހުގެ އިންތިހާބު ކައިރިވެފައި އޮއްވާ ސަރުކާރުން 37 މިލިއަން ޑޮލަރު ހަރަދުކޮށްގެން 3 ޑްރޯން ގެނެސްފައިވެއެވެ. އަދި މިފަހުން ތުރުކީ އިން 3 އަސްކަރީ ޑްރޯން ގެންނަން ސަރުކާރުން 90 މިލިއަން ޑޮލަރު ( 1.8 ބިލިއަން ރުފިޔާ) ހޭދަކޮށްފައިވާ ކަމަށް ވަހީދު ވިދާޅުވިއެވެ.
ރާއްޖޭގެ އިގްތިސާދީ ހާލަތު ދަށްވެފައިވާ މި ދަނޑިވަޅުގައި މިފަދަ ބޮޑު އަގެއްގައި އަސްކަރީ ހަތިޔާރު ގަތުމަކީ ސުވާލު އުފެދޭ ކަމެއްކަމަށް ވަހީދު ވިދާޅުވިއެވެ. އަދި ދައުލަތުގެ އެހެނިހެން އަސާސީ ހަރަދުތައް ކުރަން ފައިސާ ނެތް ދަނޑިވަޅެއްގައި، އާންމު ރައްޔިތުންގެ ދިރިއުޅުމުގެ ހާލަތު ދަށްވަމުން ދާއިރު، މިފަދަ ބޮޑެތި ހަރަދުތައް ކުރަންޖެހޭ މިންވަރުގެ ސަލާމަތީ ނުރައްކަލެއް އޮތްތޯ ސުވާލު އުފައްދަވާފައިވެއެވެ.
ފުރަތަމަ އިންތިހާބަަށް ގަތީ 37 މިލިއަން ޑޮލަރުދީފަ 3 ޑްރޯން، އަނެއްކާ ކޮންތަނަކަށް ބޮން އަޅަންކަމެއް އަޅުގަނޑުމެންނަކަށް ނޭނގެ، 90 މިލިއަން ޑޮލަރަށް އަނެއްކާ އިތުރު 3 ޑްރޯން ރާއްޖެ ގެނެސްފި.... ބަލިމީހުން އެތިބީ ބޭސް ސިޓީ އަށް ބޭސް ނުލިބިފަ، ދެފުރާޅު ޖެއްސި ކޮންމެ ގެއެއްގަ މިރޭ އެތިބީ މާދަމާ ހެނދުނު ނާސްތާކޮށްލާނެ ގޮތެއް ނެތިފަ... 3 ޑްރޯން 90 މިލިއަން ޑޮލަރަށް މަގުމަތީ އަގަށްބަލާއިރު 1.8 ބިލިއަން ރުފިޔާއަށް 3 ޑްރޯން. އަޅުގަނޑުމެން ޔުކްރެއިން ހާލަތަށް ވެއްޓުނީ ކޮންއިރަކުތޯ، ޓޭންކަރާ ޑްރޯނާ ބަރު ހަތިޔާރު ގެންނަ ހިސާބަށް ރާއްޖެ ވެއްޓުނީ ކޮންއިރަކުތޯ، މިކޮންކަމެއްތޯ މިއީ.ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެމްބަރު މުހައްމަދު ވަހީދު
އެންމެފަހުން ތުރުކީ އިން ރާއްޖެ ގެނައި ޑްރޯން ޝިޕްމެންޓްތައް އައްޑު އަށް ގެންގޮސްފައި ވަނީ ބުދަ ދުވަހުގެ ރެޔާއި ހުކުރު ދުވަހުގެ ރޭގައެވެ. އަދި މި ޝިޕްމެންޓްތައް އައްޑޫ އަށް އުފުލާފައިވަނީ "ރޫބީ ސްޓާ އެއާވޭސް" އަދި "އެއާ މާސްޓާ" ގެ މަތިންދާބޯޓު ތަކުގައެވެ.
މިކަމާ ގުޅޭ އެއްވެސް މައުލޫމާތެއް އަދި ސަރުކާރުގެ އިދާރާއަކުން ހާމަކޮށްފައެއް ނުވެއެވެ. މީގެ ކުރިން ގެނައި އަސްކަރީ ޑްރޯންތަކުގެ މައުލޫމަތުވެސް ސަރުކާރުންވަނީ ސިއްރުކޮށްފައެެވެ.
ރައީސް މުއިއްޒުގެ ސަރުކާރުން އެންމެ ފުރަތަމަވެސް ޑްރޯންތައް ގެނެސްފައިވަނީ ކަނޑައެޅިގެން ގާނޫނާ ހިލާފަށް ކޮންޓިންޖެންސީ ބަޖެޓުގެ ތެރެއިން ކަމަށް އިދިކޮޅުފަރާތްތަކުން ބުނެފައިވެއެވެ. އަދި ދުނިޔޭގެ ބާޒާރުގައި ޑްރޯން ވިއްކަން ހުރި އަގަށް ވުރެ ބޮޑުކޮށް ޑްރޯންތައް ގަނެފައިވަނީ ޕީއެންސީގެ މެމްބަރުންގެ މަޖްލިސް ކެމްޕެއިނަށް ފައިސާ ހޯދުމަށްކަމަށްވެސް އިދިކޮޅު ފަރާތްތަކުން ވަނީ ތުހުމަތުކޮށްފައެވެ.
