ޓްރަމްޕް އާއި ޕުޓިންގެ ސަމިޓުގެ ދެ ވަނަ ބައްދަލުވުން ދެ ހަފުތާގެ ތެރޭގައި ބޭއްވިދާނެ ކަމަށް ރަޝިޔާ އިން ބުނެފި

އެމެރިކާގެ ރައީސް ޑޮނަލްޑް ޓްރަމްޕް އާއި، ރަޝިޔާގެ ރައީސް ވުލަޑިމިއަރ ޕުޓިންއާ ދެމެދު ބާއްވާ ސަމިޓުގެ ދެ ވަނަ ބައްދަލުވުން، ކުރިއަށް އޮތް ދެ ހަފުތާގެ މުއްދަތުގެ ތެރޭގައި ބޭއްވި ދާނެ ކަމަށް ރަޝިޔާގެ ރިޔާސީ ގަނޑުވަރުން ބުނެފި އެވެ.

ޓްރަމްޕް އާއި ޕުޓިންއާ ދެމެދު އެންމެ ފުރަތަމަ ސަމިޓެއް ބާއްވާފައި ވަނީ މިދިޔަ އޮގަސްޓު މަހުގެ ތެރޭގަ އެވެ. އެ ބައްދަލުވުން އޮތީ އެމެރިކާގެ އެލަސްކާގަ އެވެ. އެ ބައްދަލުވުމުގައި ރަޝިޔާ އިން ޔުކްރެއިންގައި ހިންގަމުން އަންނަ ހަނގުރާމަ ނިމުމަކަށް ގެނައުމަށް އެއްބަސް ވެވޭނެ ކަމަށް ބެލެވުނު ނަމަވެސް، ބައްދަލުވުމުން އެކަން ޙާސިލު ވެފައި ނުވެ އެވެ.

ރަޝިޔާގެ ރިޔާސީ ގަނޑުވަރު ކްރެމްލިން އިން ބުނެފައި ވަނީ، ޓްރަމްޕް އާއި ޕުޓިންގެ ދެ ވަނަ ބައްދަލުވުމެއް ކުރިއަށް އޮތް ދެ ހަފުތާގެ ތެރޭގައި، ނުވަތަ އެއަށް ވުރެ އަވަސް މުއްދަތެއްގައި ވެސް ބޭއްވިދާނެ ކަމަށެވެ. ނަމަވެސް، އެ ބައްދަލުވުމުގެ ކުރިން ކުރަން ޖެހޭ އެހެން ކަންތައްތަކެއް ހުރި ކަމަށް ވެސް ރަޝިޔާ އިން ވަނީ ފާހަގަ ކޮށްފަ އެވެ.

ހުކުރު ދުވަހު ޓްރަމްޕް އާއި ޕުޓިން ވެސް ވަނީ، ދެ ވަނަ ބައްދަލުވުމެއް ބާއްވަން އެއްބަސްވެ ވަޑައިގެންފަ އެވެ. ދެ ވަނަ ބައްދަލުވުން ބާއްވާނެ ވަގުތީ ތަނެއްގެ ގޮތުގައި މިވަގުތު ހަމަޖައްސާފައި ވަނީ ހަންގޭރީގެ ވެރި ރަށް، ބުޑަޕެސްޓްގަ އެވެ.

ކްރެމްލިންގެ ތަރުޖަމާނު ޑިމިޓްރީ ޕެސްކޮވް ވިދާޅުވެފައި ވަނީ، ދެ ވަނަ ބައްދަލުވުން ބޭއްވުމުގެ ކުރިން ރަޝިޔާގެ ފޮރިން މިނިސްޓަރު ސާގޭ ލަވްރޯވް އަދި އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ގުޅުއްވައި، ގިނަ ކަންތައްތަކެއް ހަމަޖައްސަން ޖެހޭނެ ކަމަށެވެ.

އޭނާ ވިދާޅުވީ ގިނަ ކަންތައްތަކަށް މަޝްވަރާ ކުރަން ޖެހޭ ކަމަށާއި، އެގޮތުން ވާހަކަ ދައްކާނެ ޓީމެއް ކަނޑަ އަޅައި، އަދި އެހެނިހެން ކަންކަން ވެސް ހަމަޖައްސަން ޖެހޭ ކަމަށެވެ. އެހެންކަމުން ހުރިހާ ކަމެއް ވެސް ކުރިއަށް ދާނީ ފަހަރަކު ހަރުފަތަކުން ކަމަށާއި، ދެ ރައީސުންގެ ވެސް ޚިޔާލު އަދި މަޝްވަރާ އޮންނާނެ ކަމަށް އޭނާ ވިދާޅުވި އެވެ.

އިތުރަށް ޕެސްކޮވް ވިދާޅުވެފައި ވަނީ، ސުލްހަވެރިކަމާ އެކު ހަނގުރާމަ ނިންމުމަށް ރަޝިޔާ އިން އަބަދު ވެސް ތައްޔާރަށް އޮތް ކަމަށެވެ. ނަމަވެސް، ސުލްހައިގެ މަޝްވަރާތައް ހުއްޓިފައި ވަނީ ޔުކްރެއިން އާއި ޔޫރަޕުގެ ޤައުމު ތަކުގެ ސަބަބުން ކަމަށް ރަޝިޔާ އިން ދެކޭ ކަމަށް އޭނާ ވިދާޅުވި އެވެ.

ޔުކްރެއިން އާއި ޔޫރަޕުގެ ބައިވެރިން ބުނެފައި ވަނީ، ހަނގުރާމަ ހުއްޓާލުމަށް ރަޝިޔާ އިން ހުށަހަޅަނީ ބަަލައި ގަންނަން އުނދަގޫ ޝަރުތު ތަކެއް ކަމަށެވެ. އަދި ރަޝިޔާގެ ރައީސް ޕުޓިން ހުންނެވީ ސުލްހައިގެ މަޝްވަރާ ތަކަށް ސީރިއަސްވެފައި ނޫން ކަމަށާއި، އެފަދަ ނިޔަތެއްގައި ޕުޓިން މަސައްކަތް ނުކުރައްވާ ކަމަށް ވެސް ބުނެފައިވެ އެވެ.

ދެ ވަނަ ސަމިޓެއް ބޭއްވުމަށް އެމެރިކާ އާއި ރަޝިޔާ އިން ތައްޔާރު ވަމުން އަންނައިރު، ޕުޓިން ވަނީ ހަންގޭރީގެ ބޮޑު ވަޒީރު ވިކްޓާ އޯބަންއާ ފޯނުން ގުޅުއްވައި މަޝްވަރާ ކުރައްވައިފަ އެވެ. އެ މަޝްވަރާ ތަކުގައި، ސަމިޓު ބާއްވަން ހަންގޭރީ އިން ތައްޔާރަށް އޮތް ކަމަށް އޯބަން ވިދާޅުވެފައިވާ ކަމަށް ކްރެމްލިން އިން ވަނީ ހާމަކޮށްފަ އެވެ.