ޖަލުގެ ކުޑަގޮޅިން އެންމެ މަތީ މަގާމަށް - މަޑަގަސްކަރައިގެ ވެރިކަމަށް ޒުވާނުންގެ މުޒާހަރާ އާ ގުޅުނު ސިފައިންގެ އެލީޓް ޔުނިޓްގެ ވެރިޔާ އައްޔަން ކޮށްފި
މަޑަގަސްކަރައިގެ އެލީޓް ކެޕްސެޓް އަސްކަރީ ޔުނިޓުގެ އިސްވެރިޔާ ކާނަލް މައިކަލް ރެންޑްރިއަނިރީނާ ޤައުމުގެ ވަގުތީ ރައީސްކަމަށް ވަނީ އައްޔަން ކޮށްފައި. އަސާސީ ޚިދުމަތްތައް ނުލިބިގެން ފެށުނު މުޒާހަރާތަކުގެ ތެރެއިން ކުރީގެ ރައީސް ފިލައި، ބާރުތައް އަސްކަރިއްޔާގެ އަތްމައްޗަށް އައުމާއެކު، ރައްޔިތުންގެ އުއްމީދުތައް ފުއްދައިދޭނެކަމުގެ ޔަޤީންކަން އޭނާ ދީފައިވޭ.
އޮކްޓޯބަރު 14: ކާނަލް މައިކަލް ރެންޑްރިއަނިރީނާ ގެ ކޮމާންޑުގެ ދަށުން ސިފައިންގެ ޕަރސަނަލް އެޑްމިނިސްޓްރޭޝަން ސެންޓަރު (ކެޕްސެޓް) ގެ ސިފައިން، ރިޔާސީ ގަނޑުވަރުގެ ކޮންޓްރޯލް އަތުލި.
މިދިޔަ ހަފްތާ ނިމުމުގެ ކުރިން، މަޑަގަސްކަރައިގެ ގިނަ ރައްޔިތުންނަށް ކާނަލް މައިކަލް ރެންޑްރިއަނިރީނާ އަކީ ދަންނަ ނަމެއް ނޫނެވެ.
ނަމަވެސް، އެންމެ ދެތިން ހަތަރު ދުވަހުގެ ތެރޭގައި ތެރޭގައި، އޭނާއަކީ ޤައުމުގެ އެންމެ ބާރުގަދަ މީހާއަށް ވެ، މިހާރު ރައީސްކަމުގެ ހުވާ ކުރި ފަރާތް ކަމުގައި ވަނީ ވެފައެވެ.
ރެންޑްރިއަނިރީނާ ގެ ކުއްލި ކުރިއެރުން ފެށުނީ މިދިޔަ ހޮނިހިރު ދުވަހުއެވެ. މަޑަގަސްކަރައިގެ އެލީޓް ކެޕްސެޓް އަަސްކަރީ ޔުނިޓުގެ އިސްވެރިޔާގެ ގޮތުގައި، އޭނާގެ ސިފައިންނާއެކު ވެރިރަށުގެ މެދުތެރެއަށް ދަތުރުކޮށް، ރައީސް އިސްތިއުފާ ދިނުމަށް ގިނަ ދުވަސްތަކެއް ވަންދެން ގޮވާލަމުން ގެންދިޔަ އެތައް ހާސް އާންމު ރައްޔިތުންނާ ގުޅުނެވެ.
މުޒާހަރާ ހޫނުވެ އެންމެ ފަހުން ރައީސް އެންޑްރީ ރަޖޮލީނާ ވެރިރަށުން ފިލިއެވެ. އެއާ އެކު ގާނޫނު ހަދާ މަޖިލީހުގެ މެމްބަރުން އޭނާ އިމްޕީޗް ކުރުމަށް ވޯޓުލުމާ އެކު އުމުރުން 51 އަހަރުގެ ރެންޑްރިއަނިރީނާ ހުސްވެފައިވާ ރިޔާސީ ގަނޑުވަރުގެ ކުރިމަތީގައި ހުރެ ދުނިޔޭގެ މީޑިއާތަކަށް އެންގީ ކެޕްސެޓުން އެ ގައުމުގެ ވެރިކަން ހިންގަން ފަށާ ވާހަކައެވެ.
އޭގެ ފަހުން ކޮންސްޓިޓިއުޝަނަލް ކޯޓުން އިޢުލާންކޮށްފައި ވަނީ އޭނާއަކީ ޤައުމުގެ އައު ވެރިޔާ ކަމަށެވެ. ނަމަވެސް ވައްޓާލެވުނު ރައީސް އަދިވެސް ބުނަމުން ދަނީ އޭނާ ވެރިކަމުގައި ދެމިހުރި ކަމަށެވެ. އެހެން ނަމަވެސް ވައްޓާލެވުނު ރައީސް ހުރި ތަނެއް އަދިވެސް ސާފުވެފައެއް ނުވެއެވެ.
އަލަށް ވެރިކަމަށް ހަވާލުވި ކާނަލް ރެންޑްރިއަނިރީނާ 2023 ވަނަ އަހަރުގެ ނޮވެމްބަރު މަހު މަޑަގަސްކަރައިގެ މެކްސިމަމް ސެކިއުރިޓީ ޖަލަށްލިއެވެ. އޭނާގެ މައްޗަށް އައި ހުކުމަކީ ޝަރީޢަތެއް ނެތި، ކުރި ހުކުމެއް ކަމަށް އެ ގައުމުގެ ގިނަ މީހުން ގަބޫލު ކުރެއެވެ. އޭނާ އަށް ތުހުމަތު ކުރެވުނީ އަމުރަށް ނުކިޔަމަންތެރިވުމަށް ހިތްވަރުދިނުމާއި ވެރިކަން ވައްޓާލުމުގެ ރޭވުމެވެ.
ދަރިވަރުންގެ ޖަމާޢަތްތަކާއި، ސިފައިންނާއި، ސިޔާސީ ވެރިން ހިމެނޭ ގޮތަށް ގިނަ ބަޔަކު ވަކާލާތުކޮށްފައިވަނީ ރެންޑްރިއަނިރީނާ ޖަލަށްލީ ނުޙައްޤުން ސިޔާސީ ސަބަބުތަކަށްޓަކައި ކަމަށެވެ. ޖެހިގެން އައި އަހަރުގެ ފެބްރުއަރީ މަހު އޭނާ މިނިވަން ކުރެވުނެވެ.
ކާނަލް މައިކަލް ރެންޑްރިއަނިރީނާ މަޑަގަސްކަރައިގެ އައު ރައީސްގެ ގޮތުގައި ހުވާކޮށްފައިވާ އިރު އޭނާ ވަނީ އަސްކަރީ ހެދުން ބަދަލުކޮށް ސޫޓު ލައިގެން، ހަފްތާތަކެއް ވަންދެން މަގުމައްޗަށް ނުކުމެ އިހުތިޖާޖުކުރި ޒުވާނުންނަށް ޝުކުރު އަދާކޮށްފައެވެ.
ވަގުތީ ރައީސް މަގާމާ ހަވާލުވުމުގެ ރަސްމިއްޔާތު ބޭއްވުނީ ވެރިރަށް އެންޓަނަނަރީވޯ ގައި ހުންނަ ކޮންސްޓިޓިއުޝަނަލް ކޯޓުގައެވެ. އެތަނުގައި ގިނަ ބައްޔަކު އެއްވެ، މަންޒަރު ބަލަން ތިއްބެވެ. މީގެ ތެރޭގައި މުޒާހަރާތައް އިސްވެ ހިންގި ފަރާތްތައްވެސް ހިމެނެއެވެ.
"މިއަދަކީ އަޅުގަނޑުމެންގެ ޤައުމަށް ތާރީޚީ ބަދަލެއް އަންނަ ދުވަހެކެވެ. ބަދަލު ގެނައުމުގެ ޝައުޤުވެރިކަމާއެކު ފުރިހަމަ ޖޯޝުގައިވާ ރައްޔިތުންނާއެކު... އުފަލާއެކު އަޅުގަނޑުމެންގެ ޤައުމުގެ ހަޔާތުގައި އައު ބާބެއް ހުޅުވަމެވެ،" އައު ރައީސް ވިދާޅުވިއެވެ.
ކުރީގެ ފަރަންސޭސި ކޮލޮނީ އެއްގެ ގޮތުގައި އޮތް އިންޑިއާ ކަނޑުގެ ޖަޒީރާ ގައުމެއް ކަމަށްވާ މަޑަގަސްކަރަ މިހާރު ވަނީ އިންތިޤާލީ މަރުޙަލާއަކަށް ވަދެފައެވެ. މި މަރުޙަލާގައި ސިޔާސީ ހުރަސްތަކާއި ޤާނޫނީ ހަމަނުޖެހުންތައް ގިނަވާނެ ކަމަށް ތަޖުރިބާކާރުން ބުނެއެވެ. ނަމަވެސް ކާނަލް ރެންޑްރިއަނިރީނާ ގެ ލީޑަރޝިޕާ މެދު ޔަގީންކަން އޮތް މީހުން އެ ގައުމުގައި މިހާރު މަދު ނުވާނެ ކަަމަށް ބެލެވެއެވެ.
ކޮންސްޓިޓިއުޝަނަލް ކޯޓުގެ ރައީސް ފްލޮރެންޓް ރަކޮޓޯއަރިސޯއާ ވަނީ މަޑަގަސްކަރަ މިވަގުތު އޮތް ޙާލަތު ބަޔާން ކުރުމުގައި ބައިނަލްއަޤްވާމީ މުޖުތަމަޢުން "ބަޣާވަތް" މިގޮތަށް ބުނާތީ ފާޑުކިޔާފައެވެ.
އޭނާ ދެކޭގޮތުގައި އެ ގައުމުގައި ޤާނޫނުއަސާސީ އާ ޚިލާފުވެފައެއް ނުވެއެވެ. އޭގެ ބަދަލުގައި އޭނާ ބުނެފައިވަނީ ޙާލަތު ގޯސްވުމަށް މަގުފަހިވެފައިވަނީ ޤާނޫނުއަސާސީގެ ސަބަބުން ކަމަށެވެ.
މުޒާހަރާތައް ފެށުނީ މިދިޔަ މަހުގައެވެ. މިއީ ފުރަތަމަ ޖެން ޒީން މަޑާ ނަމަކަށް ކިޔާ ޒުވާނުންގެ ޙަރަކާތަކުން އިންތިޒާމު ކުރި މުޒާހަރާތަކެކެވެ. މި ޒުވާނުން ރުޅިގަދަވީ ދިގު މުއްދަތަކަށް ކަރަންޓާއި ފެން ނުލިބި ދިއުމުންނެވެ.
ވަގުތީ ރައީސް ކަމަށް ހަވާލުވި ކާނަލް ރެންޑްރިއަނިރީނާ ޖެން ޒީންގެ މުޒާހަރާކުރި ފަރާތްތަކަށް ބުނެފައިވަނީ އަސްކަރިއްޔާ އިން ސަރުކާރެއް އެކުލަވާލައި، ދެ އަހަރުގެ ތެރޭގައި އިންތިޚާބު ބާއްވާނެ ކަމަށެވެ.
ޤައުމުގެ އެތެރެއާއި ބޭރުގައި ތިބި ޑިމޮކްރަސީ އަށް ތާއީދުކުރާ ފަރާތްތަކުގެ އުއްމީދަކީ މި ވަޢުދު ފުއްދޭނެ ކަމަށެވެ.
ކާނަލް ރެންޑްރިއަނިރީނާ ގެ ލީޑަރޝިޕްގެ ދަށުން، މަޑަގަސްކަރައިގެ ރައްޔިތުންނަށް ދިމާވެފައިވާ އަސާސީ މައްސަލަތައް ޙައްލު ކުރުމަށް އިސްކަންދޭނެ ކަމަށް އެ ގައުމުގެ ގިނަ ބަޔަކު އުއްމީދުކުރެވެއެވެ. ޚާއްޞަކޮށް ކަރަންޓާއި ފެނުގެ ދަތިކަން ޙައްލުކުރުމާއި، އިޤްތިޞާދީ ޙާލަތު ރަނގަޅުކުރުމާއި، ސިޔާސީ އިސްލާހުތައް ގެނައުމަށް މަސައްކަތްކުރާނެ ކަމަށް އެ މީހުން ތިބީ އުއްމީދު ކޮށްގެންނެވެ.
ނަމަވެސް، މި އައު ވެރިކަމުގެ ޝަރުޢީ ހައިސިއްޔަތާ މެދު ސުވާލު އުފެދިފައިވާއިރު، ބައިނަލްއަޤްވާމީ މުޖުތަމަޢުގެ ބައެއް ފަރާތްތަކުން ވެރިކަން ބަދަލުވީ ބަޣާވާތަކުން ކަމަށް ސިފަކުރަމުންދާތީ، ކުރިއަށް އޮތް ދުވަސްތަކުގައި އެ ގައުމަށް ސިޔާސީ އަދި ޑިޕްލޮމެޓިކް ގޮންޖެހުންތަކަކާ ކުރިމަތިލާން ޖެހިދާނެއެވެ.
އެހެންކަމުން، މަޑަގަސްކަރައިގެ އައު ވެރިކަމުގެ ކާމިޔާބީ ބިނާވެގެން ދާނީ ރައްޔިތުންގެ އުއްމީދުތައް ފުއްދައިދިނުމާއި، ޤައުމުގެ ޑިމޮކްރެޓިކް މުއައްސަސާތައް ހަރުދަނާކުރުމާއި، ބައިނަލްއަޤްވާމީ މުޖުތަމަޢުގެ އިތުބާރު ހޯދުމުގެ މައްޗަށް ކަމަށް ސިޔާސީ ތަޖުރިބާކާރުން ދެކެއެވެ.
